އިނގިރޭސި ޤައުމީ ޓީމާއި, މެންޗެސްޓަރ ޔުނައިޓެޑުގެ ލެޖެންޑް ބޮބީ ޗާލްޓަން އަކީ ތާރީޚުން ޖާގަ ހޯދާފައިވާ ފަރާތެއް ކަމަށް އިނގިރޭސި ބޮޑުވަޒީރު ރިޝީ ސުނާކް ވިދާޅުވެއްޖެ އެވެ.

ސުނާކް މިފަދައިން ވިދާޅުވީ ބޮބީ ޗާލްޓަން މަރުވުމާ ގުޅިގެން ކުރެއްވި ޓުވީޓެއްގަ އެވެ. އުމުރުން 86 އަހަރުގައި ބޮބީ ޗާލްޓަން މަރުވެފައި ވަނީ ހޮނިހިރު ދުވަހުގެ ވަގުތެއްގަ އެވެ. އޭނާ ވަނީ މީގެ ތިން އަހަރު ކުރިން ބޮޑު ބައްޔަކަށް ފަރުވާ ހޯދަން ފަށައިފަ އެވެ. ބޮބީ ޗާލްޓަން މަރުވުމާއެކު، ފުޓުބޯޅައިގައި މަސައްކަތް ކުރަމުން އަންނަ އެކި ފަރާތްތަކުން އަންނަނީ އެކަމުގެ ހިތާމަ ފާޅު ކުރަމުންނެވެ. އެގޮތުން އޭނާ ކުޅުނު މެންޗެސްޓަރ ޔުނައިޓެޑުން ވެސް ވަނީ ބަޔާނެއް ނެރެފަ އެވެ. އިތުރަށް އިނގިރޭސި ބޮޑުވަޒީރު ސުނާކް ވިދާޅުވެފައިވާ ގޮތުގައި، ބޮބީ ޗާލްޓަން އަކީ ކުޅިވަރުގެ އެންމެ މޮޅު އެއް ކުޅުންތެރިޔާގެ ގޮތުގައި ތާރީޚުން ޖާގަ ހޯދާފައިވާ ކުޅުންތެރިއެކެވެ. ހަމައެހެންމެ އޭނާ އަކީ ގިނަ ބައެއްގެ ވަރަށް ބޮޑު ލޯތްބެއް ލިބިފައިވާ ކުޅުންތެރިއެއް ކަމަށް ވެސް ސުނާކް ވިދާޅުވި އެވެ.

ބޮބީ ޗާލްޓަން ވަނީ އިންގްލެންޑުގެ ޤައުމީ ޓީމާއެކު 1996 ވަނަ އަހަރުގެ ފީފާ ވޯލްޑް ކަޕް ކާމިޔާބުކޮށްފަ އެވެ. އިންގްލެންޑުން އެ އަހަރުގެ ވޯލްޑް ކަޕް ކާމިޔާބު ކުރިއިރު، ބޮބީ ޗާލްޓަންގެ ޖާދުވީ ކުޅުން ވަނީ ފެނިފަ އެވެ. މީގެ އިތުރުން އިންގެލެންޑާއެކު އޭނާ ވަނީ 1968 ވަނަ އަހަރުގެ ޔޫރޯ ފުޓުބޯޅަ މުބާރާތް ވެސް ކާމިޔާބު ކޮށްފަ އެވެ. މެންޗެސްޓަރ ޔުނައިޓެޑާއެކު އޭނާ ވަނީ ފުޓުބޯޅަ ލީގު ފަސްޓް ޑިވިޝަން، އެފްއޭ ކަޕް، އެފްއޭ ޗެރިޓީ ޝީލްޑް އަދި ޔޫރަޕިއަން ކަޕް ކާމިޔާބު ކޮށްފަ އެވެ. މީގެ އިތުރުން ފުޓުބޯޅައިގެ އިންޑިވިޖުއަލް ގިނަ އެވޯޑު ތަކެއް ވެސް އޭނާ ވަނީ ހާސިލްކޮށްފަ އެވެ.

އެގޮތުން އެފްޑަބްލިއުއޭ އިން ހޮވާ އަހަރުގެ އެންމެ މޮޅު ކުޅުންތެރިޔާ، ފީފާ ވޯލްޑް ކަޕްގެ އެންމެ މޮޅު ކުޅުންތެރިޔާ އަށް ދޭ ގޯލްޑަން ބޯލް އަދި ބެލެންޑޯ އެވޯޑު ފަދަ އެވޯޑުތައް ހިމެނެ އެވެ.