ބީއެމްއެލްގެ ނަމުގައި އަނެއްކާވެސް ސްކޭމް މެސެޖުތަކެއް، ސަމާލުވޭ!
ގޮތްނޭނގޭ ލިންކުތަކަށް ނުވަނުމަށް ވަނީ އިލްތިމާސްކޮށްފައި
ބީއެމްއެލްގެ ނަމުގައި ފޭކު މެސެޖުތަކެއް ދަނީ ދައުރުކުރަމުން
ބޭންކް އޮފް މޯލްޑިވްސް (ބީއެމްއެލް) ގެ ނަމުގައި އަނެއްކާ ވެސް މެސެޖުތަކެއް ދައުރުވަމުންދާތީ ސަމާލުވުމަށް އެ ބޭންކުން އެދިއްޖެއެވެ.
މި މަހުގެ ކުރީ ކޮޅު ވެސް ބޭންކުގެ ނަމުގައި މައުލޫމާތު އަޕްޑޭޓް ކުރުމަށް ކަމަށްބުނެ މެސެޖުތަކެއް ވަނީ ދައުރުކޮށްފައެވެ. މިހާރު ފޮނުވަމުންދާ މެސެޖުތަކުގައި ވަނީ ކަސްޓަމަރުގެ އެކައުންޓުން އާދަޔާ ޚިލާފު ކަމެއް ފާހަގަކުރެވިފައިވާ ކަމަށާއި ސެކިއުރިޓީ ސަބަބުތަކާހުރެ އެ ޓްރާންސެކްޝަން މަޑުޖައްސާލާފައިވާ ކަމަށެވެ. އަދި އެކައުންޓުގެ ސައްހަކަން ކަށަވަރު ކުރުމަށް ލިންކަކަށް ވަނުމަށް އެ މެސެޖުގައި ވަނީ ބުނެފައެވެ.
އެ މެސެޖުގައިވާ ލިންކަކީ ސްކޭމްކުރުމަށް ބޭނުން ކުރާ ލިންކަކަށްވާތީ އެފަދަ ލިންކުތަކަށް ނުވަނުމަށް ބޭންކުން އިލްތިމާސްކުރެއެވެ. މިގޮތަށް ފޮނުވާ ލިންކުތައް ބޭނުންކޮށްގެން އޮޅުވާލައިގެން ފައިސާ ހޯދާ ފަރާތްތަކުން ކަސްޓަމަރުންގެ މައުލޫމާތު ހޯދައެވެ.
މި ފަހުން ޕޯސްޓު އޮފީހާއި ގިނަ ބަޔަކު އޮންލައިންކޮށް އޯޑަރު ކުރާ ޑީއެޗްއެލްގެ ނަމުގައި ވެސް ސްކޭމްތައް ހިންގުމަށް އެކި ފަރާތްތަކަށް ވަނީ މެސެޖުތައް ފޮނުވުން އިތުރުވެފައެވެ.
ނުދަންނަ ނަންބަރުތަކުން ފޮނުވާ ލިންކުތަކާއި ގޮތް ނޭނގޭ ލިންކުތަކަށް ނުވަނުމަށާއި ބޭންކް އެކައުންޓާ ގުޅުންހުރި މައުލޫމާތާއި އަމިއްލަ ޒާތީ މައުލޫމާތު އެއްވެސް ފަރާތަކާ ހިއްސާ ނުކުރުމަށް ކަމާބެހޭ ފަރާތްތަކުން އިލްތިމާސްކުރެއެވެ.
