އިބްތިޚާބީ ރައީސް ޑރ. މުއިއްޒު އަކީ، ސިޔާސީ ގޮތުން ވަރަށް ތަޖުރިބާ މަދު ލީޑަރަކަށްވާނެ: ފަލާހް

އިބްތިޚާބީ ރައީސް ޑރ. މުހައްމަދު މުއިއްޒު އަކީ، ސިޔާސީ ގޮތުން ވަރަށް ތަޖުރިބާ މަދު ލީޑަރަކަށްވާނެކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެމްބަރު މުހައްމަދު ފަލާހު ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން ފަލާހު ވިދާޅުވީ، ވޭތުވެދިޔަ ހަތް އަހަރު ދުވަހުވެސް މުއިއްޒު މަސައްކަތްކުރައްވާފައިވަނީ، ރާއްޖޭގެ ސިޔާސަތު ކަނޑައެޅުމަށް ނުވަތަ ރާއްޖޭގެ ސިޔާސަތާއި ބެހޭގޮތުން ކަންކަން ކުރުމަށްޓަކައި މަސައްކަތް ކުރަމުންދިޔަ ވުޒާރާއެއްގައެސް ނޫންކަމަށެވެ.

މީގެއިތުރުން ފާލާހު ވިދާޅުވީ، ވޭތުވެދިޔަ ބައެއް ސަރުކާރުތަކުންވެސް ސިޔާސީ ގޮތުން ތަޖުރިބާ މަދު ވެރިންގެ ވެރިކަން ފެނިވަޑައިގަނެފައިވާކަމަށެވެ. އަދި މުއިއްޒުއަކީ ސިޔާސީ ގޮތުން ތަޖުރިބާ މަދު ބޭފުޅެއްކަން ހާމަކުރައްވާ ފަލާހް ވިދާޅުވީ، ތަޖުރިބާ މަދުކަމުގެ ނާޖާއިޒް ފައިދާ ޕާޓީގެ ތެރެއިން ނަގާނެކަމަށެވެ.

އެތެރޭގެ ދެ ޕާޓީ ވަކިވެ ފެކްޝަންވެފައިވާއިރު މުއިއްޒުއަށް ވެރިކަންކުރެއްވުމަށް އުދަނގޫފުޅުވާނެކަމަށް ފަލާހު ވަނީ ވިދާޅުވެފައެވެ.