ފުލުހުން ޓޯ ކުރި ކާރެއް އުސޫލާ ޚިލާފަށް ނައްތާލާފައިވާތީ ކާރުގެ ވެރިފަރާތަށް ބަދަލުގެ ގޮތުގައި 250،000 ރުފިޔާ ދޭން ސިވިލް ކޯޓުން ހުކުމް ކޮށްފިއެވެ.
ބުދަ ދުވަހު ކޯޓުން މިގޮތަށް ހުކުމް ކޮށްފައިވަނީ 16 ޖުލައި 2019 ގައި ޓޯ ކުރި ކާރެއް އޭގެ ވެރިފަރާތަށް އެންގުމަކާނުލައި ނައްޔާލާފައިވާތީ އެކަމާ ގުޅިގެން ފުލުހުންނާ ދެކޮޅަށް ހުށަހަޅާފައިވާ މައްސަލައަކާ ގުޅިގެންނެވެ. ފުލުހުން ޓޯ ކުރާ އުޅަނދުތައް ނައްތައިލެވޭނީ އެ އުޅަނދެއްގެ މައުލޫމާތު އާއްމު ކުރާތާ 60 ދުވަހުގެ ތެރޭގައި ވެރިފަރާތުން އުޅަނދާ ހަވާލު ނުވެއްޖެ ހާލަތެއްގައެވެ. ނަމަވެސް މި މައްސަލައިގައި އެ އިދާރާއިން މައުލޫމާތު އާއްމު ނުކުރާ ކަމަށާއި ވެރިފަރާތަށް ވެސް ނާންގާ ކަމަށް ވަނީ ބުނެފައެވެ.
ސިވިލް ކޯޓުން ކުރި ހުކުމުގައި ބުނެފައިވާ ގޮތުގައި އެއްގަމު ދަތުރުފަތުރުގެ ގާނޫނުގައި ބުނެފައިވާ ގޮތާ ޚިލާފަށް ކާރު ޓޯ ކުރިކަން ފުލުހުންގެ ވެބްސައިޓުގައި އާއްމު ކުރީ އެ ކާރު ނައްތާލުމަށްފަހު ފަހުގެ ތާރީހެއްގައެވެ. އެހެންވެ، ކާރާ ހަވާލުވުމުގެ ފުރުސަތު ވެރިފަރާތަށް ނުލިބޭކަން ވަނީ ފާހަގަކޮށްފައެވެ.
ފުލުހުން ބުނެފައިވާ ގޮތުގައި އިއުލާން ފަހުގެ ތާރީހެއްގައި ވެބްސައިޓުން ފެންނަން ހުރީ އެ ވެބްސައިޓް ހޯސްޓްކޮށްފައިވާ ފަރާތުން ކުއްލި ގޮތަކަށް ކެންސަލްކުރުމުގެ ސަބަބުން ވެބްސައިޓް ޑައުންވުމާ ގުޅިގެންނެވެ. އެގޮތުން، 02 އޮކްޓޯބަރު 2019 ގައި ކާރު ނައްތާލާފައިވާއިރު މައުލޫމާތު ވެބްސައިޓުގައި އާއްމުކޮށްފައިވަނީ 15 އޮކްޓޯބަރު 2019ގައެވެ.
ގާނޫނުގައި ވަކިގޮތަކަށް އަމަލުކުރަން ލާޒިމްކޮށްފައިވާ ކަންކަމުގައި އެއާ ޚިލާފަށް އަމަލު ކުރުމަކީ މަސްއޫލިއްޔަތު އަދާކުރުމުގައި އިހުމާލުވުން ކަމުގައި ސިވިލް ކޯޓުން ވަނީ ފާހަގަކޮށްފައެވެ. އެގޮތުން، ވެބްސައިޓު ޑައުންވެފައިވާކަން ކަނޑައެޅިގެން އެނގޭއިރު ޓޯ ކުރެވިފައިވާ އުޅަނދުތަކުގެ މައުލޫމާތު އާއްމު ކުރުމަށް އެކަށީގެންވާ މިންވަރަށް މަސައްކަތް ނުކުރުމުގެ ސަބަބުން ކާރުގެ ވެރިފަރާތަށް ސީދާ ގޮތުން ގެއްލުން ލިބިފައިވާކަމަށް ހުކުމުގައި ވަނީ ބުނެފައެވެ. އެހެންވެ، އެކަމުގެ ބަދަލު ފުލުހުން ދޭން ޖެހޭނެ ކަމަށް ވެސް ވަނީ ބުނެފައެވެ.
މި މައްސަލައިގައި ކާރުގެ ވެރިފަރާތުން އެދުނީ އެ ބްރޭންޑުގެ ކާރެއް ނުވަތަ އޭގެ އަގު ހޯދައިދިނުމަށެވެ. ނައްތާލި ބްރޭންޑުގެ ކާރެއް ރާއްޖެއަށް ގެނައުމަށް މިހާރު ގެނެވޭނެ އަގުގެ ގޮތުގައި ކަނޑައަޅާފައިވަނީ 250،000 ރުފިޔާއެވެ. އެހެންވެ އަ އަގު އެއް މަސް ދުވަހުގެ ތެރޭގައި ދައުލަތުން ސިވިލް ކޯޓަށް ދެއްކުމަށް ވަނީ ހުކުމްކޮށްފައެވެ.
