ޕީއެސްޖީގެ މެޗެއް ބަލައިލުމަށް ޕެރިހަށް ދިއުމުގެ ފުރުސަތު އުރީދޫއިން
ލަކީޑްރޯއިން ހޮވޭ ފަރާތަކަށް ޕެރިސް ދެކޮޅު ޓިކެޓާއި، 2 ރެއާއި 3 ދުވަހަށް ފުލް ބޯޑާއެކު އެކޮމޮޑޭޝަން ލިބޭނެ
އުރީދޫއިން ބޭއްވި ނޫސްވެރިންގެ ބައްދަލުވުމުގެ ތެރެއިން
އުރީދޫ މޯލްޑިވްސްގެ ޕްރިމިއަމް ޕާޓްނަރު ޕެރިސް ސެއިންޓް ޖާމަން (ޕީއެސްޖީ)އާ ގުޅިގެން ޚާއްސަ ލަކީޑްރޯއެއް ފަށައިފިއެވެ.
މި އަންގާރަ ދުވަހުން ފެށިގެން 31 ޑިސެމްބަރު 2023އާ ހަމައަށް ކުރިއަށްގެންދާ މި ލަކީޑްރޯގައި އުރީދޫގެ މޮބައިލް އަދި ބްރޯޑްބޭންޑް ޕްލޭން އަޕްގްރޭޑްކުރާ ކަސްޓަމަރުންނަށާއި، އުރީދޫ ނެޓްވޯކާ އަލަށް ގުޅޭ ކަސްޓަމަރުންނަށް ބައިވެރިވެވޭނެއެވެ.
މި ލަކީޑްރޯއިން ހޮވޭ ފަރާތަކަށް ޕެރިސް ދެކޮޅު ޓިކެޓާއި، 2 ރެއާއި 3 ދުވަހަށް ފުލް ބޯޑާއެކު އެކޮމޮޑޭޝަންގެ އިތުރުން، ޕާކް ޑި ޕްރިންސެސް ސްޓޭޑިއަމްގައި 21 އޭޕްރީލް 2024ގައި ބޭއްވުމަށް ހަމަޖެހިފައިވާ ޕީއެސްޖީއާއި ލިޔޯން މެޗް އުރީދޫ ވީއައިޕީ ލައުންޖުން ބެލުމުގެ ފުރުސަތު ލިބޭނެއެވެ.
އުުރީދޫ މޯލްޑިވްސްގެ ޗީފް ކޮމާޝަލް އޮފިސަރު ހުސައިން ނިޔާޒު ވިދާޅުވީ މި ޚާއްސަ އޮފަރއަކީ ކަސްޓަމަރުންނަށް ތަފާތު ތަޖުރިބާތަކެއް ފޯރުކޮށްދިނުމަށް ކުރަމުން އަންނަ މަސައްކަތުގެ ދަށުން ތައާރަފުކުރި އޮފަރއެއް ކަމަށެވެ. ފުޓުބޯޅައަކީ ދިވެހިންގެ ހިތްތަކުން ޚާއްސަ ޖާގައެއް ހޯދާފައިވާ ކުޅިވަރަކަށް ވުމާއެކު، މި ލަކީޑްރޯގެ ނަސީބުވެރި ފަރާތަށް މިއީ ވަރަށް ޚާއްސަ ތަޖުރިބާއެއް ކުރެވިގެންދާނެ ދަތުރެއްކަމަށް އޭނާ ވިދާޅުވިއެވެ.
މީގެ އިތުރުން ކުރިއަށް އޮތް ތަނުގައިވެސް، އުރީދޫގެ އިންޓަނޭޝަނަލް ޕާރޓްނަރޝިޕްތައް މެދުވެރިކޮށް މިފަދަ ފުރުސަތުތައް ފަހިކޮށްދިނުމުގައި ދެމިއޮންނާނެކަމުގެ ޔަގީންކަން ނިޔާޒު ދެއްވިއެވެ.
ޕެރިހުގައި ޕީއެސްޖީއާއި ލިޔޯން މެޗް ލައިވްކޮށް ބަލައިލުމުގެ ނަސީބުވެރިއަކަށް ވުމުގެ ފުރުސަތު އުރީދޫގެ ހުރިހާ ކަސްޓަމަރުންނަށް ވެސް ވަނީ ހުޅުވާލާފައެވެ. އެގޮތުން، ސުޕަރނެޓް، ފަސޭހަ ބްރޯޑްބޭންޑް، 5ޖީ އެއަރފައިބަރ އަދި ޕޯސްޓްޕެއިޑް، ޕްރީޕެއިޑް ޕްލޭން އަޕްގްރޭޑްކުރާ ފަރާތްތަކަށް މި ލަކީޑްރޯގެ ބައިވެރިއަކަށް އޮޓޮމެޓިކުން ވެވޭނެ ކަމަށް އުރީދޫއިން ބުނެއެވެ. މި ޕްރޮމޯޝަން ކުރިއަށް ދާ މުއްދަތުގައި އުރީދޫ މޯލްޑިވްސްއާ އަލަށް ގުޅޭ ކޮންމެ ކަސްޓަމަރަކަށްވެސް ލަކީ ޑްރޯގައި އޮޓޮމެޓިކުން ބައިވެރިވެވޭނެ ކަމަށްވެސް އެ ކުންފުނިން ބުންޏެވެ.
ޕީއެސްޖީއަކީ 2013 ވަނަ އަހަރުން ފެށިގެން އުރީދޫ ގްރޫޕްގެ ޕްރިމިއަމް ޕާޓްނަރެއްގެ އިތުރުން ގްލޯބަލް ބްރޭންޑް އެމްބެސެޑަރެއްގެ ގޮތުގައި މަސައްކަތް ކުރަމުން އަންނަ ކްލަބެކެވެ. މި ޕާރޓްނަރޝިޕްގެ ދަށުން އުރީދޫ ޕީއެސްޖީ އެކަޑަމީއާއި ޕީއެސްޖީ ހޭންޑްބޯލް އެކަޑަމީ ފަދަ ހަރަކާތްތަކުގެ ތެރެއިން، މެދުއިރުމައްޗާއި އުތުރު އެފްރިކާ އަދި ދެކުނު އިރުމަތީ އޭޝިއާގެ ޒުވާނުންގެ ކުރިއެރުމަށް ގިނަ މަސައްކަތްތަކެއް ދަނީ ކުރަމުންނެވެ.
