ޔޫއެފާ ޗެމްޕިއަންސް ލީގުގެ ފައިނަލް މެޗު ބަލަން ދިއުމުގެ ފުރުސަތު ބީއެމްއެލްއިން ދެނީ

އިސްތަންބޫލްގައި ބާއްވާ ޔޫއެފާ ޗެމްޕިއަންސް ލީގު ފައިނަލް ބަލަން ދިއުމުގެ ފުރުސަތާއެކު، ބޭންކް އޮފް މޯލްޑިވްސް (ބީއެމްއެލް)އިން ޕްރޮމޯޝަނެއް ފަށައިފިއެވެ.

އެ ބޭންކުން ބުނެފައިވާގޮތުގައި މިއީ އެ ބޭންކުގެ މާސްޓަރ ކާޑު ބޭނުންކުރާ ކަސްޓަމަރުންނަށް ހާއްސަކޮށްގެން ކުރިއަށްގެންދާ ޕްރޮމޯޝަނެކެވެ. މި ޕްރޮމޯޝަނުގެ ދަށުން، ދެ މީހަކަށް ފައިނަލް މެޗު ބަލަން ދިއުމުގެ ފުރުސަތު ދެވޭނެކަމަށް ބީއެމްއެލްއިން ބުންޏެވެ.

މި ޕްރޮމޯޝަންގެ ދަށުން، ޕޮކެޓްމަނީއާއެކު ހުރިހާ ހަރަދެއް ދޭނީ ބީއެމްއެލްއިންނެވެ. މި ދަތުރުގައި ދާ ފަރާތްތަކުން އިސްތަންބޫލްގައި ހަތަރު ދުވަސް ހޭދަ ކުރާނެއެވެ.

މި ޕްރޮމޯޝަން ކުރިއަށްދާނީ 12 އެޕްރީލުން 9 މެއި 2023ގެ ނިޔަލަށެވެ.

މި ޕްރޮމޯޝަންގައި މާސްޓަރ ކާޑު މެދުވެރިކޮށް، ރާއްޖެއާއި ރާއްޖެއިން ބޭރުގައި ކުރާ ހުރިހާ މުއާމަލާތްތަކެއް ހިމެނޭނެކަމަށް ބޭންކުން ބުންޏެވެ.

މާސްޓަރ ކާޑަކީ ޔޫއެފްއާ ޗެންޕިއަންސް ލީގުގެ އޮފިޝަލް ސްޕޮންސަރެވެ. ބީއެމްއެލްއަކީ ރާއްޖޭގައި މާސްޓަރ ކާޑުގެ ޕްރިންސިޕަލް މެންބަރެކެވެ. ބީއެމްއެލްއިން އަންނަނީ ރާއްޖޭގައި މާސްޓަރ ކާޑުގެ ޑެބިޓް، ކްރެޑިޓް، އަދި ޕްރީޕެއިޑް ކާޑު ދޫކުރަމުންނެވެ.