ފެނަކައިން 4000 އައު ވަޒީފާ އުފައްދާފައިވޭ، އެއީ ރަނގަޅު ކަމެއް: މެންބަރު ނިޔާޒު
ފެނަކާއަށް އާމްދަނީ ލިބޭ އޮންނަނީ ދެގޮތެއް
ހުޅުމާލެ ދާއިރާގެ އެމްޑީޕީ މެމްބަރު އަލީ ނިޔާޒު ވާހަަކަފުޅު ދައްކަވަނީ
ފެނަކަ ކޯޕްރޭޝަނުން މިދިޔަ ދުވަސްތަކުގައި 4000 އައު ވަޒީފާ އުފައްދާފައިވާ ކަމަށާއި، އެއީ ރަނގަޅު ކަމެއް ކަމަށް ހުޅުމާލެ ދާއިރާގެ އެމްޑީޕީ މެމްބަރު އަލީ ނިޔާޒު ވިދާޅުވެއްޖެއެވެ.
ބުދަ ދުވަހު ކުރިއަށް ދިޔަ ރައްޔިތުން މަޖިލީހުގެ ޖަލްސާގައި، މަޑުއްވަރި ދާއިރާގެ މެންބަރު އާދަމް ޝަރީފް ހުށަހަޅުއްވާފައިވާ، ފެނަކައިން ކުދި ވިޔަފާރިތަކާއި ކުންފުނިތަކަށް ދޭންޖެހޭ ފައިސާދިނުން އަވަސްކުރުމަށާއި ފެނަކައިގެ މެނޭޖްމަންޓް އަދި ފައިނޭންޝަލް އޮޑިޓެއް ހެދުމަށާއި ދަރަނިތައް އަދާކުރާނެގޮތުގެ ޕްލޭނެއް އެކުލަވާލުމަށް ގޮވާލައި ހުށަހަޅާ ގަރާރުގެ ބަހުސްގައި ވާހަކަފުޅު ދައްކަވަމުން މެންބަރު ނިޔާޒު ވިދާޅުވީ ފެނަކައިގެ މިމައްސަލައަކީ ބަލަންޖެހޭ އަދި ތަހުގީގު ކުރަންޖެހޭ މައްސަލައެއް ކަމަށެވެ. އަދި ރައްޔިތުން މަޖިލީހުގެ ކޮމެޓީއަކުން އެކަން ކުރުމަކީ ވެސް ބުއްދިވެރި ރަނގަޅު ގޮތެއް ކަމަށް މެމްބަރު ނިޔާޒު ވިދާޅުވިއެވެ.
ނަމަވެސް ފެނަކަ ކޯޕްރޭޝަން އުފައްދައިގެން ދައުލަތުން ކުރަން އުޅުނު ކަމަކީ ކޮބައިތޯ ބަލަންޖެހޭ ކަމަށާއި، ފެނާއި ނަރުދަމާގެ ޚިދުމަތް ދިނުމަށް އެކި ސަރުކާރުތަކުން އެކި މޮޑެލްތައް ބޭނުންކުރާ ކަމަށެވެ. ނަމަވެސް މިހާތަނަށް ރާއްޖޭގައި ކާމިޔާބު ކަމާއެކު ހިންގާފައިވާ މޮޑެލްއަކީ ސަރުކާރު ސަބްސިޑީ ދީގެން ކުންފުނިތައް ހިންގުމުގެ މޮޑެލް ކަމަށް މެންބަރު ނިޔާޒު ވިދާޅުވިއެވެ.
ފެނަކާއަށް ލިބޭ އާމްދަނީއަށް އިޝާރާތް ކުރައްވައި މެންބަރު ނިޔާޒު ވިދާޅުވީ އަމްދަނީ ލިބޭނެ އޮންނާނީ ދެގޮތް ކަމަށެވެ. އެއީ ޚިދުމަތުން ބިލް ކުރުމުން ލިބޭ އާމްދަނީ އާއި ދައުލަތުގެ ސަބްސިޑީ ކަމަށެވެ. ބިލްތަކަށް ފައިސާ ދައްކަނީ ޚިދުމަތް ހޯދާ ފަރާތްތަކުގެ ގާތްގަނޑަކަށް 60 އިންސައްތަ މީހުން ކަމަށާއި، އޭގެ ސަބަބުން ވެސް ފެނަކާއަށް ދަތިތައް ކުރިމަތިވާ ކަމަށް މެންބަރު ނިޔާޒު ވިދާޅުވިއެވެ. އަދި ވިދާޅުވީ މިނިމަމްވޭޖާއެކު ވެސް ބޮޑު ތަފާތެއް އައިސްފައިވާ ކަމަށެވެ. އެގޮތުން މިނިމަމްވޭޖްގެ ކުރިން ޕޭރޯލްއަށް ގާތްގަނޑަކަށް ހަރަދުވަނީ 35 މިލިއަން ރުފިޔާ ކަމަށާއި، މިނިމަމްވޭޖު ވުޖޫދުވިފަހުން ޕޭރޯލަށް ގާތްގަނޑަކަށް 50 މިލިއަން ރުފިޔާ ހަރަދުވާ ކަމަށް ފެނައިން މައުލޫމާތު ދީފައިވާ ކަމަށް މެންބަރު ނިޔާޒު ވިދާޅުވިއެވެ.
ގިނަ ވަޒީފާތައް އުފެދިފައިވާކަން ފާހަގަކުރައްވައި މެންބަރު ނިޔާޒު ވިދާޅުވީ 4000 އައު ވަޒީފާތައް އުފައްދާފައިވާ ކަމަށާއި، އެއީ ރަނގަޅު ކަމެއް ކަމަށެވެ. އެކަމުގެ ސަބަބުން އަތޮޅުތެރޭގެ ރަށްރަށުގައި ވަޒީފާތައް އިތުރުވެފައިވާ ކަމަށާއި، އާއްމު ރައްޔިތުންގެ ދިރިއުޅުމަށް ހެޔޮ އަސަރުކޮށްފައިވާ ކަމަށް މެންބަރު ނިޔާޒު ވިދާޅުވިއެވެ.
ނިޔާޒު ވިދާޅުވީ ފެނަކައިގެ ދަރަނީގެ މައްސަލަ ދިރާސާކުރަންޖެހޭ ކަމަށާއި، ފައިސާ ނުދީވާ ސަބަބުންތައް ހޯދަން ޖެހޭ ކަމަށެވެ. މިހާރު ސަރުކާރު ބަދަލުވެފައިވާ ކަމަށާއި، ސަރުކާރު ޒިންމާދާރުކުރުވަން ތިބި ފަރާތްތައް ތިބީ ސަރުކާރުގައިކަން މެންބަރު ފާހަގަކުރެއްވިއެވެ. އެހެންކަމުން އެބޭފުޅުންނަށް މިފަދަ މައްސަލަތައް ބެލޭނެ ކަމަށެވެ. އަދި ވިދާޅުވީ ކުރިއަށް އޮތްތަނުގައި ކުންފުނިތަކަށް މިފަދަ މައްސަލަތައް ކުރިމަތިނުވާނެ ގޮތަކަށް އިންތިޒާމްތައް ހަމަޖައްސައި، އިތުރަށް ހަރުދަނާ ކުރުމަށް ފިޔަވަޅުތައް އަޅާނެ ކަމަށް އުންމީދު ކުރާ ކަމަށެވެ.
