ފެނަކައިގެ ދަރަންޏަކީ ހަމައެކަނި މިސަރުކާރުގެ އެކަނި ދަރަންޏެއް ނޫން، މިސަރުކާރުން ވަނީ ފެނަކައިގެ ރައުސުލްމާލު އިތުރުކޮށްފައި: މެންބަރު އަސްލަމް
18 އޮކްޓޯބަރު 2023 | ބުދަ 07:41ދައުލަތުން އެއްވެސް ފައިސާއެއް އެއްވެެސް ފަރާތަކަށް ދޭންޖެހިފައިވާނަމަ އެފައިސާއެއް ވީހާ ވެސް އަވަހަށް ދައްކަންޖެހޭނެ
ހިތަދޫ އުތުރު ދާއިރާގެ އެމްޑީޕީ މެމްބަރު އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް
ފެނަކަ ކޯޕްރޭޝަންގެ ދަރަންޏަކީ ހަމައެކަނި މިސަރުކާރުގެ ދަރަނި ނޫން ކަމަށާއި، މިސަރުކާރުން ދަރަންޏާ ނުބައްދަލަށް ފެނައިގެ ރައުސުލްމާލު އިތުރުކޮށްފައިވާ ކަމަށް ހިތަދޫ އުތުރު ދާއިރާގެ އެމްޑީޕީ މެމްބަރު އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް ވިދާޅުވެއްޖެއެވެ.
ބުދަ ދުވަހު ކުރިއަށް ދިޔަ ރައްޔިތުން މަޖިލީހުގެ ޖަލްސާގައި، މަޑުއްވަރީ ދާއިރާގެ މެންބަރު އާދަމް ޝަރީފް ހުށަހަޅުއްވާފައިވާ، ފެނަކައިން ކުދި ވިޔަފާރިތަކާއި ކުންފުނިތަކަށް ދޭންޖެހޭ ފައިސާދިނުން އަވަސްކުރުމަށާއި ފެނަކައިގެ މެނޭޖްމަންޓް އަދި ފައިނޭންޝަލް އޮޑިޓެއް ހެދުމަށާއި ދަރަނިތައް އަދާކުރާނެގޮތުގެ ޕްލޭނެއް އެކުލަވާލުމަށް ގޮވާލައި ހުށަހަޅާފައިވާ ގަރާރުގެ ބަހުސްގައި ވާހަކަފުޅު ދައްކަވަމުން މެންބަރު އަސްލަމް ވިދާޅުވީ ދައުލަތުން އެއްވެސް ފައިސާއެއް އެއްވެެސް ފަރާތަކަށް ދޭންޖެހިފައިވާނަމަ އެފައިސާއެއް ވީހާ ވެސް އަވަހަށް ދައްކަންޖެހޭނެ ކަމަށް ގަބޫލުކުރާ ކަމަށެވެ.
ފެނަކައިގެ އޮޑިޓް ރިޕޯޓަކަށް އިޝާރާތް ކުރައްވައި މެންބަރު އަސްލަމް ވިދާޅުވީ އޮޑިޓަރ ޖެނަރަލް އޮފީހުން 2019 ވަނަ އަހަރު ފެނަކައިގެ އޮޑިޓެއް ހަދާ، އާއްމުކޮށްފައިވާ ކަމަށެވެ. އަދި 2018 ވަނަ އަހަރު ނިމުނުއިރު ވެސް ފެނަކައިގެ ދަރަނި ވަރަށް ބޮޑުވެފައިވާކަން މެންބަރު އަސްލަމް ފާހަގަކުރެއްވިއެވެ.
ފެނަކައަށް އެތެރެކުރި އެސެޓަށް އިޝާރާތް ކުރައްވައި މެންބަރު އަސްލަމް ވިދާޅުވީ އެދަރަންޏާ ނުބައްދަލަށް ފެނަކައިގެ ރައުސުލްމާލު އިތުރުކޮށްފައިވާ ކަމަށާއި، ގިނަގުނަ ޚިދުމަތްތަކެއް ކޮށްފައިވާ ކަމަށެވެ.
އެގޮތުން 17000 ކިލޯމީޓަރުގެ ކޭބަލް ރާއްޖޭގެ އެކި ރަށްރަށުގައި ބިމުގެ އަޑީގައި އަޅާފައިވާ ކަމަށާއި، ސަތޭކަ އެތައްރަށެއްގައި ފެނަކައިގެ ނެޓްވޯޓު ކޭބަލް ގާއިމްކޮށްދީފައިވާ ކަމަށް މެންބަރު އަސްލަމް ވިދާޅުވިއެވެ. މެންބަރު އަސްލަމް ވިދާޅުވީ 313 ޖަނަރޭޓަރު ސެޓް ބަހައްޓައި 150 މެގަވޯޓަށްވުރެ އިތުރަށް ކަރަންޓު އުފެދޭ މިންވަރަށް ފެނަކައިން ފުޅާކޮށްފައިވާ ކަމަށެވެ. އަދި 77 ރަށެއްގައި އައު އިންޖީނުގެ އަޅައި، އަދި 20 ރަށެއްގައި މިހާރު ވެސް މަސައްކަތް ކުރިއަށްދާކަން މެންބަރު އަސްލަމް ފާހަގަކުރެއްވިއެވެ.
ފެނަކައިގެ ދިފާއުގައި މެންބަރު އަސްލަމް ވާހަކަދައްކަވާފައިވާއިރު، އެމްޑީޕީގެ އިތުރު މަޖިލިސް މެންބަރުން ވެސް ވަނީ ފެނަކައިގެ މަސައްކަތްތަކަށް ތައުރީފު ކުރައްވައި ވާހަކަދައްކަވާފައެވެ. ރައްޔިތުންނާއި ގުޅުންހުރި ޚިދުމަތްތަކެއް ފެނަކައިން ދެމުންގެންދާ ކަމަށާއި، ރައްޔިތުންގެ މަސްލަހަތު އިސްކުރާކަން މެންބަރުން ފާހަގަކުރެއްވިއެވެ.
