ބޭންކް އޮފް ޗައިނާގެ ކުރީގެ ޗެއާމަން، ރިޝްވަތުހިފުމާއި ކޮރަޕްޝަންގެ މައްސަލަތަކެއްގައި ހައްޔަރުކޮށްފި

ޗައިނާގެ ދައުލަތުގެ ބޭންކު، ބޭންކް އޮފް ޗައިނާގެ ކުރީގެ ޗެއާމަން، ލިއު ލިއޭންގ، ރިޝްވަތު ހިފުމާއި، އުސޫލާ ޚިލާފަށް ލޯން ދޫކޮށްފައިވާކަމުގެ ތުހުމަތުގައި ހައްޔަރުކޮށްފިއެވެ. 2019އިން 2023ގެ މާރޗް މަހާ ހަމައަށް އެ ބޭންކުގެ ޗެއާމަންކަން ކުރެއްވި ލިއު ވަނީ މާރޗް މަހު މަގާމުން އިސްތިއުފާދެއްވާފައެވެ. އޭގެ ދުވަސްކޮޅެއް ފަހުން ޗައިނާގެ ކަމާބެހޭ އިދާރާތަކުން ވަނީ އޭނާގެ މައްޗަށް ކޮރަޕްޝަންގެ ދައުވާ އުފުލޭނެކަން އިއުލާންކޮށްފައެވެ.

އުމުރުފުޅުން 62 އަހަރުގެ ލިއު ލިއޭންގއަކީ ޗައިނާގެ 60 ޓްރިލިއަން ޑޮލަރުގެ ފައިނޭންޝަލް ސެކްޓަރުން ކޮރަޕްޝަން ފިލުވާލުމަށް ރައީސް ޝީ ފައްޓަވާފައިވާ މަސައްކަތްޕުޅުގެ ތެރެއިން ހައްޔަރުކުރެވުނު އެންމެ ސީނިއަރ ބޭންކަރެވެ.

ޗައިނާގެ ފައިނޭންޝަލް އިންޑަސްޓްރީން ކޮރަޕްޝަން ފިލުވާލުމަށް ޝީ ޖިންޕިންގ ފައްޓަވާފައިވާ މަސައްކަތްޕުޅު ބާރަށް ކުރިޔަށް ދާކަމަށް މިހަރުގެ އެޕްރިލް މަހުވެސް އޮފިޝަލުން ބުނެފައި ވެއެވެ. މިގޮތުން ދައުލަތަށް ނިސްބަތްވާ އެތައް ބޭންކުތަކެއްގެ އެގްޒެކެޓިވް ފެންވަރުގެ އެތައް ބަޔަކު މިހާރުވެސް ވަނީ ޖޫރިމަނާކުރެވި އަދި ޖަލަށް ލެވިފައެވެ. ނުވަތަ އެމީހުންނާބެހޭ ތަހުގީގުތައް ދަނީ ކުރިއަށެވެ. ހަމަ މި މަސައްކަތުގެ ދަށުން، ޗައިނާ ލައިފް އިންޝުއަރެންސްގެ ކުރީގެ ޗެއާމަން ވެސް ވަނީ ރިޝްވަތު ހިފުމުގެ ކުށުގައި، ކަފާލާތުވެސް ނުބެހެއްޓޭގޮތަށް އުމުރު ދުވަހަށް ޖަލަށްލާފައެވެ.

ބޭންކް އޮފް ޗައިނާގެ ކުރީގެ ޗެއާމަން ލިއު ލިއޭންގ ހައްޔަރުކުރުމުގެ ހަފުތާއެއް ކުރިން އޭނާ ވަނީ ވެރިކަންކުރާ ކޮމިޔުނިސްޓް ޕާޓީންވެސް ވަކިކޮށްފައެވެ. މާލީ ކަންކަން ރެގިއުލޭޓްކުރާ އިދާރާއިން ބުނެފައިވާގޮތުގައި، ގަވާއިދާ ޚިލާފަށް އޭނާ ކުރައްވާފައިވާ ކަންކަމުގެ ސަބަބުން މާލީގޮތުން ބޮޑެތި ގޮންޖެހުންތައް ވަނީ ކުރިމަތި ކުރުވާފައެވެ. މިގޮތުން ޣައިރު ގާނޫނީ ބޮޑެތި ލޯނުތައް ދިނުމާއި، މަނާކުރެވިފައިވާ ޕަބްލިކޭޝަންތައް ގައުމަށް އެތެރެކުރުމުގެ ހުއްދަ ދިނުމާއި، އަދި ރިޝްވަތު ހިފުމާއި، ރިސޯޓްދަތުރުތަކާއި ޕްރައިވެޓް ކްލަބްތަކަށް ދެވޭ ދައުވަތުތައް ގަބޫލުކުރެއްވުން ފަދަ ކަންކަން އޭނާ ވަނީ ކުރައްވާފައެވެ.  

ލިއުއަކީ ޗައިނާގެ ބޭންކިންގ އަދި ފައިނޭންޝަލް ސެކްޓަރު މގައި އިސް މަގާމުތަކެއް ފުރުއްވަމުން ގެންދެވި ބޭފުޅެކެވެ. މިގޮތުން ޗައިނާ ސެންޓްރަލް ބޭންކުގެ އިތުރުން އެކްސްޕޯޓް އިމްޕޯޓް ދާއިރާގައިވެސް އިސް ދައުރެއް އަދާކުރައްވާފައި ވެއެވެ.