އާމްދަނީގެ ގޮތުން މެސީ އަށް ވުރެ ކުރީގައި ރޮނާލްޑޯ

ދުނިޔޭގެ އެންމެ ގިނަ އާމްދަނީ ލިބޭ ފުޓްބޯޅަ ކުޅުންތެރިޔަކީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ކަމުގައި ފޯބްސްއިން ބުނެފި އެވެ.

އިނާމުގެ ގޮތުގައި ލިބޭ ފައިސާ އާއި މުސާރަ އާއި ބޯނަސްގެ ގޮތުގައި މިދިޔަ 12 މަސްދުވަހު ލިބުނު އާމްދަނީ އަށް ބަލާއިރު ރޮނާލްޑޯ އަށް ވަނީ 260 މިލިއަން ޑޮލަރު ލިބިފަ އެވެ. ސައޫދީ އަރަބިއްޔާގެ ޕްރޯ ލީގުގައި ކުޅެމުން އަންނަ ފޯވަޑް ލިސްޓުގެ އެއްވަނާގައިވާއިރު ފޯބްސްއިން ބުނީ ސައޫދީ ލީގުގައި ކުޅޭ ކުޅުންތެރިންނަށް ކުރިއަށްވުރެ ބޮޑަށް ލިސްޓުގައި ޑޮމިނޭޓްކުރަމުންދާ ކަމަށެވެ.

މި ލިސްޓުގެ ދެ ވަނައިގައިވަނީ ރޮނާލްޑޯއާ އެންމެ ވާދަވެރި ލަޔޮނަލް މެސީ އެވެ. އޭނާ އަށް ފާއިތުވެދިޔަ އަހަރު ލިބިފައިވަނީ 135 މިލިއަން ޑޮލަރެވެ. މެސީ އަކީ އިނގިރޭސި ކުރީގެ ކެޕްޓަން ޑޭވިޑް ބެކަމަށް އަށްފަހު އެމެރިކާ ލީގުގައި ކުޅޭ ކުޅުންތެރިންގެ ތެރެއިން މުއްސަދި ކުޅުންތެރިންގެ ލިސްޓުން ޖާގަ ލިބުނު ފުރަތަމަ ކުޅުންތެރިޔާ އެވެ.

1. ކްރިސްޓިއާނޯ ރޮނާލްޑޯ: 260 މިލިއަން ޑޮލަރު

2. ލަޔޮނަލް މެސީ: 135 މިލިއަން ޑޮލަރު

3. ނޭމާ: 112 މިލިއަން ޑޮލަރު

4. ކީލިއަން އެމްބާޕޭ 110 މިލިއަން ޑޮލަރު

5. ކަރީމް ބެންޒެމާ: 106 މިލިއަން ޑޮލަރު

6. އާލިން ހާލަންޑް: 58 މިލިއަން ޑޮލަރު

7. މުހައްމަދު ސަލާހް: 53 މިލިއަން ޑޮލަރު

8. ސާދިއޯ މާނޭ: 52 މިލިއަން ޑޮލަރު

9. ކެވިން ޑެބްރޫނޭ: 39 މިލިއަން ޑޮލަރު

10. ހެރީކޭން: 36 މިލިއަން ޑޮލަރު

11. ރޮބަޓް ލެވޮންޑޯސްކީ: 34 މިލިއަން ޑޮލަރު

ލިސްޓުގެ ތިންވަނައިގައި ވަނީ ސައޫދީ ލީގުގައި ކުޅެމުންދާ ބްރެޒިލްގެ ނޭމާ އެވެ. އޭނާ އަށް 112 މިލިއަން ޑޮލަރު ލިބެ އެވެ. ހަތަރު ވަނައިގައިވަނީ ފްރާންސާއި ޕީއެސްޖީގެ ކެޕްޓަން ކީލިއަން އެމްބާޕޭ އެވެ. އޭނާ އަށް 110 މިލިއަން ޑޮލަރުގެ އާމްދަނީ އެއް ލިބެ އެވެ. ފަސް ވަނައިގައި ވަނީ ސައޫދީ ލީގުގައި ކުޅޭ ފްރާންސާއި ރެއާލް މެޑްރިޑުގެ ކުރީގެ ފޯވަޑް ކަރީމް ބެންޒެމާ އެވެ. އޭނާ އަށް 106 މިލިއަން ޑޮލަރު ލިބިފައިވެ އެވެ. ހަވަނައިގައިވަނީ އިނގިރޭސި ލީގުގެ އެންމެ ބޮޑު މުސާރަވެރިޔާ މެންޗެސްޓާ ސިޓީގެ އާލިން ހާލަންޑެވެ. އޭނާ އަށް 58 މިލިއަން ޑޮލަރު ލިބޭއިރު ލިވަޕޫލްގެ މުހައްމަދު ސަލާހަށް ލިބެނީ 53 މިލިއަން ޑޮލަރު އަދި ސައޫދީ ލީގުގައި ކުޅޭ ސާދިއޯ މާނޭ އަށް 52 މިލިއަން ޑޮލަރު ލިބެ އެވެ. ނުވަވަނައިގައި ވަނީ މެންޗެސްޓާ ސިޓީގެ ކެވިން ޑެބްރޫނޭ އެވެ. އޭނާ އަށް 39 މިލިއަން ޑޮލަރު ލިބޭއިރު އިނގިރޭސި ކެޕްޓަން، ބަޔާން މިއުނިކްގެ ހެރީކޭން އަށް 36 މިލިއަން ޑޮލަރު އަދި ބާސެލޯނާ އަށް ކުޅޭ ޕޮލެންޑްގެ ކެޕްޓަން ރޮބަޓް ލެވޮންޑޯސްކީ އަށް 34 މިލިއަން ޑޮލަރު ލިބެ އެވެ.