ބާސެލޯނާގެ ކުޅުންތެރިންނަށް ގާތްގާތުގައި އަނިޔާގެ މައްސަލަތައް ދިމާވާތީވެ ކުޅުންތެރިންނަށް ގިނަ ކަންތައްތަކެއް މަނާކޮށްފި އެވެ.
މި ގޮތުން ޖިސްމާނީ ހަރަކާތްތަކުގެ ތެރޭގައި ހިމެނޭ ބައެއް ކުޅިވަރުތައް ކުޅުން ވަނީ މަނާކޮށްފަ އެވެ. އޭގެ ތެރޭގައި މުނުފޫހިފިލުވުމަށް ކުޅޭ ކުޅިވަރާއި އާއިލާ އާއި ރަހުމަތްތެރިންނާއެކު ކުޅޭ ޓޭބަލްޓެނިހާއި، ރެކްޓް ހިފައިގެން ކުޅޭ ކުޅިވަރުތަކާއި އޭގެ ތެރޭގައި ހިމެނޭ ޕެޑެލް ފަދަ ކުޅިވަރުތައް ހިމެނެ އެވެ. ޕެޑެލް އަކީ ޔޫރަޕުގައި ކުދިކުދި ގްރޫޕްތަކާއި އާއިލާތަކުގެ މެދުގައި ވަރަށް އާއްމުވަމުން އަންނަ ކުޅިވަރެކެވެ.
މީގެ އިތުރުން ސައިކްލިން އާއި މޮޓޯ ރޭސިން އަދި އައިސް ހޮކީ ފަދަ ކުޅިވަރުތައް ވެސް ވަނީ މަނާކޮށްފަ އެވެ. މީގެ އިތުރުން ކުލަބުގެ ފަރިތަކުންތަކުގައި ވެސް ޖިސްމާނީ ގިނަ ހަރަކާތްތައް ވަނީ ހުއްޓާލަން ނިންމައިފަ އެވެ.
ސަބަބަކީ ޓީމުގެ ކުޅުންތެރިންނަށް އަނިޔާގެ މައްސަލައް ދިމާވެ ޓީމުގެ ގިނަ ކުޅުންތެރިންތަކަކަށް މި ސީޒަނުގައި ގިނަ މެޗުތަކެއް ގެއްލެމުންދާތީ އެވެ. މީގެ ތެރޭގައި ފޯވަޑް ރޮބަޓް ލެވޮންޑޯސްކީ އާއި ޕެޑްރީ އަދި ފްރޭންކީ ޑިޔޮން އާއި ހޫލްސް ކޫންޑޭ ފަދަ ކުޅުންތެރިން ހިމެނެ އެވެ.
ކޯޗު ޒަވީ ހަނާންޑޭޒް ވަނީ މި ކަންކަން ކުޅުންތެރިންނަށް އަންގައި ގަވާއިދާ ހިލާފުވާ ކުޅުންތެރިންނަށް ފިޔަވަޅު އަޅައި ޖޫރިމަނާކުރާނެ ކަމަށް އަންގާފަ އެވެ.
