ޔޫތު އޮލިމްޕިކް ގޭމްސް އަދި އޮލިމްޕިކްސް ބޭއްވުމުގެ ޝައުޤުވެރިކަން އަވައްޓެރި އިންޑިއާ އިން ފާޅުކޮށްފި އެވެ.

މިކަން އިއުލާން ކުރެއްވީ އެ ޤައުމުގެ ބޮޑުވަޒީރު ނަރެންދްރަ މޯދީ އެވެ. އިންޑިއާގެ މުމްބާއީގައި ކުރިއަށްދާ އިންޓަނޭޝަނަލް އޮލިމްޕިކް ކޮމެޓީ (އައިއޯސީ)ގެ ސެޝަން ހުޅުވުމުގެ ރަސްމިއްޔާތުގައި ވާހަކަ ދައްކަވަމުން މޯދީ ވިދާޅުވީ، 2029 ވަނަ އަހަރުގެ ޔޫތު އޮލިމްޕިކް ގޭމްސް އަދި 2036 ވަނަ އަހަރުގެ އޮލިމްޕިކްސް ބޭއްވުމަށް އެ ޤައުމުން ބޭނުންވާ ކަމަށެވެ. މޯދީ ވިދާޅުވީ އިންޑިއާގެ ފަސްގަނޑުގައި އޮލިމްޕިކްސް ބޭއްވުމަކީ އެ ޤައުމަށް ލިބިގެންދާނެ ވަރަށް ބޮޑު އުފަލެއް ކަމަށެވެ. އެކަން ފާހަގަ ކުރައްވާ މޯދީ ވިދާޅުވީ، 2036 ވަނަ އަހަރުގެ އޮލިމްޕިކްސް ބޭއްްވުމަށް އެ ޤައުމުން ކުރަމުން އަންނަ މަސައްކަތް އެއްވެސް ވަރަކަށް ހުއްޓާ ނުލައި، ކުރިއަށް ގެންދާނެ ކަމަށެވެ.

މީގެ އިތުރުން މޯދީ ވިދާޅުވީ، އިންޑިއާގެ 1.4 ބިލިއަން ރައްޔިތުންގެ އުންމީދުތައް ހާސިލް ކުރެވޭނީ ހުރިހާ ފަރާތްތަކެއްގެ އެހީތެރިކަމާއި، އެއްބާރުލުން ލިބިގެން ކަމަށެވެ. ކުޅިވަރުގައި އިންޑިއާ އިން ކުރިއަށް ދާން ބޭނުންވާ މިންވަރު، އެއްވެސް ބަޔަކަށް އޮޅިފައި ނޯންނާނެ ކަމަށް ވެސް މޯދީ ވިދާޅުވި އެވެ. އެހެންކަމުން 2036 ވަނަ އަހަރުގެ އޮލިމްޕިކްސްގެ ކުރިން، 2029 ވަނަ އަހަރުގެ ޔޫތު އޮލިމްޕިކް ގޭމްސް ބާއްވަން ވެސް އިންޑިއާ އޮތީ ތައްޔާރަށް ކަމަށް ވިދާޅުވި އެވެ. އިތުުރަށް މޯދީ ވިދާޅުވީ އިންޓަނޭޝަނަލް އޮލިމްޕިކް ކޮމެޓީ (އައިއޯސީ)ގެ ފުރިހަމަ އެއްބާރުލުން އެކަމުގައި އިންޑިއާ އަށް ލިބޭނެކަމުގެ ފުރިހަމަ ޔަގީންކަން އޮތް ކަމަށެވެ. މޯދީ ވިދާޅުވި ގޮތުގައި ކުޅިވަރަކީ ހަމައެކަނި މެޑަލް ހާސިލް ކުރެވޭ ކަމެއް ނޫން ކަމަށާއި، އެއީ މީހުންގެ ލޯބި ވެސް ލިބޭ ކަމެއް ކަމަށެވެ.

އިންޑިއާ އިން މިހާތަނަށް އޮލިޕިކްސް ގޭމްސް ބާއްވައިފައެއް ނުވެ އެވެ. އެ ޤައުމުން ވަނީ 2010 ވަނަ އަހަރުގެ ކޮމަންވެލްތު ގޭމްސް ބާއްވައިފަ އެވެ.