"ކޮބާ ޖިހާދުގެ ރޫޙުގަ ހިންގާ އޮޕަރޭޝަންތައް؟ ކޮބާ ދިފާޢަށް ތެދުވަން ބުނި މީހުން؟ ކަލޭމެންގެ ވަޤުތުވެސް އަދި ޖެހޭނެ..."

ދުވަހަކީ އޮކްޓޯބަރު މަހުން 13 ވީ ހުކުރު ދުވަހެވެ. ހުކުރު ދުވަހަކީ މުސްލިމު އާބާދުތަކުގައި ޢާއިލާތައް އެއްތަންވެ، އުފާވެރި ވަޤުތުކޮޅެއް ހޭދަ ކޮށްލުމުގެ ހިތްގައިމު މަންޒަރު އެންމެ އާންމުކޮށް ފެނިގެންދާ އެއް ދުވަހެވެ. ނަމަވެސް ފަލަސްޠީނުގެ ބިންތައް އަޅުވެތިކޮށްގެން އުޅޭ ޔަހޫދީ އިޒްރޭލުގެ ޝިކާރައަކަށް ވެފައި ވާ ޣައްޒާގެ ރަށްވެހިންނަށް މިއީ ތަފާތު ހުކުރެކެވެ. ހިތްދަތި ދުވަހެކެވެ. ދުނިޔެއިން ޣައްޒާގެ ވަސްވެސް ފޮހުލުމަށް ވަޢުދުވެގެން އޮތް އިޒްރޭލުން ޣާއްޒާއަށް ޙަމަލާތައް ދެމުންދާތާ 7 ވަނައަށް ވީ ދުވަހެވެ. ޢާއިލާތަކުން ދިރިހުރި ބަޔަކު ވިއްޔާ އެއްތަން ވެފައި ވާތީ ފެނުނަސް، އެ އެއްވުމުގައި އުފަލެއް ނެތެވެ. އޮތީ ބިރުވެރި ކަމާއި ނަމާންކަމެވެ. ހިތްދަތި ކަމާއި ވޭނާއި ތަކުލީފެވެ.

ޣައްޒާގެ ރަށްވެހިން ފޮށިތަންމަތި ބަނދެގެން، އެބައެއްގެ ކާރަށް އެރުވުނުހައި ބަޔަކު އަރުވައިގެން އުފަން ގެދޮރު ދޫކޮށް ދާން އެ ފެށީ، ރަހުމެއް ނެތް އިޒްރޭލުގެ ޢަމުރަށެވެ. މިލިއަނަކަށް ވުރެ ގިނަ ޢާންމުން، ގެތަށް ދޫކޮށް ދިއުމަށް އިޒްރޭލުގެ ޚުދުމުޚުތާރު އަސްކަރިއްޔާއިން ދިނީ އެންމެ 24 ގަޑިއިރުގެ މުހުލަތެކެވެ. ޣައްޒާ މަތިން ދަތުރު ކުރަމުން ދިޔަ އިޒްރޭލުގެ އަސްކަރީ އުޅަނދުތަކުން އުކަމުން ދިޔަ ލުއި ފޮތްތަކުގައި އޮތީ، ވަޤުތުން ވަޤުތަށް އެ ސަރަޙައްދު ދޫކޮށް ދިއުމަށް ގޮވާލާ އިންޒާރުގެ މެސެޖެކެވެ. އޭރު، އެއްގަމު މަގުން ޣައްޒާއާ ދިމާއަށް، އިޒްރޭލު އަސްކަރިއްޔާގެ ޓޭންކަރުތައް އޮތީ މިޞްރާބު ޖަހާފައެވެ.

އޮކްޓޯބަރު 12 ވީ ބުރާސްފަތި ދުވަހު، އިޒްރޭލުގެ ބޮޑުވަޒީރު ޔޫއާފް ޖަލާންތު ވަނީ، ހަނގުރާމައިގެ ވަޤުތު ޖެހިއްޖެ ކަމުގެ އިންޒާރު ދީފައެވެ. އެހެން ވީ އިރު، މިދިޔަ ހަފުތާއެއްހާ ދުވަހު އެ ހިންގީ ކޮން ޖަރީމާއެއް ހެއްޔެވެ؟ ބައިނަލްއަޤުވާމީ ފެންވަރުގައި އިންސާނީ ޙައްޤުތަކޭ ގޮވައި އަޑު އުފުލާ، ވަކާލާތު ކުރަމުން ދިޔަ މީހުންގެ ލޯތަކަށް އެ މަންޒަރުތައް ހަމަ ނުފެންނަނީ ބާއެވެ؟ ޣައްޒާގެ ފަސްގަނޑުން އިވެމުން ދާ ރުއިމާއި ގިސްލުމުގެ އަޑުތައް، އެ ކަންފަތްތަކަށް ނުއިވެނީ ހެއްޔެވެ؟ ނޫނީ، މިނިވަންކަމަށް ދަޢުވާ ކުރި ނަމަވެސް، ވަކި ބައެއްގެ ކަސްތޮޅުގައި ބަނދެވި، ހިމޭނުން އިންނަން މަޖުބޫރެއް އޮތީ ތާއެވެ.

ހުސްވި ހަފުތާ ބަންދުގައި ހަމާސްއިން އިޒްރޭލަށް ދިން ޙަމަލާގެ ރައްދުގައި ކަމަށް ބުނެ، ޣައްޒާއާ ދެކޮޅަށް ރަސްމީކޮށް ހަނގުރާމަ ޢިއުލާންކޮށް، އޮކްޓޯބަރު 7 ވަނަ ދުވަހު ޙަމަލާތައް ދޭން ފެށި ފަހުން ޣައްޒާއިން ޙަމަލާގެ އަޑުފަށްގަނޑު ކަނޑައިގެން ދާ ހަމަ އެންމެ ވަޤުތެއްވެސް ނުދެއޭ ދެންނެވި ދާނެއެވެ. ދެ ޙަމަލާއެއްގެ މެދުން މިނެޓެއް، ދެމިނެޓެއް ހިނގައިދާނެއެވެ. ނަމަވެސް، އަނެއް ޙަމަލާ އަމާޒު ވަނީ، ރައްކާތެރި ވާނެ ހިޔާވައްސެއްވެސް ނެތް ފަދަ ޙާލެއްގައި ވަނިކޮށެވެ. އިޒްރޭލުން ޣައްޒާގައި ހަނގުރާމަ ފެށިފަހުން ޣައްޒާއިން މަރުވި މީހުންގެ ޢަދަދު މިހާރު 3000 އަށް އަރަނީއެވެ. އޭގެ ތެރޭގައި އެތައް ސަތޭކަ ކުޑަކުދިންނެއްވެސް ހިމެނެއެވެ.

އިޒްރޭލު އަސްކަރިއްޔާއިން ބުނާ ގޮތުން، ކުރިއަށް އޮތް ދުވަސްތަކަކީ އިޒްރޭލުން ޣައްޒާގައި "ފުދޭ ވަރަކަށް" ހަރަކާތްތެރި ވާނެދުވަސްތަކެކެވެ. އަދި އާންމު ރައްޔިތުން އަނބުރާ ގެތަކަށް އަންނަން ވާނީ، އެކަމަށް އިރުޝާދެއް ލިބުމުން އެކަނި ކަމަށް ވެސް އިޒްރޭލުން ވަނީ އިންޒާރު ކޮށްފައެވެ.

އިންސާނީ އެހީއާއި ބެހޭ އދގެ އޮފީސް (އޯޗާ)އިން ހާމަ ކޮށްފައި ވާ މަޢުލޫމާތަށް ބަލާއިރު ޣައްޒާއިން ގެދޮރު ދޫކޮށް ދިޔަ މީހުންގެ ޢަދަދު 4 ލައްކައަށް އަރައެވެ. އަދި އެހީ ފޯރުކޮށްދިނުމުގެ ޚިދުމަތަށް ނުކުމެ ތިބި 23 މީހެއްގެ ފުރާނަ ވަނީ ގެއްލިފައެވެ. ފަލަސްޠީނުގެ ރެފިއުޖީންނާ ބެހޭ އދގެ އިދާރާ (ޔޫއެންއާރްޑަބްލިއުއޭ)އިން ވަނީ، އިޒްރޭލުގެ ޢުދުވާންތަކުން، އެ އިދާރާގެ މަރުކަޒުތައް ސަލާމަތް ކުރުމަށް ގޮވާލާފައެވެ.