މިއަންނަ ކުޑައީދުގައި ރިލީޒްކލުރުމަށް ހަމަޖެހިފައިފައިވާ ސަލްމާންޚާންގެ ޓިއުބްލައިޓް އަކީ ވަރަށްގިނަ މީހުން އިންތިޒާރު ކުރަމުން އަންނަ ފިލްމެކެވެ.
މި ފިލްމުގައި ވާނޭ ގޮތަކާމެދު ގިނަ ބައެއް އިންތިޒާރުގައި ތިބިއިރު އެކި ފަރާތްތަކުން ވަނީ ފިލްމުގައި ވާނޭ ގޮތަކާ މެދު ވާހަކަ ދައްކަން ފަށާފައެވެ. އެހެން ނަމަވެސް ދާދިފަހުން އާންމުވި "ޓިއުބްލައިޓް" ގެ ޓްރެއިލާ އާއި ޕޯސްޓަރާއި ފޮޓޯތަކުން އެ ފިލްމުގެ ވާހަކަ ކޮންމެވެސް ވަރަކަށް އެނގެއެވެ.
މި ފިލްމުގައި ސަލްމާން ޚާން(ލަކްސްމަން ސިންހް) އާއި ސަލްމާންގެ ކޮއްކޮ ސޮހައިލް ޚާން(ބަރާތު ސިންހު ބިޝްތު) ދިރިއުޅެމުން އަންނަނީ ވަރަށް އަމާން ވިލެޖެއް ކަމަށްވާ މަނާލޯގައެވެ.
ލަކްސްމަން އިންޑިއާގެ އަވަށެއްގައި އުޅެމުންދާއިރު ލޯބީގެ ގޮތުން ގުޅެނީ ޗައިނާގެ އެކަނިވެތި މައެއްކަމަށްވާ ޒޫޒޫ އެވެ. ޒޫޒޫގެ ފިރިހެން ދަރިއެއްކަމަށްވާ މަޓިން ރޭ ޓެންގޫއެވެ. ލަކްސްމަން އަކީ ޒޫޒޫ އާއި އޭނާގެ ދަރި މަޓިންގެ ރައްޓެއްސެއްކަމަށްވީނަމަވެސް އެ އަވަށުގައި އުޅޭ މީހުން އެކަމާ މާކަ ގަޔާ ނުވެއެވެ. ސަބަބަކަށްވަނީ އެދެމީހުންނަކީ ޗައިނާއަށް ނިސްބަތްވާ ދެމީހުން ކަމުގައި ވާތީއެވެ. އެހެން ނަމަވެސް ލަކްސްމަން މިކަމަކަށް މާބޮޑު ފަރުވާލެއް ނުބަހައްޓައެވެ. ޒޫޒޫ އާއި އޭނާގެ ދަރިފުޅާއި އޮތް ރައްޓެހިކަމުގެ ގުޅުމަށް މާ ބޮޑު ހީނަރުކަމެއް ނާދެއެވެ. ނަތީޖާއަކަށްވީ ލަކްސްމަން ޒޫޒޫ ދެކެ ލޯބިވުމެވެ.
މިފިލްމުގައި ލަކްސްމަން އަކީ ވަރަށް މައުސޫމު ރަނގަޅު މީހެއްކަމަށްވެއެވެ. ލަކްސްމަންގެ ކޮއްކޮ ކަމަށްވާ ބަރާތަކީ ޗައިނާއާއި އިންޑިއާ އާއި ދެމެދު ކުރާ ހަނގުރާމައިގެ ސިފައިންގެ އެންމެ އިސްވެރިއެއްގެ ގޮތުގައި ހަރަކާތްތަރިވާ ފަރާތެވެ. އެ ހަނގުރާމައިގެ ތެރޭގައި ބަރަތު ވަނީ ވީނުވީއެއް ނޭގި ޚަބަރެއް ނުވެ ގެއްލިފައެވެ. އެހެންކަމުން ލަކްސްމަން އޭނާގެ ކޮއްކޮ ބަރަތު ހޯދުމަށް ކުރެވެން ހުރި ހުރިހާ ކަމެއް ކުރަން ފަށައެވެ.
އެހެން ނަމަވެސް ބަރަތު ދުނިޔޭގައި ހުރިކަމެއް ނުވަތަ ނޫންކަމެއް އަދި ލަކްސްމަންއަށް އޭނާގެ ކޮއްކޮ ފެންނަ ކަމެއް އެނގޭނީ "ޓިއުބްލައިޓް" ބަލާލުމުންނެވެ.
ދާދިފަހުން ޓިއުބްލައިޓާއި ބެހޭގޮތުން ސަލްމާން ޚާން ބުނެފައިވަނީ ހަނގުރާމަކުރުމަކީ ރަނގަޅުކަމެއް ނޫންކަމަށާއި ފިލްމުގައި މައިގަނޑުގޮތެއްގައި ދައްކުވައި ދީފައިވާނީ ހަނގުރާމަ ވެރިން ހަނގުރާމަ ކުރުމަށްފަހު އެމީހުންގެ އާއިލާއާއި ބައްދަލުކުރާއިރު އެމީހުންނަށް ވާ އިހްސާސްތައް ކަމަށެވެ. އަދި ހަނގުރާމައަށް ދާ ހަނގުރާމަ ވެރިންނާއި އެމީހުންގެ އާއިލާއަށް ކުރިމަތިވާ އިހްސާސްތައް މި ފިލްމުގައި ދައްކުވަން މަސައްކަތް ކޮށްފައިވާކަމަށް ސަލްމާން ބުނެފައިވެއެވެ. ކޮންމެ އާއިލާއަކުންވެސް އެ އާއިލާގައި ހިމެނޭ ކޮންމެ މެމްބަރެއް ދެކެވެސް ލޯބިވާނެކަމަށް ސަލްމާން ބުންޏެވެ.
"ޓިއުބްލައިޓް" ގެ ޓްރެއިލާ ބެލި ފަރާތްތަކުގެ ތެރެއިން ބައެއް ފަރާތްތައް ބުނެފައިވަނީ މި ފިލްމުން ވަރަށް ރަނގަޅު މެސެޖެއް ލިބިގެން ދާނެކަމަށެވެ. އެއީ ކޮންމެ ކަމެއްވެސް ގަބޫލުކުރާނަމަ އެމީހަކަށް ކޮންމެ ކަމެއްވެސް ކާމިޔާބު ކުރެވޭނެކަމެވެ.
ކޮންމެއަކަސް "ޓިއުބްލައިޓް" ގެ ޑައިރެކްޓަރ ކަބީރު ޚާން ބުނެފައިވަނީ މި ފިލްމުގައި މިހާތަނަށް ސަލްމާން ދައްކާފައިވާ އެކްޓުތަކުގެ ތެރެއިން ސަލްމާން ޚާންގެ އެންމެ މޮޅު އެކްޓް ފެނިގެންދާނެކަމަށެވެ. އެއީ ތެދެއްކަމަށް ގަބޫލުކުރުމަށް ގިނަ ބަޔަކު މިހާރު ތިބީ ކުޑައީދުގެ އިންތިޒާރުގައެވެ.
