މިހާރު ބަޔާނުން އެންމެ އިސްކަމެއް ދެނީ ސާނޭގެ އެއްބަސްވުން އައުކުރުމަށް

ބަޔާން މިއުނިކުން މިވަގުތު އެންމެ ބޮޑު އިސްކަމެއް ދެނީ އެ ކުލަބަށް ކުޅެމުން އަންނަ ޖަރުމަނުގެ ލެރޯއީ ސާނޭގެ އެއްބަސްވުން އައު ކުރުމަށް ކަމަށް، ބަޔާނާ ހަވާލާދީ ޖަަރުމަނުގެ މީޑިއާތަކުން ބުނެފިއެވެ.

ބަޔާންގެ ބައެއް އިސްވެރިންނާއި ހަވާލާދީ ޖަރުމަނުގެ މީޑިއާތަކުގައި ބުނެފައި ވާގޮތުން، މިވަގުތު އެ ކުލަބުން އެންމެ އިސްކަމެއް ދޭނީ ސާނޭގެ އެއްބަސްވުން އައުކުރުމަށެވެ. ސަބަބަކީ އޭނާއަކީ އެ ކުލަބަށް މުހިންމު ކުޅުންތެރިޔަކަށް ވެފައި، އެ ކުލަބުގައި އޭނާ ދައްކަމުން އަންނަ ކުޅުމުގެ ސަބަބުންނެވެ. ބަޔާނާއެކު ސާނޭ މިހާރު ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް ބަޔާނުން ބޭނުންވަނީ ދިގު މުއްދަތަކަށް އެއްބަސްވުން އައުކޮށް، ސާނޭ ކުލަބުގައި ބެހެއްޓުމަށެވެ. ބަޔާންގައި ސާނޭ ހުރީ ހިތްހަމަ ޖެހިގެން، އުފަލުން ކަމަށް މީޑިއާތަކުގައި ބުނެފައިވާއިރު، ކުރިއަށް އޮތް މަސްދުވަހުގެ ތެރޭގައި ބަޔާނުން އޭނާއާއެކު އައު އެއްބަސްވުމުގެ މަޝްވަރާތައް ފަށާނެ ކަމަށްވެސް ވަނީ ބުނެފައެވެ.

މެންޗެސްޓަރ ސިޓީގައި ހުރުމަށްފަހު ސާނޭ ބަޔާނަށް ބަދަލުވީ 2020 ވަނަ އަހަރުއެވެ. އޭގެ ފަހުން އޭނާ ވަނީ މިހާތަނަށް އެ ކުލަބަށް ކުޅެދިން، 144 މެޗުގައި 45 ލަނޑު ޖަހާފައެވެ. ބަޔާނާއެކު އޭނާ ވަނީ ހަތް ތައްޓެއް ކާމިޔާބުކޮށްފައެވެ. ސާނޭއަކީ ބަޔާންގެ ފުރަތަމަ 11ގައި އެންމެ މުހިންމު އެއް ކުޅުންތެރިޔާއެވެ. ޚާއްސަކޮށް އައު ކޯޗު، ތޯމަސް ޓުޗެލް އެންމެ އިސްކަން ދޭ ކުޅުންތެރިންގެ ތެރޭގައި އޭނާ ހިމެނޭނެއެވެ.