އެނބުރި އަންނައިރު ވަރުގަދަ ވާނެ: ކޮންޓޭ

އަލުން އެނބުރި ކޯޗިންގެ މަސައްކަތަށް އަންނަ އައުން ވަރުގަދަވާނެ ކަމަށް, ތަޖުރިބާކާރު ކޯޗު އެންޓޯނިއޯ ކޮންޓޭ ބުނެފިއެވެ.

އުމުރުން 54 އަހަރުގެ ކޮންޓޭ މިހެން ބުނީ އިޓަލީގެ މީޑިއާއަކަށް ދިން އިންޓަވިޔުއެއްގައެވެ. ކޮންޓޭ އެންމެ ފަހުން ހުރީ އިނގިރޭސި ޕްރިމިއާ ލީގުގެ ޓޮޓެންހަމްގެ ކޯޗުކަމުގަ މަގާމުގައެވެ. އެ މަގާމަށް އޭނާ ހަމަޖެއްސީ 2021 ވަނަ އަހަރުއެވެ. ނަމަވެސް އެ ކުލަބުގެ ނަތީޖާތައް ދަށްވާން ފެށުމާއެކު މިއަހަރު ވަނީ ކޮންޓޭ އަމިއްލައަށް މަގާމުން ވަކިވެފައެވެ. އޭގެ ފަހުން މިހާތަނަށް އައިއިރު، ކޮންޓޭ ހުރީ އެއްވެސް ވަޒީފާއެއްގައެއް ނޫނެވެ. އެހެން ނަމަވެސް ބައެއް ކުލަބުތަކުގެ ހުށަހެޅުން އޭނާއަށް ލިބެމުން އަންނަކަމަށް މީޑިއާތަކުން ބުނެއެވެ.

ކޮންޓޭ ބުނީ އޭނާ އެނބުރި ކޯޗިންގެ މަސައްކަތަށް އަންނައިރު އެހެން އެންމެންނަށް ވެސް ވަރަށް އުނދަގޫވާނެ ކަމަށެވެ. ޚާއްސަކޮށް އޭނާ އަންނަނީ ކޮންމެފަދަ "ހަނގުރާމައެއް" ކުރަންވެސް ތައްޔާރުވެގެން ކަމަށް ކޮންޓޭ ވަނީ ބުނެފައެވެ. އޭނާ ފާހަގަކުރި ގޮތުގައި، ޓޮޓެންހަމްގެ ކޯޗުކަން ދޫކޮށްލުމަށްފަހު އެންމެ ބޮޑު އިސްކަމެއް ދޭން ބޭނުންވީ އާއިލާއަށް ވަގުތު ދިނުމަށް ކަމަށެވެ. އެއީ އަމިއްލަ ނިންމުމެއް ކަމަށްވެސް އޭނާ ވަނީ ބުނެފައެވެ. އެހެން ވިޔަސް، ކޮންމެވެސް އެއް ދުވަހަކުން ޓީމަކާ ހަވާލުވާނެ ކަމަށް އޭނާ ވަނީ ބުނެފައެވެ. ކޮންޓޭ ބުނިގޮތުގައި އޭނާ ހަވާލުވާން ބޭނުންވަނީ ދާދި ފަހުން މޮޅުވި ޓީމަކާއެވެ.

ސިއެނާގެ އެސިސްޓެންޓު ކޯޗެއްގެ ގޮތުގައި 2005 ވަނަ އަހަރު ކޯޗިން ކެރިއަރު ފެށި ކޮންޓޭ ވަނީ ގިނަ ޓީމުތަކަށް އިރުޝާދު ދީފައެވެ. އޭގެ ތެރޭގައި ޔުވެންޓަސް، ޗެލްސީ، އިންޓަ މިލާން އަދި ޓޮޓެންހަމް ހިމެނެއެވެ. މީގެ އިތުރުން އޭނާ ވަނީ އިޓަލީގެ ގައުމީ ޓީމަށް ވެސް އިރުޝާދު ދީފައެވެ.