ކުށް ސާބިތުވާ ވަރަށް ހެކި ނެތުމުން އަހަނދު ސަލާމަތް ވެއްޖެ
އަހަނދުގެ މައްޗަށް އުފުލީ ޓެރަރިޒަމްގެ އަމަލެއް ކުރުމަށް އެހީތެރިވުމުގެ ކުށުގެ ދައުވާ
ލްވާނުގެ މަރާއި ގުޅިގެން ހައްޔަރު ކުރި އަހުމަދު އިސްމާއިލް
ޔާމީން ރަޝީދު މަރާލި މައްސަލައާއި އަހުމަދު ރިޟުވާން އަބްދުﷲ ރަހީނުކޮށް މަރާލިކަމަށް ތުހުމަތުކުރެވޭ މައްސަލައިގައި ދައުވާ އުފުލާފައިވާ އަހުމަދު އިސްމާއިލް (އަހަނދު) ގެ މައްޗަށް ކުށް ސާބިތު ކުރެވޭ ވަރަށް ހެކި ނެތުމުގެ ސަބަބުން އޭނާއާ ދެކޮޅަށް ހުށަހަޅާފައިވާ މައްސަލަ ކްރިމިނަލް ކޯޓުން ބޭރުކޮށްލައިފިއެވެ.
އަހަނދުގެ މައްޗަށް އުފުލީ ޓެރަރިޒަމްގެ އަމަލެއް ކުރުމަށް އެހީތެރިވުމުގެ ކުށުގެ ދައުވާއެވެ. އެއީ ޔާމީން ރަޝީދު މަރާލުމަށް މަގުފަހިކޮށްދިނުމަށް ފާރަލުމުގެ ކަންކަން އިންތިޒާމުކޮށް އެހީތެރިވެފައިވާކަމުގެ ތުހުމަތުގައި އުފުލި ދައުވާއެކެވެ.
ބުރާސްފަތި ދުވަހު މި މައްސަލަ ކޯޓުން ބޭރުކޮށްލާފައިވަނީ ޔާމިނު މަރަން މަގުފަހިކުރުވުމަށް ވަކި އިންތިޒާމުތަކެއް ނުވަތަ އެހީތެރިވުމުގެ ގޮތުން ވަކި ކަންތައްތަކެއް އޭނާ ކުރި ކަމުގެ އެކަށީގެންވާ ހެކި ނެތި ކަމަށް ބަލައިގެންނެވެ. އަދި އޭނާ ކުރި ކަމަށް ބުނާ ބައެއް ކަންކަމާ ގުޅޭ ހެކި ހުރި ނަމަވެސް އެއީ އެހީތެރިވުމުގެ ގޮތުން ނުވަތަ އިންތިޒާމު ކުރުމުގެ ގޮތުން ކުރި ކަމެއް ކަމަށް ބެލެވޭނެ ހެއްކެއް ނެތް ކަމަށް ވެސް ކްރިމިނަލް ކޯޓުން ވަނީ ފާހަގަކޮށްފައެވެ.
ކްރިމިނަލް ކޯޓުން ބުނި ގޮތުގައި, ދައުލަތުން ހުށަހެޅި އިންޓެލިޖެންސް ރިޕޯޓުގައި ބަޔާންކުރާ ކަންކަމުގެ އަލީގައި ކޮންމެވެސް ވަރެއްގެ ހެއްކެއް ލިބުނަސް, މި މައްސަލާގައި ތުހުމަތު ކުރެވޭ މިންވަރަށް ހެކި ލިބެން ވާނެއެވެ. ނަމަވެސް އެ މިންވަރަށް ހެކި ނުލިބޭތީ, ކުށްކުރި ކަމަށް ބެލެވޭ މިންވަރަށްވުރެ ކުށް ނުކުރާކަމަށް ބޮޑަށް ބުރަވެވޭ ކަމަށް އެ ކޯޓުގެ ނިންމުމުގައި ވަނީ ބުނެފައެވެ.
