20 ވަނަ މަޖިލީހުގައި މަދުވެގެން ތިންބައިކުޅަ އެއްބައި މެންބަރުންގެ ގޮތުގައި އަންހެން މެންބަރުން ހޮވަން ބޭނުންވޭ: އިންތިޚާބީ ރައީސް
13 އޮކްޓޯބަރު 2023 | ހުކުރު 10:04ޕީޕީއެމް/ޕީއެންސީގެ ގިނަ ބޭފުޅުންތަކެއް މަޖިލީހުގައި ތިބުން މުހިންމު
އިންތިޚާބީ ރައީސް ޑރ.މުހައްމަދު މުއިއްޒު
20 ވަނަ ރައްޔިތުންގެ މަޖިލީހުގައި މަދުވެގެން ތިންބައިކުޅަ އެއްބައި މެންބަރުންގެ ގޮތުގައި އަންހެން މެންބަރުން ހޮވަން ބޭނުންވާ ކަމަށް އިންތިޚާބީ ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
ސަންގުޓީވީގެ ޚާއްސަ ޕޮގްރާމެއްގައި އިންތިޚާބީ ރައީސް ވިދާޅުވީ ރައްޔިތުންގެ ވިސްނުން ހުރީ ޕީޕިއެމް ޕީއެންސީއާ އެކު ކުރިއަށް ދާން ކަމަށެވެ.
އެގޮތުން ރައްޔިތުން ބޭނުންވާ ކަންކަން ކޮށްދީ ގައުމުގެ ކަންކަން ހަމަ މަގަށް އެޅުވުމަށް މަސައްކަތް ކުރައްވާނެ ކަމަށާއި، ގައުމުގައި ހުރި ބޮޑެތި މައްސަލަތައް ހައްލު ކުރެއްވުމަށް އިސްކަންދެއްވާނެ ކަމަށް އިންތިޚާބީ ރައީސް ވިދާޅުވިއެވެ. މީގެ އިތުރުން ރައްޔިތުންގެ ހުވަފެންތަކުގައި ކުލަޖައްސައި ދިނުމަށް މަސައްކަތް ކުރައްވާނެ ކަމަށާ އިގްތިސާދު ރަނގަޅު ކުރެއްވުމާއިއެކު، ހާރިޖީ ސިޔާސަތު ރަނގަޅުކުރައްވާނެކަން ފާހަގަކުރެއްވިއެވެ.
2024 ވަނަ އަހަރު ބާއްވާ ރައްޔިތުން މަޖިލީހަށް އިޝާރާތް ކުރައްވައި އިންތިޚާބީ ރައީސް ވިދާޅުވީ ޕީޕީއެމް/ޕީއެންސީގެ ގިނަ ބޭފުޅުންތަކެއް މަޖިލީހުގައި ތިއްބެވުން މުހިންމު ކަމަށާއި، ކަންކަން ބާރު ސްޕީޑްގައި ކުރިއަށް ގެންދިއުމުގައި ބޮޑު ކުރިއެރުމެއް ލިބޭނީ ޕީޕީއެމް/ޕީއެންސީއަށް މެޖޯރިޓީ ލިބިގެން ކަމަށެވެ. އަދި އަމާޒަކީ ޕީޕީއެމް/ޕީއެންސީގެ ވީހާ ވެސް ގިނަ މެންބަރުން މަޖިލީހުން ގޮނޑި ކާމިޔާބު ކުރެއްވުން ކަމަށާއި، އެއަމާޒުގައި މަސައްކަތް ކުރައްވާނެ ކަމަށް އިންތިޚާބީ ރައީސް ވިދާޅުވިއެވެ.
މީގެ އިތުރުން އިންތިޚާބީ ރައީސް ވިދާޅުވީ އެންމެ ބޭނުންފުޅުވާ އެއް ކަމަކީ އަންހެން ބޭފުޅުން މެންބަރުންގެ ގޮތުގައި ގިނަ ކުރރެއްވުން ކަމަށެވެ. އެގޮތުން އެންމެ ރަނގަޅު ގޮތަކީ މަދުވެގެން ތިންބައިކުޅަ އެއްބައި މެންބަރުންނަކީ އަންހެން މެންބަރުންނަށް ވުން ކަމަށެވެ. އަދި ތައުލީމީ، ރައްޔިތުން ބަލައިގަންނަ މަޖިލީހަކަށް ހެއްދެވުމަށް މަސައްކަތް ކުރައްވާނެ ކަމަށާއި، އަންހެން ބޭފުޅުން މަޖިލީހަށް ނެރުއްވުމަށް ހިތްވަރު ދެއްވުމާއެކު، މަސައްކަތް ކުރައްވާނެ ކަމަށް ވިދާޅުވިއެވެ.
19 ވަނަ ރައްޔިތުން މަޖިލީހުގައި ތިއްބަވަނީ އަންހެން ހަތަރު މެންބަރުންނެވެ.
އަންނަ އަހަރުގެ މަޖިލިސް އިންތިޚާބަށް ހަ ދާއިރާއެއް އިތުރުކުރުމަށް އިލެކްޝަންސް ކޮމިޝަން (އީސީ)ން ވަނީ ނިންމާފައެވެ. މިއާއެކު މަޖިލީހުގެ ގޮނޑީގެ އަދަދު 93ށް އަރާނެއެވެ. މިހާރު މަޖިލީހުގައި ތިއްބަވަނީ 87 މެމްބަރުންނެވެ.
