އެންމެފަހުން އެއާރޕޯޓްގެ އޭވިއޭޝަން ސެކިއުރިޓީ ކޮމާންޑް ތިޖޫރީވެސް ވަގަށް ނަގައިފި
ތިޖޫރީ ވަގަށް ނަގާފައިވާ ކަމަށް ބެލެވެނީ ބުރާސްފަތި ދުވަހުގެ ރޭ
އެއާރޕޯޓްގައި އައިލެންޑް އޭވިއޭޝަންގެ ފްލައިޓެއް ޖައްސަނީ
ރާއްޖޭގެ އެންމެ ސިއުކިއުރިޓީ ވަރުގަދަކޮށް ހިންގަމުންއަންނަ ރާއްޖޭގެ މައި އިންޓަރނޭޝަނަލް އެއާރޕޯޓް ކަމަށްވާ ވެލާނާ އިންޓަރނޭޝަނަލް އެއާރޕޯޓުގައި ހުންނަ އޭވިއޭޝަން ސެކިއުރިޓީ ކޮމާންޑްގެ ތިޖޫރީ ވަގަށް ނަގައިފި އެވެ.
ފުލުހުންގެ މީޑިއާ އޮފިޝަލް ވަނީ އޭވިއޭޝަން ސެކިއުރިޓީ ކޮމާންޑްގެ ތިޖޫރީ ވަގަށް ނަގާފައިވާކަން "ރާއްޖެއެމްވީ"އަށް ކަށަވަރު ކޮށްދެއްވާފަ އެވެ. މީޑިއާ އޮފިޝަލް ވިދާޅުވީ އޭވިއޭޝަން ސެކިއުރިޓީ ކޮމާންޑްގެ ތިޖޫރީ ވަގަށް ނަގާފައިވާކަން ހުކުރު ދުވަހު ފުލުހުންނަށް ހުށަހަޅާފައިވާ ކަމަށެވެ. ނަމަވެސް މިމައްސަލައިގެ އިތުރު ތަފްސީލެއް ފުލުހުން ހާމައެއް ނުކުރެ އެވެ.
އޭގެ އިތުރުން ފުލުހުންބުނީ އެމައްސަލަ ތަހުގީގު ކުރަމުންދާ ކަމަށާއި މިމައްސަލައާއި ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާކަމަށެވެ.
އެނގިފައިވާ ގޮތުގައި އޭވިއޭޝަން ސެކިއުރިޓީގެ ތިޖޫރީ ވަގަށް ނަގާފައިވާއިރު، އެތިޖޫރީގައި 2 ލައްކަ އަށްވުރެ ގިނަ ރުފިޔާ ހުއްޓެވެ.
އެ ތިޖޫރީ ވަގަށް ނަގާފައިވަނީ ބުރާސްފަތި ދުވަހުގެ ރޭގެ ވަގުތެއްގަ އެވެ.
