ހިތުގެ އާލާސްކަންފުޅެއްގައި އޭޑީކޭ ހޮސްޕިޓަލްގެ އައިސީޔޫގައި ފަރުވާ ހޯއްދަވަމުން ގެންދަވާ ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ރާއްޖޭން ބޭރަށް ގެންދިއުމަށްޓަކައި ސުޕްރީމް ކޯޓްގެ ހުއްދައަކަށް އެދި ހުށަހަޅައިފި އެވެ.

ޖުމްހޫރީ ޕާޓީގެ ސެކްރެޓަރީ ޖެނެރަލް އަހްމަދު ސަމީރު ވިދާޅުވި ގޮތުގައި ގާސިމް ރާއްޖޭން ބޭރަށް ގެންދިއުމުގެ ހުއްދައަށް ކްރިމިނަލް ކޯޓަށް ތަކުރާރުކޮށް ހުށަހެޅި ކަމަށާއި ނަމަވެސް މިހާތަނަށް އެއިން އެއްވެސް ސިޓީއަކަށް ޖަވާބު ލިބިފައި ނުވާ ކަމަށެވެ.

"އެހެންވެ އަޅުގަނޑުމެން ބުދަ ދުވަހު ސުޕްރީމް ކޯޓަށް ސިޓީއެއް ހުށަހެޅިން، ގާސިމް ރާއްޖެއިން ބޭރަށް ގެންދިއުމުގެ ހުއްދައަށް އެދި. އެކަމަކު އަދިވެސް އެއްވެސް ޖަވާބެއް ނުލިބޭ. އުއްމީދަކީ މާދަމާ ސުޕްރީމް ކޯޓުން ޖަވާބެއް ލިބޭނެ ކަމަށް،" ސަމީރު ވިދާޅުވި އެވެ.

ގާސިމުގެ ސިއްހީ ހާލަތަށް ލުޔެއް ނުލިބޭ ކަމަށާއި މިހާރު ވެސް ފަރުވާ ދެމުންދަނީ އައިސީޔޫގައި ކަމަށް ސަމީރު ވިދާޅުވި އެވެ.

"ރާއްޖޭގެ އެތައް ރައްޔިތުންނަކަށް ރާއްޖޭން ބޭރުން ފަރުވާ ދެއްވި ބޭފުޅަކު، ބޭސްފަރުވާ އަށް ރާއްޖޭން ބޭރަށް ވަޑައިގަތުމުގެ ހުއްދަ ސަރުކާރުގެ ނުފޫޒުން ހިފަހައްޓާފައި އޮތުމަކީ ވަރަށް ލަދުވެތިކަމެއް. މިކަމާ ގިނަ ބަޔަކު ކަންބޮޑުވޭ،" ސަމީރު ވިދާޅުވި އެވެ.

ގާސިމް ފުރަތަމަ އެޑްމިޓްކުރީ ޖުލައި 16 ވަނަ ދުވަހު މެޑިކާ ހޮސްޕިޓަލްގަ އެވެ. ގާސިމް ރާއްޖޭން ބޭރަށް ފުރުން ހުއްޓުވީ، ފަރުވާ ހޯއްދެވުމަށް ރާއްޖޭން ބޭރަށް ވަޑައިގަތުމަށް އެއާޕޯޓްގައި ހުންނަވަނިކޮށެވެ. އެހެންވެ، ޖުލައި 16 ވަނަ ދުވަހުގެ ރޭ ގާސިމް އޭޑީކޭ ހޮސްޕިޓަލަށް ބަދަލުކޮށް ފަރުވާ ދޭން ފެށިއެވެ.

ފުރަތަމަ ގާސިމް އެޑްމިޓްކުރީ ނޭވާ ކުރުވެ، މެއަށް އުނދަގޫވެ ހޮޑުލެވޭ ގޮތް ވާން ފެށުމުންނެވެ.