އެންމެ ހަރަކާތްތެރި ހިއުމަން ރައިޓްސް ކްލަބް އަދި ދަރިވަރުގެ އެވޯޑަށް ކުރިމަތިލުމުގެ މުއްދަތު އިތުރުކޮށްފި
13 އޮކްޓޯބަރު 2023 | ހުކުރު 03:4931 އޮކްޓޫބަރު 2023 ނިޔަލަށް އެވޯޑަށް ކުރިމަތިލެވޭނެ
އެޗްއާރްސީއެމުން ބޭއްވި ނޫސްވެރިންގެ ބައްދަލުވުމެއްގެ ތެރެއިން
"އެންމެ ހަރަކާތްތެރި ހިއުމަން ރައިޓްސް ކްލަބް 2022-2023" އެވޯޑް އަދި ''އެންމެ ހަރަކާތްތެރި ހިއުމަން ރައިޓްސް ކްލަބް ދަރިވަރު 2022-2023" އެވޯޑްއަށް ކުރިމަތިލުމުގެ މުއްދަތު އިތުރުކުރުކޮށްފައިވާ ކަމަށް ހިއުމަން ރައިޓްސް ކޮމިޝަން އޮފް މޯލްޑިވްސް އިން ބުނެފިއެވެ.
އެޗްއާރްސީއެމުން ބުނީ އެންމެ ހަރަކާތްތެރި ހިއުމަން ރައިޓްސް ކްލަބް 2022-2023" އެވޯޑް އަދި "އެންމެ ހަރަކާތްތެރި ހިއުމަން ރައިޓްސް ކްލަބް ދަރިވަރު 2022-2023" އެވޯޑްއަށް ކުރިމަތިލުމުގެ މުއްދަތު އިތުރުކޮށްފައިވާ ކަމަށާއި، 31 އޮކްޓޫބަރު 2023 ނިޔަލަށް އެވޯޑަށް ކުރިމަތިލެވޭނެ ކަމަށެވެ.
މިދެ އެވޯޑަށް ކުރިމަތިލުމަށް ފުރަތަމަ އިއުލާންކޮށްފައިވަނީ 5 ސެޕްޓެންބަރު 2023 އިން 5 އޮކްޓޫބަރު 2023 ގެ ނިޔަލަށެވެ.
އެންމެ ހަރަކާތްތެރި ހިއުމަން ރައިޓްސް ކްލަބް 2022-2023 އެވޯޑް އަދި އެންމެ ހަރަކާތްތެރި ހިއުމަން ރައިޓްސް ކްލަބް ދަރިވަރު 2022-2023 އެވޯޑްއަކީ ހިއުމަން ރައިޓްސް ކްލަބްތަކުންނާއި އެ ކްލަބްތަކުގެ ދަރިވަރުން ކުރާ މަސައްކަތުގެ އަގުވަޒަން ކުރުމުގެ ގޮތުން އެޗްއާރްސީއެމުން ދޭ 2 އެވޯޑެއް ކަމަށް އެފަރާތުން ބުނެފައި ވެއެވެ. މި ދެ އެވޯޑް ދެވޭނީ ކޮންމެ ދިރާސީ އަހަރެއްގައި އެވޯޑަށް ކުރިމަތިލާ ފަރާތްތަކުގެ ތެރެއިން އެންމެ މަތިން ޕޮއިންޓް ހާސިލުކޮށްފައިވާ އެންމެ ހަރަކާތްތެރި ހިއުމަން ރައިޓްސް ކްލަބަކަށާއި ހިއުމަން ރައިޓްސް ކްލަބްގެ ދަރިވަރަކަށް ކަމަށް އެޗްއާރްސީއެމުން ބުނެއެވެ.
އެޗްއާރްސީއެމުން ބުނީ މި ދެ އެވޯޑް ދިނުމުގެ މައިގަނޑު މަގުސަދަކީ އިންސާނީ ހައްގުތަކަށް ސްކޫލްތަކުގެ ދަރިވަރުން އަހުލުވެރިކުރުވައި، މުސްތަގުބަލްގައި ހިއުމަން ރައިޓްސް ޑިފެންޑަރުންގެ ގޮތުގައި މަސައްކަތްކުރާނެ ދަރިވަރުންތަކެއް އުފެއްދުން ކަމަށެވެ.
މި އެވޯޑަށް ކުރިމަތިލުމަށް ހުށަހަޅަންޖެހޭ އެޕްލިކޭޝަން ފޯމް، އެވޯޑަށް ހޮވުމުގައި ބަލާނެ މިންގަނޑު، އަދި އިތުރު މައުލޫމާތު އެޗްއާރްސީއެމްގެ ވެބްސައިޓުން ލިބޭނެއެވެ. އެޕްލިކޭޝަން ހުށަހެޅުމަށް advocacy@hrcm.org.mv އަށް ފޯމް އަދި ފޯމާއެކު ހުށަހަޅަންޖެހޭ އިތުރު ލިޔުންތައް އީމެއިލް ކުރުމަށް އެކޮމިޝަނުން އެދިފައިވެއެވެ.
