2025 އެޕްރީލް 23ވަނަ ދުވަހުން ފެށިގެން މާލޭގައި ކުރިއަށްދާ މުޒާހަރާތައް މޮނިޓަރ ކުރުމުގައި އެޗްއާރުސީއެމްގެ މުވައްޒަފުން މުޒާހަރާގެ އޮން-ސައިޓް މޮނިޓަރިންގެ އިތުރަށް މީޑިއާ މޮނިޓަރިންގެ މަސައްކަތް ކުރަމުންދާ ކަމަށް އެކޮމިޝަނުން ބުނެފިއެވެ.

މިއީ މުޒާހަރާތަކުގައި އިންސާނީ ޙައްޤުތައް ޙިމާޔަތްކޮށް ކުރިއެރުވުމަށް ކޮމިޝަންގެ މެންޑޭޓްގެ ދަށުން ކުރާ މަސައްކަތެކެއް ކަމަށް އެޗްއާރުސީއެމް އިން ބުނެއެވެ. މީގެ އިތުރުން، އެ ކޮމިޝަނުގެ އޯވަރސައިޓް މެންޑޭޓްގެ ދަށުން، މި މައްސަލައާ ގުޅިގެން ދިވެހި ފުލުހުންގެ ހިދުމަތުން އަމަލުކުރަމުންދާ ގޮތް ވެސް ކޮމިޝަނުން ބަލަމުންދާކަމަށް ބުނެފައިވެއެވެ.

މި މަސައްކަތްތައް ކުރުމުގައި، އެ ކޮމިޝަނަކީ ތަޢައްސުބުން އެއްކިބާވެފައިވާ ފަރާތަކަށް ވާން ޖެހޭ ކަމަށާއި، އަދި އެފަދައިން އާންމުންނާއި އެންމެހާ ސްޓޭކްހޯލްޑަރުންނަށްވެސް އެނގި ހާމަވާންޖެހޭ ކަމަށް ވެސް އެޗްއާރުސީއެމްއިން ބުނެފައިވެއެވެ.

ދުނިޔޭގެ ނޭޝަނަލް ހިއުމަން ރައިޓްސް އިންސްޓިޓިއުޝަންތަކުން (އެންއެޗްއާރްއައި) އަމަލުކުރާ އުސޫލުތަކުގެ ދަށުން، މިފަދަ މުއައްސަސާތަކުގެ މުވައްޒަފުން މަސްލަހަތު ފުށުއަރާނެފަދަ ހަރަކާތްތަކުގައި ބައިވެރިވުމުން ދުރުހެލިވެ ތިބެންޖެހޭ ކަމަށް ބުނެފައިވެއެވެ. އަދި ހަމައެފަދައިން، އެޗްއާރުސީއެމްގެ މުވައްޒަފުންނަށްވެސް މަސްލަހަތު ފުށުއަރާނެފަދަ ހަރަކާތްތަކުގައި ބައިވެރިވުމުން ދުރުހެލިވުމަށް އިރުޝާދު ދީފައިވާނެ ކަމަށް އެ ކޮމިޝަނުން ވަނީ ބުނެފައެވެ.

އެއީ އަމިއްލަ ހައިސިއްޔަތުން މިފަދަ ހަރަކާތްތަކުގައި ބައިވެރިވުމުން، ކޮމިޝަނުގެ މަސައްކަތުގެ ސައްހަކަމަށް އަސަރުކޮށްފާނެތީ ކަމަށެވެ. އަދި މި ފިޔަވަޅަކީ ކޮމިޝަންގެ ދައުރުގެ ސުލޫކު ހިފެހެއްޓުމަށާއި، ކޮމިޝަންގެ އެންމެހާ މަސައްކަތްތައް ތަޢައްސުބުން އެއްކިބާވެ އަދި ބައިނަލްއަޤްވާމީ މިންގަނޑުތަކާ އެއްގޮތަށް ހުރިކަން ޔަޤީންކުރުމަށް އެޅޭ ފިޔަވަޅެއް ކަމަށް އެޗްއާރުސީއެމްއިން ބުނެއެވެ.