ފަލަސްތީނަށް އަމާންކަމާއި ނަސްރުދެއްވުން އެދި ރާއްޖޭގެ ހުރިހާ މިސްކިތެއްގައި ޤުނޫތު ނާޒިލާ ކިޔަނީ
ރާއްޖޭގައި މީހުން ދިރިއުޅޭ ހުރިހާ ރަށެއްގައި ޤުނޫތު ނާޒިލާ ކިޔުމަށް ވަނީ ހަމަޖެހިފައި
އިސްލާމިކް މިނިސްޓްރީ
ފަލަސްތީނުގައި އަމާންކަން ޤާއިމުވެ، ރައްޔިތުންނަށް ނަސްރު ދެއްވުން އެދި ރާއްޖޭގެ ހުރިހާ މިސްކިތެއްގައި ޤުނޫތު ނާޒިލާ ކިޔުމަށް އިސްލާމިކް މިނިސްޓްރީން އަންގައިފި އެވެ.
މިނިސްޓްރީން އެގޮތަށް އަންގާފައިވަނީ ބުދަ ދުވަހު ނެރުނު ސަރކިއުލާއެއްގައެވެ.
ސަރކިއުލާގައި ބުނެފައިވަނީ، އިޒްރޭލުގެ ޔަހޫދީންގެ ފަރާތުން ފަލަސްތީނުގެ ރައްޔިތުންނަށް ލިބެމުންދާ އަނިޔާތަކާއި ކުރިމަތިވަމުންދާ ލާއިންސާނީ އަމަލުތަކުން ސަލާމަތްކޮށްދެއްވައި އަމާންކަމާއި ކެތްތެރިކަމާއި ރައްކާތެރިކަން އެދި ރާއްޖޭގައި މީހުން ދިރިއުޅޭ ހުރިހާ ރަށެއްގައި ޤުނޫތު ނާޒިލާ ކިޔުމަށް ހަމަޖެހިފައިވާ ކަމަށެވެ.
ވުމާއެކު، އަޑު ހަރުކޮށް ކިޔަވާ ނަމާދުތަކުގެ ފަހު ރަކުއަތުގައި އިއުތިދާލުގައި ޤުނޫތު ނާޒިލާ ކިއުމަށް ހުރިހާ މިސްކިތްތަކުގެ އިމާމުންނަށް އަންގައި މިނިސްޓްރީން ވަނީ ޤުނޫތު ނާޒިލާވެސް ސަރކިއުލަރގައި ހިމަނާފައެވެ.
އިސްރާއީލުން ވަނީ ޣައްޒާއަށް ދެމުންދާ ހަމަލާތައް ވަރުގަދަކޮށް، މުޅި ޣައްޒާ ހިފުމަށް ކުރަމުންދާ މަސައްކަތުގައި، ޣައްޒާ އެއްކޮށް ބަންދުކޮށް ޒަރޫރީ ޚިދުމަތްތައް ފޯރުކޮށްދިނުންވެސް ހުއްޓާލަން އިއުލާނުކޮށްފައެވެ.
2.3 މިލިއަން މީހުންގެ އާބާދީއެއް އޮންނަ ޣައްޒާއަކީ މިވަގުތު ދުނިޔޭގައި އޮތް އެންމެ ބޮޑު ޖަލޭވެސް ބުނެވިދާނެއެވެ. އިސްރާއީލުން ދަނީ މުޅި ޣައްޒާ ބަންދުކޮށް ކޮންޓްރޯލް ކުރަމުންނެވެ. ޣައްޒާގެ ވައިގެ ސަރަހައްދާއި ކަނޑު ކޮންޓްރޯލް ކުރަނީ އިސްރާއީލުންނެވެ. އެއްގަމުން ޣައްޒާގެ ދެ ބޯޑަރެއް ބަންދުކޮށް ކޮންޓްރޯލްކުރަނީ އިސްރާއީލުންނެވެ. ތިންވަނަ ބޯޑަރަކީ މިސްރުގެ އަތްދަށުގައި އޮތް ސަރަހައްދެކެވެ.
