ގޯތި ލިބޭ ސަރަހައްދުތަކުގެ ޗާޓްތައް އާންމުކޮށްފި
4 ޗާޓެއް ވަނީ އާންމުކޮށްފައި
ގޯތި ދިނުމަށް ގުޅިފަޅުން ހިއްކާ ބިން
މާލެ ރައްޔިތުންނަށް ގޯތި ލިބޭ ސަރަހައްދުތަކުގެ ޗާޓްތައް އާންމުކޮށްފިއެވެ.
ޕްލޭނިންގ މިނިސްޓްރީން ބުނީ ރައީސުލްޖުމްހުރިއްޔާ އިބްރާހިމް މުހައްމަދު ޞާލިހުގެ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ރައްޔިތުންނަށް ބަންޑާރަ ގޯތި ދޫކުރުމަށް ހިންގި "ބިންވެރިޔާ" ސްކީމުގެ ދަށުން ހުޅުމާލެ، ގުޅީފަޅު އަދި ގިރާވަރު ފަޅުން ދޫކުރުމަށް ހަމަޖެހިފައިވާ ގޯތިތަށް ހިމެނޭ ޗާޓުތައް ހާމަކޮށްފައިވާނެ ކަމަށެވެ.
4 ޗާޓެއް ވަނީ އާންމުކޮށްފައެވެ. އެއީ ގިރާވަރުގެ ލޭންޑް ޔޫސް ޕްލޭނާއި، ހުޅުމާލެ ފޭސް ދޭއް އަދި ތިނެއްގެ ލޭންޑް ޔޫސް ޕްލޭންގެ އިތުރުން ގުޅިފަޅު ލޭންޑްޔޫސްޕޭލެނެވެ.
މި ލޭންޑް ޔޫސް ޕްލޭންތަކުގެ ތެރެއިން ގިރާވަރު ލޭންޑް ޔޫސް ޕްލޭންގައި 1250 އަކަފޫޓުން ފެށިގެން 2500 އަކަފޫޓާ ހަމައަށް ބިން ދޫކުރާ ސަރަހައްދުތަކާއި، ހައުސިން ޔުނިތްތައް އެޅުމަށް ހަމަޖެހިފައިވާ ސަރަހައްދުތައްވަނީ ފާހަގަކޮށްފައެވެ. މީގެ އިތުރުން އިންސްޓިޓިއުޝަނަލް އަދި ކޮމިއުނިޓީ ޒޯންތަކާއި، ވިޔަފާރިއަށް ހާއްސަ ސަރަހައްދުތަކާއި، ކުޅިވަރުގެ ވަސީލަތްތައް ގާއިމްކުރާ ބިންތަކުގެ އިތުރުން ޔުޓިލިޓީ އަދި މުނިސިޕަލް ހިދުމަތްދޭ ސަރަހައްދުތައް ވަނީ ވަކިކޮށްފައެވެ.
ހުޅުމާލެ ފޭސް 2 ގެ ލޭންޑް ޔޫސް ޕްލޭންގައި ވަނީ 1250 އަކަފޫޓުގެ ބިމުން ފެށިގެން 4000 އަކަފޫޓުގެ ބިންތައް ހިމެނޭ ސަރަހައްދުތައް ފާހަގަކޮށްފައެވެ. ގުޅިފަޅުގެ ލޭންޑް ޔޫސް ޕްލޭންގައި ވެސް 1250 އަކަފޫޓުން ފެށިގެން 3650 އަކަފޫޓާ ހަމައަށް ބިން ދިނުމަށް ހަމަޖެހިފައިވާ ސަރަހައްދުތައް ވަނީ ފާހަގަކޮށްފައެވެ.
ހުޅުމާލެ ފޭސް 3 ގެ ލޭންޑް ޔޫސް ޕްލޭނަށް ބަލާއިރު، އަލަށް ހިއްކާ މި ބިމުގައި ދޫކުރާ ބިންތަކާއި، މިކްސް ރެސިޑެންޝަލް ސަރަހައްދާއި، ވިޔަފާރި، ތައުލީމު އަދި ސިވިކް އެންޑް ކޮމިއުނިޓީ އިންސްޓިޓިއުޝަން ހިމެނޭއިރު، އޮފީސްތަކާއި މިސްކިތްތަކާއި، ކުޅިވަރުގެ ވަސީލަތްތައް ގާއިމްކުރާނެ ބިންތައް ވެސް ވަނީ ފާހަގަކޮށްފައެވެ. މީގެ އިތުރުން މުނިސިޕަލް ހިދުމަތްދޭން ބިންތައް ކަނޑައަޅާފައިވާ އިރު، ސިނާއީ މަސައްކަތަށް ވެސް ބިންވަނީ ހާއްސަކޮށްފައެވެ. އަދި ޕާކިންއާއި، ބަނދަރު އަދި ފެހި ކުރުމަށް ވަކި ސަރަހައްދުތަކެއް ހާއްސަކޮށްފައިވެއެވެ.
