މާލެ ސަރަހައްދަށް ދިމާވި ކަރަންޓުގެ މައްސަލަ ހައްލުކޮށް ގާތްގަނޑަކަށް ގަޑިއިރެއްގެ ފަހުން ކަރަންޓު ދީފި
14 އޯގަސްޓު 2025 | ބުރާސްފަތި 09:19ކަރަންޓު ކެނޑިފައިވަނީ ދިމާވި ޓެކްނިކަލް މައްސަލައަކުން
ސްޓެލްކޯގެ ހެޑް އޮފީސް
މާލެ ސަރަހައްދަށް ދިމާވި ކަރަންޓުގެ މައްސަލަ ހައްލުކޮށް ގާތްގަނޑަކަށް ގަޑިއިރެއްގެފަހުން ކަރަންޓުގެ ޚިދުމަތް ދީފިއެވެ.
ބުރާސްފަތި ދުވަހުގެ މެންދުރު ގާތްގަނޑަކަށް 12:30 ހާއިރު މާލޭގެ ބައެއް ސަރަހައްދުތަކުންނާއި، ހުޅުމާލޭގެ ފޭސް-1 އަދި ފޭސް-2 ސަރަހައްދުތަކުން ވަނީ ކުއްލިއަކަށް ކަރަންޓު ކެނޑިފައެވެ. ގާތްގަނޑަކަށް ގަޑިއިރެއްގައި ފަހުން ކަރަންޓުގެ ޚިދުމަތް ދީފައިވާއިރު، ސްޓެލްކޯއިން ބުނީ، ކަރަންޓު ކެނޑިފައިވަނީ ދިމާވި ޓެކްނިކަލް މައްސަލައަކުން ކަމަށެވެ.
ސްޓެލްކޯއިން ބުނީ، ކަރަންޓުގެ ޚިދުމަތް މެދުކެނޑެން ދިމާވި މައްސަލަ ހައްލުކޮށް، ޚިދުމަތް މެދުކެނޑުނު މާލެއާއި ހުޅުމާލޭގެ ހުރިހާ ސަރަހައްދަކަށް މިހާރު އަލުން ކަރަންޓު ދެވިފައިވާ ކަމަށެވެ. ޚިދުމަތް ނުލިބޭ އެއްވެސް ކަސްޓަމަރެއްވާނަމަ، ސްޓެލްކޯގެ ހޮޓްލައިން 104 އަށް ގުޅުމަށް ވަނީ އެދިފައެވެ. ދިމާވި ދަތިތަކަށް ހުރިހާ ކަސްޓަމަރުންގެ ކިބައިން ސްޓެލްކޯއިން ވަނީ މައާފަށް އެދިފައެވެ.
މިފަހުން މާލެ ސަރަހައްދުން ކަރަންޓު ކެނޑުން ވަނީ އާއްމުވެފައެވެ.
މިމަހުގެ 9 ވީ ހޮނިހިރު ދުވަހު ހެނދުނު މާލެ ސަރަހައްދުން ވަނީ ކަރަންޓު ކެނޑިފައެވެ. އެދުވަހު ވެސް ކަރަންޓުގެ ޚިދުމަތް ލިބިފައިވަނީ ގާތްގަނޑަކަށް 2 ގަޑިއިރު ފަހުންނެވެ.
މީގެ އިތުރުން 1 ޖޫން 2025 ގައި މުޅި މާލެސިޓީން ކަރަންޓު ކެނޑުނު މައްސަލަ ބެލުމަށް ރައީސް ޑރ.މުހައްމަދު މުއިއްޒު ވަނީ އަންގަވާފައެވެ.
މި ތަހުގީގާ ގުޅިގެން އެންމެފަހުން ފުލުހުން ބުނެފައިވަނީ މާލެ ސަރަހައްދުން ކަރަންޓް ކެނޑުނު މައްސަލައާ ގުޅިގެން ފުލުހުން ކުރަމުންދާ ތަހުގީގުގެ އިބްތިދާއީ ހޯދުންތަކާއި މައުލޫމާތު އެއްކުރެވިފައިވާ ކަމަށާއި، މި މައުލޫމާތައް ބަލައި މި މައްސަލަ އިތުރަށް ތަހުގީގު ކުރަމުންދާ ކަމަށެވެ.
