މާލެއާއި ހުޅުމާލޭގެ ބައެއް ސަރަހައްދުތަކުން ކަރަންޓު ކެނޑިއްޖެ
ހުޅުމާލޭގެ ފޭސް-1 އަދި ފޭސް-2 ގެ ބައެއް ސަރަހައްދުތަކުން ވަނީ ކަރަންޓު ކެނޑިފައި
މާލެސިޓީ
މާލެއާއި ހުޅުމާލޭގެ ބައެއް ސަރަހައްދުތަކުން ކަރަންޓު ކެނޑިއްޖެއެވެ.
މައުލޫމާތު ލިބިފައިވާ ގޮތުގައި ކަރަންޓު ކެނޑިފައިވަނީ ބުރާސްފަތި ދުވަހުގެ މެންދުރު 12:30 ހާއިރުއެވެ. މާލޭގެ ބައެއް ސަރަހައްދުތަކުން ކަރަންޓު ކެނޑިފައިވާއިރު، ހުޅުމާލޭގެ ފޭސް-1 އަދި ފޭސް-2 އަކުން ވަނީ ކަރަންޓު ކެނޑިފައެވެ.
މިމައްސަލައާ ގުޅިގެން ސްޓެލްކޯއިން ބުނީ ދިމާވި ޓެކްނިކަލް މައްސަލައަކާއި ގުޅިގެން މާލެއާއި ހުޅުމާލޭގެ ބައެއް ސަރަހައްދުތަކުން ކަރަންޓުގެ ހިދުމަތް މެދުކެނޑިފައިވާ ކަމަށެވެ. އަދި މައްސަލަ ހައްލުކޮށް އަލުން ކަރަންޓު ދިނުމުގެ މަސައްކަތްތައް ކުރަމުންދާ ކަމަށް ސްޓެލްކޯއިން ބުނެއެވެ.
ބުރާސްފަތި ދުވަހު ކުއްލިއަކަށް މާލެއާއި ހުޅުމާލޭގެ ބައެއް ސަރަހައްދުތަކުން ކަރަންޓު ކެނޑިފައިވާއިރު، މިމަހުގެ 9 ވީ ހޮނިހިރު ދުވަހު ހެނދުނު މާލެ ސަރަހައްދުން ވަނީ ކަރަންޓު ކެނޑިފައެވެ. އެދުވަހު ވެސް ކަރަންޓުގެ ޚިދުމަތް ލިބިފައިވަނީ ގާތްގަނޑަކަށް 2 ގަޑިއިރު ފަހުންނެވެ.
މީގެ އިތުރުން 1 ޖޫން 2025 ގައި މުޅި މާލެސިޓީން ކަރަންޓު ކެނޑުނު މައްސަލަ ބެލުމަށް ރައީސް ޑރ.މުހައްމަދު މުއިއްޒު ވަނީ އަންގަވާފައެވެ.
މި ތަހުގީގާ ގުޅިގެން އެންމެފަހުން ފުލުހުން ބުނެފައިވަނީ މާލެ ސަރަހައްދުން ކަރަންޓް ކެނޑުނު މައްސަލައާ ގުޅިގެން ފުލުހުން ކުރަމުންދާ ތަހުގީގުގެ އިބްތިދާއީ ހޯދުންތަކާއި މައުލޫމާތު އެއްކުރެވިފައިވާ ކަމަށާއި، މި މައުލޫމާތައް ބަލައި މި މައްސަލަ އިތުރަށް ތަހުގީގު ކުރަމުންދާ ކަމަށެވެ.
