ހުސްވެފައިވާ ސެވިއްޔާގެ ކޯޗުކަމުގެ މަގާމަށް އުރުގުއޭގެ ޤައުމީ ޓީމުގެ ކުރީގެ ކޯޗު ޑިއޭގޯ އަލޮންސޯ ހަމަޖައްސައިފި އެވެ.

ސެވިއްޔާގެ ކޯޗުކަމުގެ މަގާމު ހުސްވީ އެ މަގާމުގައި ހުރި ހޯސޭ ލުއިސް މެންޑިލިބާ މަގާމުން ވަކިކުރުމާއެކު އެވެ. އޭނާ މަގާމުން ވަކިކޮށްފައި ވަނީ އެ ކުލަބުގެ ނަތީޖާތައް އިންތިހާ އަށް ދަށްވުމުންނެވެ. ސެވިއްޔާގެ ކޯޗުކަމުގެ މަގާމަށް އުމުރުން 48 އަހަރުގެ އަލޮންސޯ ހަމަޖެއްސީ މިހާރު ކުރިއަށްދާ ސީޒަންގެ ނިޔަލަށެވެ. ސެވިއްޔާ އިން މިހާރު ވަނީ އެކަން ރަސްމީކޮށް އިއުލާންކޮށްފަ އެވެ.

އަލޮންސޯ އެންމެ ފަހުން ހުރީ އުރުގުއޭ ޤައުމީ ޓީމުގެ ކޯޗުކަމުގެ މަގާމުގަ އެވެ. އެ މަގާމަށް އޭނާ ހަމަޖެއްސީ 2021 ވަނަ އަހަރު އެވެ. އޭގެ ފަހުން އަލޮންސޯ އެ މަގާމުން އިސްތިއުފާ ދިނީ މިދިޔަ އަހަރު ޤަތަރުގައި ނިމުނު ފީފާ ވޯލްޑް ކަޕް ފުޓުބޯޅަ މުބާރާތަށް ފަހު އެވެ. އެ މުބާރާތުން އުރުގުއޭ ކެޓުމާއެކު، މިއަހަރުގެ ފެބްރުވަރީ މަހު އޭނާ ވަނީ މަގާމުން އަމިއްލަ އަށް އިސްތިއުފާ ދީފަ އެވެ. އެއަށްފަހު އަލޮންސޯ ދިން އިންޓަވިޔުއެއްގައި އޭނާ ބުނީ، މިހާރު ދެން ބޭނުންވަނީ ކުލަބަކާ ހަވާލުވެ މަސައްކަތް ކުރަން ކަމަށެވެ.

އަލޮންސޯގެ އިރުޝާދުގެ ދަށުން ސެވިއްޔާ އިން ކުޅޭނެ ފުރަތަމަ މެޗަކީ އޮކްޓޫބަރު މަހުގެ 21 ވަނަ ދުވަހު ރެއާލް މެޑްރިޑާ ދެކޮޅަށް ކުޅޭ މެޗެވެ.