ސެވިއްޔާގެ ކޯޗުކަމުން މެންޑިލިބާ ވަކިކޮށްފި

ސްޕެނިޝް ލީގުގެ ސެވިއްޔާގެ ކޯޗު ކަމުން ހޯސޭ ލުއިސް މެންޑިލިބާ ވަކިކޮށްފި އެވެ.

އުމުރުން 62 އަހަރުގެ މެންޑަލިބާ ސެވިއްޔާގެ ކޯޗުަކަމުން ވަކިކޮށްފައި ވަނީ މި ސީޒަންގައި އެ ޓީމުގެ ނަތީޖާތައް ދަށްވުމުންނެވެ. ސެވިއްޔާގެ ކޯޗުކަމާ އޭނާ ހަވާލުވީ މިއަހަރުގެ މާޗު މަހުގެ ތެރޭގަ އެވެ. އެއީ އޭރު ކޯޗަކަަށް ހުރި އާޖެންޓީނާގެ ޖޯޖް ސަމްޕައޯލީ މަގާމުން ވަކި ކުރުމަށްފަހު އެވެ. ސެވިއްޔާގެ ކޯޗުކަމާ ހަވާލުވެ އޭނާ ވަނީ އެ ޓީމަށް ޔޫރޮޕާ ލީގު ކާމިޔާބުކޮށްދީފަ އެވެ. އެއާއެކު ސެވިއްޔާ އިން ވަނީ ރެކޯޑު އަދަދެއް ކަމަށްވާ، ހަތް ފަހަރަށް ޔޫރޮޕާ ލީގު ކާމިޔާބުކޮށްފަ އެވެ. އޭގެ ފަސް މަސް ދުވަސް ފަހުން ސެވިއްޔާ އިން މެންޑަލިބާ ވަކި ކުރީ ސްޕެނިޝް ލީގުގައި އެ ޓީމުގެ އަމިއްލަ ދަނޑުގައި ރަޔޯ ވަޔެކާނޯއާ ދެކޮޅަށް ކުޅެ، އެއްވަރުވި މެޗަށްފަހު އެވެ.

ކޯޗުކަމުގެ މަގާމުން މެންޑަލިބާ ވަކިކުރުމަށްފަހު، ސެވިއްޔާ އިން އަންނަނީ އައު ކޯޗެއް ހޯދުމުގެ މަސައްކަތް ކުރަމުންނެވެ. މެންޑަލިބާގެ އިރުޝާދުގެ ދަށުން ސެވިއްޔާ އިން ވަނީ ޖުމުލަ 28 މެޗު ކުޅެފަ އެވެ. އޭގެ ތެރެއިން އެ ޓީމު ވަނީ 10 މެޗުން މޮޅުވެ، ހަތް މެޗުން ބަލިވެފަ އެވެ. 11 މެޗެއް ނިމުނީ އެއްވަރުވެގެންނެވެ. މިވަގުތު ސެވިއްޔާ އޮތީ ސްޕެނިޝް ލީގު ތާވަލްގެ 14 ވަނައިގަ އެވެ. މި ސީޒަންގެ ލީގުގައި ކުޅުނު އަށް މެޗުން އެ ޓީމު މޮޅުވެފައި ވަނީ އެންމެ ދެ މެޗުންނެވެ. ދެ މެޗު އެއްވަރުވެފައިވާއިރު، ހަތަރު މެޗުން ވަނީ ބަލިވެފަ އެވެ.