ތޫނު އެއްޗަކުން ހަމަލާދީ ވ. ކެޔޮދޫ ދޭލިއާގޭ، މޫސާ އަހުމަދު މަރާލި މައްސަލައިގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ކްރިމިނަލް ކޯޓުގައި މި މައްސަލަ ބައްލަވަމުން ގެންދެވީ ގާޒީ ޙަސަން ސައީދެވެ. ނަމަވެސް ގާޒީ ޙަސަން ސައީދު ރިޓަޔަރ ކުރައްވާފައިވާތީ މިހާރު މި މައްސަލައިގެގަޒިއްޔާތައްބައްލަވަމުން ގެންދަވަނީ އެ ކޯޓުގެ ދެ ސެކްޝަނަކުންނެވެ.
އޭގެ ތެރެއިން ބުދަ ދުވަހު ކުރިއަށް ގެންގޮސްފައިވަނީ މި މައްސަލައިގައި ދައުލަތުން ދައުވާކޮށްފައިވާ މާމިގިލީ ސޭޑީގްރޯވް، އިބްރާހިމް ސައްމާހު އަހުމަދު ފަތުހީގެ މައްޗަށް ކުރާ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާގެ ބައެވެ.
އެ ދައުވާގައި ބުދަ ދުވަހު އޮތީ ދައުލަތުގެ ސިއްރު ހެކިންގެ ހެކިބަސް ނެގުމެވެ.
ފުރަތަމަ ހާޒިރުކުރި ހެކިވެރިޔާ ވިދާޅުވީ، ސައްމާހު ފިލައިގެން ދަނިކޮށް އޭނާ ހައްޔަރުކުރުމުގައި އެ ހެކިވެރިޔާ ބައިވެރިވެފައިވާނެކަމަށެވެ. އެގޮތުން މޫސަ މަރާލި ޙާދިސާ ހިނގިތާ ތިން ހަތަރު ދުވަހުގެ ތެރޭގައި ސައްމާހު ހައްޔަރު ކުރުމުގެ އޮޕަރޭޝަން ހިންގިފައިވާކަމަށް އޭނާ ވިދާޅުވިއެވެ.
ހެކިވެރިޔާ ވިދާޅުވީ، މާފަންނުގައި ހުރި ގެއެއްގެ ކުޑަދޮރުން މި ޙާދިސާގައި ތުހުމަތު ކުރެވޭ ފަރާތްތައް ފުންމާލުމުން، އެމީހުން ފަހަތުން ގޮސް ހައްޔަރުކުރިއިރު، ސައްމާހު ހައްޔަރު ކުރުމުގައި އަމަލީ ގޮތުން އެ ހެކިވެރިޔާ ބައިވެރިވެފައިވާނެކަމަށެވެ.
ދެން އޮންނަ އަޑުއެހުމެއްގައިވެސް އޮންނާނީ ދައުލަތުގެ ސިއްރު ހެއްކެއްގެ ހެކިބަސް ނެގުމެވެ. އެއީ މީގެ ކުރިން ނަގާފައިވާ ހެކިބަހެއްނަމަވެސް، ކޯޓުގެ އިހުމާލަކުން އެ ހެކިވެރިޔާގެ ރެކޯޑިންގ ގެއްލިފައިވާތީ އަލުން ހެކިބަސް ނެގުމަށް މިހާރު މި މައްސަލައާ ޙަވާލުވެ ހުންނެވި ގާޒީ އިބްރާހިމް އިޙްސާން ނިންމެވީއެވެ.
އެއަށްފަހު ދެން އޮންނާނީ ދިފާއީ ހެކިންގެ ހެކިބަސް ނެގުމެވެ.
މިއީ ގިނަ ދުވަސްތަކެއްވެފައިވާ މައްސަލައެއްކަމަށްވާތީ ދިފާއުން ވަނީ މި މައްސަލަ ވީހާވެސް އަވަހަށް ކުރިއަށް ގެންދިއުމަށް އެދިފައެވެ.
ސައްމާހުގެ މައްޗަށް ދައުވާ ކުރާ ގަސްތުމަރުގެ މައްސަލައަކީ ކުރިން ކްރިމިނަލް ކޯޓަށް ހުށައެޅި، ފަހުން ސުޕްރީމް ކޯޓުގެ ނިންމުމާއެކު އަލުން އެ ކޯޓަށް ހުށައެޅުނު މައްސަލައެކެވެ. އެގޮތުން މި މައްސަލަ ނުބެލޭނެ ކަމަށް ކްރިމިނަލް ކޯޓުންނާއި ހައި ކޯޓުން ނިންމާފައި ވަނިކޮށް މައްސަލަ އަލުން ބަލަން ސުޕްރީމް ކޯޓުން އެންގީއެވެ.
މި މައްސަލައާ ގުޅިގެން މީގެ އިތުރުންވެސް މަގްބޫލު ސަބަބެއް ނެތި އާންމު ތަނެއްގައި ތޫނު އެއްޗެއް ގެންގުޅުމުގެ ދައުވާއެއް އިބްރާހީމް ސައްމާހު އަހުމަދު ފަތުހީއާއި، ސ. ހިތަދޫ ގުލްބަކާގޭ، މުހައްމަދު ނާޝިޒް ނާޒިމްގެ މައްޗަށް ވަނީ ކޮށްފަ އެވެ. އެ މައްސަލަވެސް ކުރިއަށް ގެންދަވަނީ ގާޒީ އިބްރާހިމް އިޙްސާންއެވެ. އެ މައްސަލައިގައި ދެން އޮންނާނީ ޙުކުމް ކުރުމެވެ.
