ރާއްޖެ އަށް މެޗު ފަސޭހައެއް ނުވާނެ: ބަނގްލަދޭޝް ކެޕްޓަން

ވޯލްޑްކަޕް ކޮލިފައިންގައި ބުރާސްފަތި ދުވަހު ރާއްޖެއާ ދެކޮޅަށް ކުޅޭ މެޗު ވަރަށް އުނދަގޫވާނެ ކަމަށް ބަނގްލަދޭޝްގެ ކެޕްޓާން ޖަމާލް ބުއިއަން ބުނެފި އެވެ.

އޭނާ މިހެން ބުނީ ރާއްޖެ އައުމަށް ފުރުމުގެ ކުރިން ބަނގްލަދޭޝްގެ ނޫސްވެރިންނާ ވާހަކަ ދައްކަމުންނެވެ. ޖަމާލް ބުނީ ގަލޮޅު ދަނޑުގައި ކުޅުނަސް ރާއްޖެ އަށް މެޗު ފަސޭހަނުވާނެ ކަމަށެވެ.

މި މެޗުގެ ކުރިން ބަނގަލްދޭޝްގެ މުހިންމު ތިން ކުޅުންތެރިއަކު ވަނީ ސަސްޕެންޑްކޮށްފަ އެވެ. އެއީ އޭއެފްސީ ކަޕް މެޗަށް ފަހު ރާއްޖެއިން ފުރައިގެން އެނބުރި ގައުމަށް ދިޔައިރު ރާއްޖެއިން ބަނގުރާ އެތެރެކުރި މައްސަލައިގަ އެވެ.

ކޯޗު ހާވިއާ ކަބަރޭރާ ބުނީ ސަސްޕެންޑްކުރީ ފުރަތަމަ 11ގެ މުހިންމު ތިން ކުޅުންތެރިން ކަމަށާއި މިވަގުތު ޓީމު އޮތީ އުނދަގޫ ހާލަތެއްގައި ކަމަށެވެ.

އޭނާ ބުނީ ރާއްޖެ އާއި ބަނގްލަދޭޝް މިދިޔަ ހަތަރު އަހަރު، ހަތަރު ފަހަރެއްގެ މަތީން ވާދަކޮށްފައިވުމުން އެއްބަޔަކު އަނެއްބަޔަކަށް ވަރަށް ރަނގަޅަށް އެނގޭ ކަމަށެވެ. މިހެންވެ ވާދަވެރިކަން ބޮޑުވާނެ ކަމަށް ބުނެފައި ވެއެވެ.