ޓިމޯ ލެސްޓޭ އަތުން ރާއްޖެ ބަލިވެއްޖެ

އޭޝިއަން ކަޕް ކޮލިފިކޭޝަންގައި ޓިމޯ ލެސްޓޭއާ ދެކޮޅަށް ކުޅުނު މެޗުން ދިވެހި ރާއްޖޭގެ ޤައުމީ ފުޓުބޯޅަ ޓީމު ބަލިވެއްޖެ އެވެ.

އޮސްޓްރޭލިއާގައި އަންގާރަ ދުވަހުގެ މެންދުރު ކުޅުނު މެޗު ޓިމޯ ލެސްޓޭ އިން ކާމިޔާބު ކުރީ 1-0 އިންނެވެ. މެޗުގައި ޓިމޯ ލެސްޓޭ އިން ލަނޑު ޖެހީ ވެސް މެޗުގެ ފުރަތަމަ ހާފުގަ އެވެ. މެޗުގައި ރާއްޖެ އަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ.

މެޗުގެ ފުރަތަމަ ހާފުގައި ރާއްޖެ އަށް ލަނޑު ޖަހަން އެންމެ އެކަށީގެންވާ ފުރުސަތެއް ލިބުނީ އަލީ ފާޞިރު (ސެންޓޭ) އަށެވެ. ޓިމޯ ލެސްޓޭގެ އޭރިޔާ ތެރެއިން ސެންޓޭ ފޮނުވާލި ބޯޅަ އަމާޒުވީ ގޯލު ހުރަސް ދަނޑިއާ އެވެ.

މެޗުގެ ފުރަތަމަ ހާފު ނިމުމުގެ ކުރިން ޓިމޯ ލެސްޓޭ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޖޮއާއޯ ޑަ ސިލްވާ އެވެ. އޭނާ އެ ލަނޑު ޖެހީ ޓިމޯ ލެސްޓޭގެ ޕައޮލޯ ޑޮމިންގޭސް ފްރެއިޓާސް ތަނަވަސްކޮށްދިން ފުރުސަތެއްގަ އެވެ.

މެޗުގެ ދެ ވަނަ ހާފުގައި ޓިމޯ ލެސްޓޭ އިން ލީޑު ފުޅާ ކުރުމަށް މަސައްކަތް ކުރިއިރު، ރާއްޖެ އިން ވަނީ ނަތީޖާ ހަމަހަމަ ކުރުމަށް ވެސް މަސައްކަތް ކޮށްފަ އެވެ.

އޭޝިއަން ކަޕް ކޮލިފިކޭޝަންގައި ރާއްޖޭގެ ފުރަތަމަ މެޗުގައި ވަނީ ފިލިޕީންސް އަތުން 4-1 އިން ބަލިވެފަ އެވެ. ދެ ވަނަ މެޗުގައި ޓިމޯ ލެސްޓޭ އަތުން ބަލިވެފައިވާއިރު، އޭޝިއަން ކަޕް ކޮލިފިކޭޝަންގެ ތިން ވަނަ މެޗުގައި ތަޖަކިސްތާނާ ދެކޮޅަށް ރާއްޖެ ނިކުންނާނީ އޮކްޓޫބަރު މަހުގެ ނުވަ ވަނަ ދުވަހު އެވެ. އޮކްޓޫބަރު މަހުގެ 14 ވަނަ ދުވަހު ދެ ވަނަ ލެގުގައި ތަޖަކިސްތާނާ ދެކޮޅަށް ކުޅޭނެ އެވެ.

އޭގެ ފަހުން ނޮވެމްބަރު މަހުގެ 18 ވަނަ ދުވަހު ދެ ވަނަ ލެގުގައި ފިލިޕީންސްއާ ދެކޮޅަށް ކުޅުމަށްފަހު، ފަހު މެޗުގައި ޓިމޯ ލެސްޓޭއާ ދެކޮޅަށް ކުޅޭ ދެ ވަނަ ލެގު އޮތީ އަންނަ އަހަރުގެ މާޗު މަހުގެ 31 ވަނަ ދުވަހު އެވެ.