ކައްކާ ކާއެތިކޮޅުވެސް ދެނީ ބިދޭސީއެއް، ދިވެހި އަންހެނުން ތިބެނީ ގޭގައި ކަސޯޓީ ބަލަން: ސަރުކާރު މެމްބަރު ޝަރީފް
މިއަދު ހުރިހާ އިންޑަސްޓްރީއެއްގައި ބިދޭސީން އަތްގަދަ ކޮށްފައިވާ ކަމަށް ވިދާޅުވި
ހުޅުމާލޭ އުތުރު ދާއިރާގެ ޕީއެންސީ މެމްބަރު ހުސައިން ޝަރީފު
މިއަދު ގޭގައި ކައްކާ ކާއެތިކޮޅުވެސް ދެނީ ބިދޭސީއެއް ކަމަށާއި، އަންހެނުން ތިބެނީ ގޭގައި ކަސޯޓީ ބަލަންކަމަށް ހުޅުމާލޭ އުތުރު ދާއިރާގެ ޕީއެންސީ މެމްބަރު ހުސައިން ޝަރީފު ވިދާޅުވެއްޖެއެވެ.
އޭނާ އެހެން ވިދާޅުވީ ވަޒީފާއާ ބެހޭ ޤާނޫނަށް އިސްލާޙު ހުށަހެޅުމުގެ ބިލަށް ވާހަކަ ދައްކަވަމުންނެވެ.
މެމްބަރު ޝަރީފު ވިދާޅުވީ، މިއަދު ހުރިހާ އިންޑަސްޓްރީއެއްގައި ބިދޭސީން އަތްގަދަ ކޮށްފައިވާ ކަމަށާއި، އޭގެ ތެރޭގައި މަސްވެރިކަމާއި، ވިޔަފާރިއާއި، ކެފޭތައް ހިމެނޭކަމަށެވެ.
އަދި މިއަދު ގޭގައި ކެއްކުމަށްވެސް އުޅެނީ ބިދޭސީންކަން ފާހަގަ ކުރައްވައި މެމްބަރު ވަނީ ދިވެހި އަންހެނުން މިއަދު ތިބެނީ މަސައްކަތެއް ނުކޮށް، "ކަސޯޓީ" ބަލަންކަމަށް ވިދާޅުވެ ވާހަކަ ދައްކަވާފައެވެ.
މެމްބަރުގެ އެ ވާހަކަފުޅާއި ގުޅިގެން ގިނަ ބައެއްގެ ފާޑުކިޔުން ދަނީ އަމާޒުވަމުންނެވެ.
ވަޒީފާއާ ބެހޭ ޤާނޫނަށް އިސްލާހު ގެނައުމުގެ ބިލަށް ބަހުސް ކުރެއްވި ވަރަށް ގިނަ މެމްބަރުން ވަނީ ބަންގްލަދޭޝުން އެއް ލައްކަ މީހުން ގެނެވޭ ގޮތަށް ހަދާފައި އޮތް އޮތުން ނިމުމަކަށް ގެނެސް، އެ ލިމިޓު އުވާލެއްވުމަށްވެސް ގޮވާލައްވާފައެވެ.
