ރާއްޖޭގެ ސީނިއާ ޤައުމީ ފުޓުބޯޅަ ޓީމުގެ ފަރިތަކުރުންތައް ފަށައިފި އެވެ.

ހުކުރު ދުވަހުގެ ހަވީރު ގަލޮޅު ރަސްމީ ދަނޑުގައި ޤައުމީ ޓީމުގެ ފަރިތަކުރުންތައް ފަށާފައި ވަނީ، ޤައުމީ ޓީމުން ކުރިއަށް ކުޅެން އޮތް ދެ މެޗަށެވެ.

ޤައުމީ ޓީމުން މިހާރު ތައްޔާރުވަމުން އަންނަނީ އޭޝިއަން ކަޕް ކޮލިފިކޭޝަންގައި ޓިމޯ ލެސްޓޭއާ ދެކޮޅަށް ކުޅުމަަށެވެ. އޭގެ ކުރިން، އެ މެޗަށް ތައްޔާރުވުމުގެ ގޮތުން ޤައުމީ ޓީމުން ސިންގަޕޫރާ ދެކޮޅަށް ބައިނަލްއަޤުވާމީ ރަޙުމަތްތެރި ކަމުގެ މެޗެއް ވެސް ކުޅޭނެ އެވެ.

ޤައުމީ ޓީމުގެ އަލީ ސުޒޭންގެ އިރުޝާދުގެ ދަށުން ޤައުމީ ޓީމުގެ ފަރިތަކުރުންތައް ފަށާފައިވާއިރު، އޭޝިއަން ކަޕް ކޮލިފިކޭޝަންގައި ފިލިޕީންސްއާ ދެކޮޅަށް ކުޅުނު މެޗާއި، އޭގެ ކުރިން ބައިނަލްއަޤުވާމީ ރަޙުމަތްތެރި ކަމުގައި އިންޑިއާއާ ދެކޮޅަށް ކުޅުނު މެޗުގައި ވެސް ޓީމަށް އިރުޝާދު ދިނީ ސުޒޭން އެވެ.

އެފްއޭއެމް އިން ވަނީ ޤައުމީ ޓީމަށް ކޯޗަކު ހޯދުމަށް މި ފަހުން އިއުލާން ވެސް ކޮށްފަ އެވެ. ނަމަވެސް، ޖޫން މަހު ބާއްވަން ހަމަޖެހިފައި އޮތް ސާފް ޗެމްޕިއަންޝިޕް ފަސް ކުރުމުން، އެފްއޭއެމް އިން ވަނީ ޤައުމީ ޓީމަށް ކޯޗަކު ހޯދުމުގެ މަސައްކަތް މަޑު ޖައްސާލައިފަ އެވެ. އަދި މިވަގުތު ސުޒޭންއާ ޓީމު ހަވާލު ކޮށްގެން ކުރިއަށް ދާން ވަނީ ނިންމައިފަ އެވެ.

ޤައުމީ ޓީމުގެ ފަރިތަކުރުންތައް ފަށާފައިވާއިރު، ކުރިއަށް އޮތް ދެ މެޗަށް އެކުލަވާލި ސްކޮޑުގައި އެންމެ ގިނައީ މާޒިޔާ ސްޕޯޓްްސް އެންޑް ރެކްރިއޭޝަންގެ ކުޅުންތެރިންނެވެ. އެ ޓީމުގެ 13 ކުޅުންތެރިން ހިމެނޭއިރު، އޮޑި ސްޕޯޓްސް ކުލަބުގެ ފަސް ކުޅުންތެރިން ހިމެނެ އެވެ.

މީގެ އިތުރުން ބުރު ސްޕޯޓްސް ކުލަބުގެ ދެ ކުޅުންތެރިންނާއި، ވިކްޓްރީ ސްޕޯޓްސް ކުލަބުގެ އެއް ކުޅުންތެރިޔަކު، ކުލަބު އީގަލްސްގެ އެއް ކުޅުންތެރިޔަކު އަދި ޓީސީ ސްޕޯޓްސް ކުލަބުގެ އެއް ކުޅުންތެރިޔަކު ހިމެނެ އެވެ.

އޭޝިއަން ކަޕް ކޮލިިފިކޭޝަންގައި ރާއްޖެ އިން ޓިމޯ ލެސްޓޭއާ ދެކޮޅަށް ކުޅޭނީ ޖޫން މަހުގެ 10 ވަނަ ދުވަހު އެވެ. އޭގެ ކުރިން ބައިނަލްއަޤުވާމީ ރަޙުމަތްތެރިކަމުގައި ސިންގަޕޫރާ ދެކޮޅަށް ރާއްޖެ އިން ކުޅޭނީ ޖޫން މަހުގެ ފަސް ވަނަ ދުވަހު އެވެ.