އިހު ޒަމާނުގައި މަރުވާ މީހުންގެ ހަށިގަނޑުން ހުރިހާ ތެތްކަމެއް ނެރެ، ގިނަ ދުވަސްތަކެއް ވަންދެން ހަށިގަނޑު ކުނި ނުވާ ގޮތަށް ޤަބުރު ތައްޔާރުކޮށް އުޅުމަކީ އާންމު ކަމެކެވެ. ޤަދީމީ މިޞްރަށް ޚާއްޞަ ޤައުމެކެވެ. ނަމަވެސް މި ފަހަރު ދަންނަވަން މިއުޅެނީ މިޞްރުގެ މަމީއެއްގެ ވާހަކައެއް ނޫނެވެ. މިއީ އެމެރިކާގައި ހިނގި ހާދިޘާއެކެވެ.
ޕެންސިލްވޭނިއާގައި ޖަނާޒާތައް ކުރިއަށް ގެންދަން ޚާއްޞަކޮށްފައި ވާ ގެއެއްގެ ޑިސްޕްލޭގައި އެ ޤަބުރު އޮންނަތާ މިހާރު 128 އަހަރުވެދާނެ ކަމަށް މަޢުލޫމާތު ލިބެއެވެ. ނަމަވެސް، އެއީ ކާކުގެ ހަށިގަނޑެއްކަން ދަނެގަތުމަށް ފަހު، އޮކްޓޯބަރު 7 ވަނަ ދުވަހު، އެ ހަށިގަނޑު މިހާރު ވަނީ ވަޅުލާފައެވެ. އެތައް ޒަމާނެއް ވާ އިރުވެސް ޤަބުރު ކުނި ނުވާ ގޮތަށް މަމިފައި ކޮށްފައި އޮތީ ޖޭމްސް މަރފީ ނަމަކަށް ކިއާ މީހެއްގެ ހަށިގަނޑެވެ. މަރފީގެ ހަށިގަނޑު މަމިފައި ކުރެވިފައި އޮތީ އެކްސިޑެންޓަކުން ކަމަށްވެސް ޚަބަރު ލިބެއެވެ. އާންމުންގެ ތެރޭގައި މަރފީގެ ޤަބުރު މަޝްހޫރު ވެފައި ވަނީ 'ސްޓޯންމޭން ވިލީ'ގެ ނަމުންނެވެ.
މަރފީ މަރުވީ މިލާދީން 1895 ވަނަ އަހަރުގެ ނޮވެމްބަރު މަހުގެ 19 ވަނަ ދުވަހުއެވެ. އޭގެ ފަހުން އޭނާގެ ހަށިގަނޑު ބާއްވާފައި އޮންނަނީ އޯމަންސް ފިއުނަރަލް ހޯމްގެ ޑިސްޕްލޭގައެވެ. މަރފީއަކީ އޭނާ މަރުވިއިރު، އެންމެން ދަންނަ ވަގެކެވެ. ޖަލުގައި ހުއްޓާ އޭނާ މަރުވެ ދިޔައީ ކިޑްނީ ފެއިލްވެގެން ކަމަށް އޮންނަނީ އަޑުތައް ފެތުރިފައެވެ. މަރފީގެ ހަށިގަނޑު މަމިފައި ކުރެވުނީ، އެ މަސައްކަތުގައި އޭރު އުޅުނު މީހަކު، ޤަބުރު އެމްބާމް ކުރުމުގެ އައު އުކުޅެއް ތަޖުރިބާ ކުރަން އުޅުމުގެ ތެރޭގައި އެރި އޮޅުމަކުންނެވެ.
މަސައްކަތް ފަށައިގަނެގެން އައި ދުވަސްވަރު އޯމަން މުޅިންވެސް ބަރޯސާވީ ސައެންސްގެ ހޯދުންތަކުގެ މައްޗަށް. ދެން މި އެނގުނު އެއްޗަކީ، އޭގަ އެކުލެވޭ ކެމިކަލްގެ މިންވަރު، މާ ބޮޑަށްވެސް މަތިވެފަ ހުރި ކަން. މިއަދު ޤަބުރުތައް މަމިފައި ކުރަން ބޭނުން ކުރާ އުކުޅުތަކާއި ޚިލާފަށް އެކަން ކުރުމުގެ ނަތީޖާއެއްގެ ގޮތުން، ޤަބުރުގެ ޓިޝޫތައް ފުފިގގެން ދިޔައީ އިންތިހާ ހަލުވި ދުވެލީގައި، ގަދަ ބާރާއެކީ. އެހެންވެ، ސެލް މެންބްރޭންތައް ހަލާކުވެ، ހަށިގަނޑަށް އިންޖެކްޓް ކުރާ މާއްދާތައް، މާ މިނިވަންކޮށް ހަށިގަނޑު ތެރޭގަ ދައުރު ވާ ގޮތް ވީ. ހިސާބު ޖެހުމުގަ ހެދުނު ގޯސްތައް ހަވާސާ ކޮށްފަ ބަލާއިރު، ވިލީ، ނުވަތަ ސްޓޯން ވިލީގެ ހަށިގަނޑު ރައްކާ ކުރެވިފަ ބޭއްވިއްޖެ 128 އަހަރު ވަންދެން. 1895 ވަނަ އަހަރު އެ ޤަބުރަށް ގެނައި ބަދަލަކަށް ފަހު އިތުރު އެއްވެސް ކަމެއް ނުކޮށް، ޑިސްޕްލޭގަ ބޭއްވިއްޖެ.ޖޯޖް މެއިޒަރ؛ ބަރކްސް ކައުންޓީގެ ތާރީޚު ޢިލްމުވެރިއެއް
މަރފީ ހައްޔަރު ކުރެވުނު ވަޤުތު، ކަމާ ބެހޭ ފަރާތްތަކަށް އޭނާ ދީފައި އޮތީ އޭނާގެ އަސްލު ނަމެއް ނޫނެވެ. ޚިޔާލީ ނަމެއް ދީފައި އޮތުމުގެ ސަބަބުން، މަރފީގެ ތިމާގެ މީހުން ހޯދުމަށްވެސް ކަމާ ބެހޭ ފަރާތްތަކަށް އޮތި ބޮޑު ތަކުލީފަކަށް ވެފައެވެ. ޢާއިލާގެ މެންބަރަކު ހޯދުމުގެ މަސައްކަތް ކުރިއަށް ދިޔަ އިރު، ޖަނާޒާގެ ކަންކަން ކުރިއަށް ގެންދާ ފަރާތުން ވަނީ، މަރފީގެ ހަށިގަނޑު ވަޅުލުމުގެ ބަދަލުގައި، ތަޖުރިބާގެ މަރުހަލާގައި އޮތް އެމްބާމް އުކުޅެއްގެ ދިރާސާ ހެދުމަށް އެ ހަށިގަނޑު ވަޅު ނުލާ، އެތަނުގައި ބާއްވައިދިނުމުގެ ޢަމުރަކަށް އެދިފައެވެ.
އެމްބާމް ކޮށް ނިމިގެން، ވިލީގެ ޤަބުރު އޯމަންސްގަ ބާއްވާފަ އޮތީ، ޢާއިލާގެ ފަރާތުން، ކޮންމެވެސް މީހަކު އޭނަގެ ހަށިގަނޑު ބަލައި އާދޭތޯ... ހަފުތާތައް ފާއިތުވެ، މަސްތައް ފާއިތުވެ، އަހަރުތައް ފާއިތުވެގެން ދިޔަ އިރުވެސް، ވިލީގެ ޤަބުރާ އެއްވެސް މީހަކު ޙަވާލު ވާން ނައި... ވިލީއަކީވެސް އެއް އިރެއްގަ، އޭނާގެ ދެކެ ލޯބިވި ރަޙުމަތްތެރިންނާއި ޢާއިލާ މެންބަރންވެސް ތިބޭނެ މީހެއް.ޖޯޖް މެއިޒަރ؛ ބަރކްސް ކައުންޓީގެ ތާރީޚު ޢިލްމުވެރިއެއް
އޭގެ 100 އެތައް އަހަރެއް ފަހުން، ޓެކްނޮލޮޖީގެ އިތިރުން ތާރީޚީ އެތައް ލިޔުކިޔުމެއްގެ އެހީގައި، ފިއުނަރަލް ހޯމްއިން ވަނީ އެ ޤަބުރު ނިސްބަވްވަނީ ޖޭމްސް މަރފީއަށް ކަމުގައި ކަނޑައަޅާފައެވެ. މިހާރު އެ ހަށިގަނޑު ވަނީ ވަޅުވެސް ލާފައެވެ. މަރފީގެ މަހާނަ ގަލުގައި ބޮޑު އަކުރުން ލިޔެފައި އޮންނަނީ "ސްޓޯންމޭން ވިލީ" ކަމަށެވެ. ޖޭމްސް މަރފީގެ ނަން އޮންނަނީ އޭގެ ތިރީގައި، އެއަށް ވުރެ ކުދި އަކުރުން ލިޔެފައެވެ.
