72 ކިލޯ ޑްރަގް މައްސަލަ: ސީން އޮފް ކްރައިމް އޮފިސަރެއްގެ ހެކިބަސް ނަގައިފި
އިރުފާން ދިރިއުޅޭ ތަނުން ޑިޖިޓަލް ކައްޓާއަކާއި، ބައެއް އިތުރު ތަކެތި ހެކީގެ ގޮތުގައި ނަގާފައިވޭ
72 ކިލޯ މަސްތުވާތަކެތި ދިވެހިރާއްޖެއަށް އެތެރެކޮށް އެތަކެތި ޓްރެފިކްކުރަން އުޅުނު މައްސަލަ
72 ކިލޯ މަސްތުވާތަކެތި ދިވެހިރާއްޖެއަށް އެތެރެކޮށް އެތަކެތި ޓްރެފިކްކުރަން އުޅުނު މައްސަލައިގައި އެންމެ އިސްކޮށް ހުރި ކަމަށް ތުހުމަތު ކުރާ އިރުފާން ތަގިއްޔުއާއި އިތުރު ފަރާތްތަކެއްގެ މައްޗަށް އުފުލާފައިވާ ދައުވާގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ޑައިމޯފިން ޓްރެފިކް ކުރުމުގެ ދައުވާ ދައުލަތުން 10 މީހެއްގެ މައްޗަށް އުފުލިއެވެ. ނަމަވެސް އޭގެ ތެރެއިން 7 މީހަކަށް ކުރާ ޓްރެފިކިންގ ދައުވާ ފަހުން ދައުލަތުން ވަނީ އަނބުރާ ގެންގޮސްފައެވެ. އޭރު ދައުވާ ހުށައެޅިތާ އަހަރަކަށްވުރެ ގިނަ ދުވަސް ވަނީ ވެފައެވެ.
މިހާރު މި މައްސަލައިގައި ދައުވާ އުފުލާފައިވަނީ ޢިރުފާން ތަގިއްޔުއާއި، މުހައްމަދު އަކްރަމްގެ އިތުރުން، އަހުމަދު ނަސީރުގެ މައްޗަށެވެ. ދައުލަތުން ބުނާ ގޮތުގައި މަސްތުވާތަކެތި އުުފުލާފައިވާ ކާރަކީ އަކްރަމްގެ ހިޔާޒަތުގެ ދަށުގައިވާ ކާރެކެވެ. އަދި މަސްތުވާތަކެތި ގެނައި ލޯންޗަކީ ނަސީރު ދުއްވި ލޯންޗެއްކަމަށް ދައުލަތުން ބުނެއެވެ.
ހޯމަ ދުވަހުގެ އަޑުއެހުމުގައި އޮތީ މި މައްސަލައިގެ ހެކިބަސް ނެގުމެވެ.
މި އަޑުއެހުމުގައި ހާޒިރުވި ހެކިވެރިޔާއަކީ މި މައްސަލައިގައި ދައުވާލިބޭ އިރުފާން ތަޤިއްޔު ހައްޔަރު ކުރުމުގެ އޮޕަރޭޝަންގައި ބައިވެރިވި ފުލުހެކެވެ.
އޭނާ ބުނީ، އިރުފާން ތަޤިއްޔު ދިރިއުޅޭ ތަން ކޯޓު އަމުރެއްގެ ދަށުން ބަލައި ފާސްކޮށްފައިވާނެކަމަށެވެ. އެތަން ބަލައި ފާސްކޮށްފައިވަނީ އިރުފާން ތަޤިއްޔުގެ ހާޒިރުގައިކަމަށްވެސް ހެކިވެރިޔާ ވިދާޅުވިއެވެ.
ހެކިވެރިޔާ ވިދާޅުވީ، އޭނާ ދިރިއުޅޭ ތަނުން ޑިޖިޓަލް ކައްޓާއަކާއި، ބައެއް އިތުރު ތަކެތި ހެކީގެ ގޮތުގައި ނަގާފައިވާނެކަމަށެވެ.
އެއަށްފަހު ހުޅުމާލޭ ފޭސް 2ށް ގޮސް، އިރުފާން ތަޤިއްޔުއާ ގުޅުންހުރި ކާރުވެސް ބަލައި ފާސްކޮށްފައިވާކަން ހެކިވެރިޔާ ފާހަގަ ކުރެއްވިއެވެ. އެ ކާރުން އިރުފާނުގެ ވޮލެޓާއި، 2 ސިމެއްގެ އިތުރުން 3 ފޯނެއް ފެނިފައިވާކަމަށް ހެކިވެރިޔާ ވިދާޅުވިއެވެ.
އޭގެ އިތުރުން، މި މައްސަލައިގައި އެތެރެކޮށްފައިވާ މަސްތުވާތަކެތި ފޮރުވާފައިވާކަމަށް މައުލޫމާތު ލިބުމުން، އެކަމާ ގުޅިގެން ހިންގާފައިވާ އޮޕަރޭޝަންތަކުގައިވެސް އޭނާ ވަނީ ބައިވެރިވެފައެވެ. އެގޮތުން ދައުވާލިބޭ ފަރާތްތަކުގެ ހާޒިރުގައި މި މައްސަލައާ ގުޅުންހުރި ލޯންޗެއް ބަލައި، ހެކި ހޯދާފައިވެއެވެ.
