މި އަހަރުގެ އިންޓަނޭޝަނަލް މޯލްޑިވްސް ޓްރެވެލް މާކެޓް (އައިއެމްޓީއެމް) ފެއާރ އާދިއްތަ ދުވަހު ފަށައިފި

މި އަހަރުގެ އިންޓަނޭޝަނަލް މޯލްޑިވްސް ޓްރެވެލް މާކެޓް (އައިއެމްޓީއެމް) ފެއާ އާދިއްތަ ދުވަހު ފަށައިފިއެވެ.

އާދިއްތަ ދުވަހު މަންހަޓަން ބިޒްނަސް ހޮޓަލުގައި ބޭއްވި ޚާއްސަ ރަސްމިއްޔާތު ޝަރަފުވެރި ކޮށްދެއްވާފައިވަނީ ނައިބު ރައީސް ފައިސަލް ނަސީމްއެވެ. މި އަހަރުގެ ފެއާ އަކީ އައިއެމްޓީއެމްގެ ހަވަނަ ފެއާއެވެ.

މި ރަސްމިއްޔާތުގައި ވާހަކަ ދައްކަވަމުން އައިއެމްޓީއެމްގެ މެނޭޖިން ޑިރެކްޓަރު ޝިއުނާ ޚާލިދު ވިދާޅުވެފައިވަނީ މި މަސައްކަތަކީ މީގެ ފަސް އަހަރު ކުރިން ފެށުނު މަސައްކަތެއްކަމަށެވެ. އަދި މި މަސައްކަތުގެ ކާމިޔާބުކަން ފާހަގަކުރައްވާ ޝިއުނާ ވިދާޅުވީ، މަސައްކަތް ފެށުނު އިރު މިހާބޮޑު ކާމިޔާބީއަކާއި ހިސާބަށް ވާސިލްވެވިދާނެކަމާއިމެދު ހީވެސް ނުކުރައްވާކަމަށާއި، ނަމަވެސް މިއަދު ނުހަނު ގިނަ ކާމީޔާބީތަކެއް ލިބިފައިވާކަމަށެވެ.

އައިއެމްޓީއެމް އިން ބޭނުންވަނީ ރާއްޖެއަކީ ހަމައެކަނި ޗުއްޓީ ދަތުރުފަތުރު ކުރާ ގައުމެއްގެ ގޮތުގައި އޮތުން ނޫންކަމަށާއި، މުސްތަގުބަލުގައި ގްލޯބަލް ކޮންފަރެންސް ތަކާއި، ވިޔަފާރި ބައްދަލުވުންތަކާއި، މައުރުޒުތައް ބާއްވާ ޕްރިމިއާ މަންޒިލެއްގެ ގޮތުގައިވެސް ރާއްޖެ ފާހަގަ ކުރެވެން ބޭނުންވާކަމަށް ޝިއުނާ ވަނީ ވިދާޅުވެފައެވެ.

މީގެއިތުރުން، ޓޫރިޒަމް މިނިސްޓްރީގެ ޑެޕިއުޓީ މިނިސްޓަރު، ނައުޝާދު މުހައްމަދު ވިދާޅުވީ، ހިއުމަން ރިސޯސް ދާއިރާގައި މަސައްކަތްކުރެވޭނެ ވަރުގެ ފެންވަރު ހުރި ގާބިލް ދިވެހިން ނެތްކަމަށާއި، ފަތުރުވެރިކަމާއި ގުޅުން ހުރި އެހެނިހެން ދާއިރާތައް ތަރައްގީކުރުން މުހިއްމުކަމަށެވެ.

އައިއެމްޓީއެމް ފެއާ އަކީ ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކާއި، އެކޮމަޑޭޝަން ޕްރޮވައިޑަރުންނާއި، ޓްރެވަލް އޮޕަރޭޓަރުންގެ އިތުރުން އެޖެންޓުން ބޭރުގެ މާކެޓު ތަކާއި ގުޅުވާލަދޭ ފެއާއެކެވެ. އަދި މި ފެއާއިން ރިސޯޓުތަކުގެ އިސްބޭފުޅުން އެއް ބޭފުޅަކު އަނެއް ބޭފުޅަކާއި ބައްދަލުކުރުމުގެ ފުރުސަތުވެސް ލިބިގެންދެއެވެ.

މި ފެއާ ކުރިއަށްދާނީ އާދިއްތަ އަދި ހޯމަ ދުވަހު މަންހަޓަން ބިޒުނަސް ހޮޓެލްގައެވެ.