ތާރީޚީ ފަޚްރާއި ޝަރަފަށް ޒުވާނުންގެ ޝަޢުޤު ގެއްލި، ފަންނުވެރިކަން ނެތި ދިއުމުގެ ބިރެއްގައި!

ލުބްނާންގެ ވެރިކަން ކުރާ ބެއިރޫތުގެ 40 ކިލޯމީޓަރު ދެކުނުން އޮންނަ ޖިޒީންއަކީ ޤުދުރަތީ ރީތިކަން، އޭގެ އެންމެ އިންތިހާއަށް ލިބިފައި އޮތް އަވަށެކެވެ. ފަރުބަދައިގެ ވާދީތަކާއި ހިތްގައިމު ގަސްތަކުން ފެހިކަމާއި އަރޯކަން ގެނެސްދީފައި ވާ ޖިޒީންއަކީ ލުބްނާންގެ ދެކުނުގައި އޮތް ފަތުރުވެރި މަންޒިލްތަކުގެ ތެރެއިން އެންމެ މަޤުބޫލު މަންޒިލު ކަމުގައި ވެސް ދެންނެވިދާނެއެވެ. އަދި މި ވަރުން ފުއްދާލެވޭކަށް ނެތެވެ. ޖިޒީންއަކީ ލުބްނާންގެ ޒަމާންވީ ތާރީޚާއި ތަރިކައާއި ގުޅިފައި ވާ ޚަންޖަރާއި ގެވެހިކަންވާރު ހެދުމުގެ މަސައްކަތުގައިވެސް އަރާ އޮތް އަވަށެކެވެ. އެތައް ޤަރުނެއް ވީ އެ ސިނާޢަތް ފަނޑުވެ ދިއުމާ ދިމާއަށް މިޞްރާބު ޖަހާފައި އޮތް ނަމަވެސް، އެ ޘަޤާފަތް ދެމެހެއްޓުމަށް މަސައްކަތް ކުރާ މަދު ފަންނުވެރިންތަކެއް ޖިޒީންގައި އަދިވެސް އެބަ ތިއްބެވެ.

އެންޓުއައިން ޝައީން ކިޔައިދިން ގޮތުގައި ޚަންޖަރާއި ގެވެހިކަންވާރު ހެދުމުގެ ފަންނުވެރި މަސައްކަތް، ޖިޒީންގައި ފެށިގެން އައީ މީލާދީން 17 ވަނަ ޤަރުނުގެ ތެރޭގައެވެ.

ޖިޒީންގައި މިހާރުވެސް އެ މަސައްކަތްތައް ކުރިއަށް ދާ އިރު، އެންމެ އިހުގެ އުކުޅުތައް އަދިވެސް ބޭނުން ކުރެއެވެ. ނަމަވެސް، އެ ހުނަރުތަކާއި ފަންނުވެރިކަން މުޅިން ނެތި ދިއުމުގެ ބިރު، އޭގެ އެންމެ އިންތިހާއަށް ބޮޑުވެފައި އޮތްކަން، ޝައީންގެ ވާހަކަތަކުން އެނގެއެވެ.

ޖިޒީންއަކީ ޚަންޖަރާއި ކަނޑީގެ އިތުރުން ގެވެހިކަންވާރު އުފެއްދުމަށް މަޝްހޫރު އަވަށެކެވެ. ރަސްރަސްކަލުންނާއި، ޤައުމުތަކުގެ ރައީސުންނަށް ޚާއްޞަކޮށްގެންވެސް ޖިޒީންއިން އެފަދަ ސާމާނުތައް އުފައްދާފައި އެބަހުއްޓެވެ.

ލުބްނާންގައި އޮތް ފަންނުވެރި ވެއްޓަށް ކުރިމަތިލާން ޖެހިފައި ވާ އެންމެ ބޮޑު ގޮންޖެހުމަކީ، އެ ޤައުމަށް މިއަދު ކުރިމަތި ވެފައި އޮތް މާލީ ކާރީޘާއެވެ. ޚަންޖަރާއި ގެވެހިކަންވާރު އުފެއްދުމުގެ މަސައްކަތުގައި އުޅޭ މާރޫން ޢައޫން ފާހަގަ ކުރި ގޮތުގައި، މާލީ ކާރިޘާގެ ސަބަބުން، އެ މީހުންނަށް ލިބެމުން ދާ ވިޔަފާރީގެ ފައިދާ ވަނީ ވަރަށް ބޮޑަށް ދަށްވެފައެވެ. ހަދިޔާގެ ގޮތުގައި އެފަދަ އުފެއްދުންތައް ގަތުމަކީ ލުބްނާނުގެ ދޭސީންނަށް މިއަދު ދަތި ކަމަކަށް ވާ އިރު، ޖިޒީޏްއަށް ޒިޔާރަތް ކުރާ ފަތުރުވެރިންގެ ޢަދަދު ދަށަށް ދިއުމަކީ ޢައޫން ފަދަ މީހުންގެ އާމްދަނީއަށް އެކަމުގެ ސަބަބުން ނޭދެވޭ އަސަރު ފޯރާ ކަންކަމެވެ.

ލުބްނާންގެ ރަމްޒެއް ކަމުގައި ބަލާ ގެވެހިކަންވާރު އުފެއްދުމުގެ މަސައްކަތް ޖިޒީންގައި އެންމެ ފުރަތަމަ ފެށި ކަމަށް ވަނީ ހައްދާދު ޢާއިލާއިންނެވެ. އެއީ 1700 ގެ އަހަރުތަކުގެ ތެރޭގައި ކަމަށްވެސް ބުނެވެއެވެ. ހައްދާދު ޢާއިލާއިން އެ މަސައްކަތުގައި އުޅުނު އެންމެ ފަހު މީހާ މި ދުނިޔެއާއި ވަކިވެ ދިޔައީ 2015 ވަނަ އަހަރުގެ ތެރޭގައެވެ.