ސިޔާސީ މަސައްކަތަށް ނިކުންނަވާނީ ފާޑުކިޔުންތައް އަންނާނެކަން އެނގި ތަހަންމަލް ކުރުމުގެ ވިސްނުމާއެކު: އިމްރާނު
ފާޑުކިޔުންތަކާ ކުރިމަތި ނުލާ ސިޔާސީ އިސްލާހީ މަސައްކަތް ކުރެވިދާނެކަމަށް ހީކުރުމީ ވަރަށްބޮޑު ކުށް ހީ އެއް
އަދާލަތު ޕާޓީގެ ރައީސް އިމްރާން އަބްދުﷲ
ސިޔާސީ މަސައްކަތަށް ނިކުންނަންވާނީ ފާޑު ކިޔުންތައް އަންނާނެކަން އެނގި އެކަން ތަޙަންމަލު ކުރުމުގެ ވިސްނުމާއެކުގައި ކަމަށް އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
އިމްރާން ކުރެއްވި ޓުވީޓެއްގައި ވިދާޅުވީ ފާޑުކިޔުންތަކާ ކުރިމަތި ނުލާ އިސްލާހީ މަސައްކަތް، ވަކިން ޚާއްސަކޮށް ސިޔާސީ އިސްލާހީ މަސައްކަތް ކުރެވިދާނެކަމަށް ހީކުރުމީ ވަރަށްބޮޑު ކުށް ހީ އެއް ކަމަށެވެ.
އިމްރާން މިފަދައިން ވިދާޅުވެފައިވާއިރު ސިޔާސީ މަސައްކަތުގައި އެއްވާނެއްގައި، އެއްގޮތެއްގައި ދިގުމުއްދަތަކަށް ސާބިތުވެ ހުރުމަކީ ވަރަށް ބޮޑު ކަމެއްކަމަށް ވެސް މިގެކުރިން ވަނީ ވިދާޅުވެފައެވެ.
އިމްރާންގެ ސިޔާސީ ހަޔާތްޕުޅު ފަށްޓަވާފައިވަނީ 2006 ވަނަ އަހަރު އަދާލަތު ޕާޓީގެ އުފެއްދެވުމާ ހަމައިންކަމަށްވާއިރު އެބޭފުޅާ ވަނީ އަދާލަތު ޕާޓީ ވުޖޫދު ކުރެވުނު ހިސާބުން ފެށިގެން 2011 ވަނަ އަހަރާ ހަމައަށް އެޕާޓީގެ ސެކްރެޓަރީ ޖެނެރަލްގެ މަގާމު ފުރުއްވާފައެވެ.
2011 ވަނަ އަހަރު އެޕާޓީގެ ރައީސްގެ މަގާމަށް އިންތިޚާބު ވެވަޑައިގަތުމަށްފަހު މިއަދާ ހަމައަށް އެގެންދަވަނީ ޕާޓީގެ ރައީސްގެ މަޤާމު އަދާކުރައްވަމުންނެވެ.
