ފްރެއިބާގް އަތުން ވެސްޓް ހޭމް ހޯދި މޮޅު، ތާރީޚީ މޮޅަކަށް!

ބަލިނުވެ ވިދިވިދިގެން ޔޫރަޕްގައި އެންމެ ގިނަ މެޗު ފުރިހަމަކުރި ޓީމަކަށް ވެސްޓް ހޭމް ޔުނައިޓެޑް ވެއްޖެއެވެ.

ވެސްޓް ހޭމްއަށް މި ތާރީޚީ ރެކޯޑް ލިބުނީ ޔޫރޮޕާ ލީގުގައި ފްރެއިބާގް ބަލިކޮށް ގްރޫޕްގެ އެއްވަނަ ދެމެހެއްޓި މެޗާއެކުއެވެ. މިއީ ޔޫރަޕްގައި ބަލިނުވެ އެޓީމުން ވިދިވިދިގެން ފުރިހަމަކުރި 17 ވަނަ މެޗެވެ. ބަލިނުވެ 16 މެޗު ފުރިހަމަކޮށްގެން ދެވަނާގައި އޮތީ މެންޗެސްޓަރ ސިޓީއާއި ލީޑްސް ޔުނައިޓެޑާއި ޓޮޓެންހަމެވެ. ލީޑްސްއާއި ޓޮޓެންހަމް އެ ރެކޯޑް ހެދީ 1960 އާއި 1970 ގެ އަހަރުތަކުގައެވެ.

ފްރެއިބާގް އަތުން ވެސްޓް ހޭމް ޔުނައިޓެޑް މޮޅުވީ 2-1 ނެވެ. މެޗު ފަށައިގެން އަށްވަނަ މިނެޓުގައި ވެސްޓް ހޭމްއަށް ކުރިހޯދައިދިނީ ލުކަސް ޕާކުއޭޓާއެވެ. އެކަމަކު ދެވަނަ ހާފް ފަށައިގެން ހަތަރު ވަނަ މިނެޓުގައި ފްރެއިބާގުން ނަތީޖާ ހަމަހަމަކުރިއެވެ. ނަތީޖާ ހަމަހަމަކޮށްދިނީ ރޯނަލްޑް ސަލައިއެވެ. މެޗުން ވެސްޓް ހޭމް މޮޅުކޮށްދިން ލަނޑު ނަޔެފް އަގާޑް ޖެހީ 66 ވަނަ މިނެޓުގައެވެ.

މިމޮޅާއެކު ވެސްޓް ހޭމް ގްރޫޕްގެ އެއްވަނާގައި އޮތީ ދެ މެޗުންވެސް މޮޅުވެ, ހަ ޕޮއިންޓާއެކުއެވެ. ތިން ޕޮއިންޓާއެކު ދެވަނާގައި އޮތީ ފްރެއިބާގެވެ.