ސައޫދީން ބިޑްކުރިޔަސް ވޯލްޑްކަޕް ބާއްވަން އޮސްޓްރޭލިޔާ ވާދަކުރަނީ
ސައޫދީން ޝައުގުވެރިކަން ފާޅުކުރީ އޮސްޓްރޭލިޔާ އަށް ވުރެ ފަހުން
އޮސްޓްރޭލިޔާ އަދި އާޖެންޓީނާ 202ގެ ވޯލްޑްކަޕުގައި ކުޅުނު މެޗުގެ ތެރެއިން
ސައޫދީ އަރަބިއްޔާއިން 2034 ވަނަ އަހަރުގެ ވޯލްޑްކަޕް ބާއްވަން ބިޑްކުރާނެކަން އިއުލާނުކުރި ނަމަވެސް އޮސްޓްރޭލިޔާ ވެސް އެކަމަށް ވާދަކުރާނެ ކަމަށް އެ ގައުމުން ބުނެފި އެވެ.
އޮސްޓްރޭލިޔާ އަކީ އޭޝިޔާއިން މިކަމަށް ޝައުގުވެރިކަން ފާޅުކުރި ފުރަތަމަ ގައުމެވެ. އަދި މުއްސަނދި ސައޫދީ އަރަބިއްޔާއިން ޝައުގުވެރިކަން ފާޅު ކުރީ ފަހުންނެވެ. ނަމަވެސް އޭޝިޔާގެ ފުޓްބޯޅައިގެ މައި އިދާރާއިން މިހާރު ވަނީ ސައޫދީ އަރަބިއްޔާއަށް ތާއީދުކުރުމަށް އޭޝިޔާގެ ގައުމުތަކުގެ ކިބައިން އެދިފަ އެވެ. ރާއްޖެ ވެސް ވަނީ ސައޫދީންނަށް ތާއީދުކުރަން ނިންމައިފަ އެވެ.
ނަމަވެސް އޮސްޓްރޭލިޔާގެ ފުޓްބޯޅަ ފެޑަރޭޝަނުން ބުނީ ސައޫދީން ބިޑްކުރާނެ ކަމަށް ބުންޏަސް އޮސްޓްރޭލިޔާގެ ޝައުގުވެރިކަމަށް ނިމުމެއް ނާންނަ ކަމަށެވެ.
އޯޝޭނިއާއިން އޭޝިޔާ އަށް 2006 ވަނަ އަހަރު ބަދަލުވި ފަހުން އޮސްޓްރޭލިޔާ އަކީ އޭޝިޔާގެ ފުޓްބޯޅައިގެ ގަދަ ބާރެކެވެ. ސައުދީންނަށްވުރެ އޮސްޓްރޭލިޔާގެ ކާމިޔާބީތައް ގިނަ އެވެ.
ސައޫދީން ވޯލްޑްކަޕް ބާއްވާނެކަން އިއުލާނުކުރީ 2034 ވަނަ އަހަރުގެ މުބާރާތް ބާއްވަން ފުރުސަތުދޭނީ އޯޝޭނިއާ އާއި އޭޝިޔާގެ ގައުމަކަށްކަމަށް ރަސްމީކޮށް އިއުލާނުކުރުމުންނެވެ.
