ޅ.އަތޮޅު ރިސޯޓެއްގައި ސްނޯކްލިންއަށް ދިޔަ ޖަޕާނުގެ ފަތުރުވެރިއެއް މަރުވެއްޖެ

ޅ.އަތޮޅު ރިސޯޓެއްގައި ސްނޯކްލިންއަށް ގޮސްއުޅުނު ފަތުރުވެރިއަކު މަރުވެފައި އޮއްވާ ފެނިއްޖެއެވެ.

މިހާދިސާގެ ރިޕޯޓު ފުލުހުންނަށް ލިބިފައިވަނީ 27 ޑިސެންބަރު 2024 ވަނަ ދުވަހުގެ ހެނދުނު 8:33 ހާއިރެވެ.

ހޮނިހިރު ދުވަހު ފުލުހުން ބުނީ ޅ.އަތޮޅުގައި ހިންގާ ރިސޯޓެއްގައި ޗުއްޓީ ހޭދަކުރަމުން ދިޔަ ފިރިހެން ފަތުރުވެރިއަކު ސްނޯކްލިންގއަށް ގޮސް އުޅެނިކޮށް މޫދުގައި މަރުވެފައި އޮއްވާ ފެނިފައިވާ ކަމަށެވެ. އެއީ ޖަޕާނުގެ 70 އަހަރުގެ ފިރިހެނެއް ކަމަށް ފުލުހުން ބުނެއެވެ.

ޖަޕާނުގެ ފަތުރުވެރިއަކު މަރުވެފައިވާކަމަށް ފުލުހުން ބުނެފައިވާއިރު، ރާއްޖޭގެ ރިސޯޓެއްގައި ޗުއްޓީ ހޭދަކުރުމަށް އައިސް އުޅުނު ޖަޕާނުގެ މަޖިލިސް މެންބަރަކު މަރުވެފައިވާ ކަމަށް ބޭރުގެ މީޑިއާތަކުގައި ރިޕޯޓުކޮށްފައިވެއެވެ. މަރުވެފައިވަނީ ޖަޕާނުގެ މަޖިލިސް މެންބަރެއް ކަމަށްވާ ޓޮޝިޔުކި އަޑާޗި ކަމަށާއި، އޭނާ މަރުވެފައިވަނީ ކަނޑުމަތީގެ އެކްސިޑެންޓެއްގައި ކަމަށް ބެލެވޭ ކަމަށް ރިޕޯޓުކޮށްފައިވެއެވެ.

މިމައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.

އައު އަހަރާ ދިމާކޮށް ގިނަ އަދަދެއްގެ ފަތުރުވެރިން ރާއްޖެއަށް އަންނަމުންދާއިރު، ދޭތެރެ ދޭތެރެއިން ސްނޯކްލިންގއަށް ދާ ފާތުރުވެރިންނާއި، ފީނަން ދާ ފަތުރުވެރިން މަރުވާ މައްސަލަތައް ފެންމަތިވެއެވެ.