2030 ވަނަ އަހަރުގެ ވޯލްޑްކަޕް ތިން ބައްރެއްގައި ކުޅެން ހަމަޖެއްސުމަށް ފީފާއިން ބާރު އަޅަން ފަށައިފި އެވެ.

މި ގޮތަށް ފީފާއިން ހުށަޅެނީ ކޮންމެ ހަތަރު އަހަރުން އެއް އަހަރު ބާއްވާ މުބާރާތަށް ލިބުނު ދެ ތެރެއިން ސްޕޭނާއި ޕޯޗުގަލް އަދި މޮރޮކޯގެ ބިޑް ކާމިޔާބުވުމާ ގާތަށް ދިއުމުންނެވެ. މި ގޮތުން ފީފާއިން ހުށަހަޅަނީ ޔޫރަޕާއި މެދުއިރުމައްޗާއި ދެކުނު އެމެރިކާގައި މެޗުތައް ކުޅުމަށެވެ.

ސްޕޭނުގެ ނުފޫޒުގަދަ މީޑިއާތަކުން ބުނާ ގޮތުގައި ޔޫރަޕުގެ ބިޑް ކާމިޔާބުވިކަން ދުނިޔޭގެ ފުޓްބޯޅަ ޖަމިއްޔާ ފީފާއިން ވަރަށް އަވަހަށް އަންގާނެ އެވެ.

ނަމަވެސް މި ތިން ގައުމާ ވާދަކުރި ދެކުނު އެމެރިކާގެ ގައުމުތަކުން އެމީހުންގެ ބިޑް ނާކާމިޔާބުވިކަން ރަސްމީކޮށް އަދި އިއުލާނެއްނުކުރެ އެވެ. 2030 ވަނަ އަހަރުގެ މުބާރާތް ބާއްވަން ސްޕޭނާއި ޕޯޗުގަލް އަދި މޮރޮކޯގެ އިތުރުން ހުށަހެޅީ ދެކުނު އެމެރިކާގެ އާޖެންޓީނާ އާއި ޕެރަގުއޭ އާއި އުރުގުއޭއިންނެވެ. މި ބިޑަށް ދުނިޔޭގެ ސަމާލުކަން ލިބުނީ 2030 ވަނަ އަހަރަކީ ވޯލްޑްކަޕަށް 100 އަހަރު ފުރޭ އަހަރު ކަމަށްވުމުން އުގުރުއޭއަކީ އެންމެ ފުރަތަމަ ވޯލްޑްކަޕް ބޭއްވި ގައުމުކަމަށްވުމުންނެވެ. ނަމަވެސް މީޑިޔާތަކުން ބުނާ ގޮތުގައި ދެކުނު އެމެރިކާގެ ބިޑް ކާމިޔާބުނުވި މައިގަނޑު ސަބަބަކީ މުބާރާތަށް ތައްޔާރުކުރަންޖެހޭ ދަނޑުތަކާއި އެނޫން އިންތިޒާމްތަކަށް ހަމަޖެއްސޭނެ ކަމުގެ ޔަގީންކަން ފީފާ އަށް ނުދެވުމެވެ. މިއާ ހިލާފަށް ޕޯޗުގަލް އާއި މޮރޮކޯ އަދި ސްޕޭނުގައި މިހާރު ވެސް ދުނިޔޭގެ ފެންވަރުގެ ދަނޑުތަކާއި ފުޓްބޯޅައިގެ ވަސީލަތްތައް އެބަހުއްޓެވެ.

ފީފާއިން ދެކުނު އެމެރިކާގައި ބައެއް މެޗުތައް ކުޅެން ހުށަހަޅަނީ ވޯލްޑްކަޕަށް 100 އަހަރު ފުރުން ފާހަގަ ކުރުމަށެވެ.