2030 ގެ ވަރލްޑް ކަޕް، 3 ބައްރެއްގެ 6 ޤައުމެއްގައި!
މުބާރާތް އޮންނާނީ ޔޫރަޕާއި، ދެކުނު އެމެރިކާއާއި އެފްރިކާގައި
2030 ވަނަ އަހަރުގެ ވަރލްޑްކަޕް ޚާއްޞަ ވާނެ
2030 ވަނަ އަހަރު އޮންނަ ފީފާ ވަރލްޑް ކަޕް 3 ބައްރެއްގެ 6 ގައުމެއްގައި ބާއްވަން ފީފާއިން ނިންމައިފިއެވެ.
2030 ގައި ވަރލްޑް ކަޕް ބާއްވަން ފެށިތާ 100 އަހަރު ފުރޭނެއެވެ. 2030 ވަނަ އަހަރު ވަރލްޑް ކަޕް ބާއްވަނީ ޔޫރަޕާއި, އެފްރިކާއާއި, ދެކުނު އެމެރިކާގައެވެ. ޔޫރަޕުން މުބާރާތް ބާއްވަނީ ސްޕެއިންއާއި ޕޯޗްގަލްގައެވެ. ދެކުނު އެމެރިކާއިން މުބާރާތް ބާއްވާނީ އާޖެންޓީނާއާއި, އުރުގުއޭއާއި, ޕެރަގުއޭގައެވެ. އެފްރިކާއިން މުބާރާތް ބާއްވާ ގައުމަކީ މޮރޮކޯއެވެ. މޮރޮކޯ ވެގެންދާނީ ވަރލްޑް ކަޕް ބާއްވާ އެފްރިކާގެ ދެވަނަ ގައުމަށެވެ. މިހާތަނަށް ވަރލްޑްކަޕް ބޭއްވި އެފްރިކާގެ ގައުމަކީ ދެކުނު އެފްރިކާއެވެ. އެއީ 2010 ވަނަ އަހަރުގެ މުބާރާތެވެ.
2030 ވަނަ އަހަރުގެ މުބާރާތުގެ ފުރަތަމަ ތިން މެޗް ކުޅޭނީ ދެކުނު އެމެރިކާގެ ތިން ގައުމުގައެވެ. އެއީ މުބާރާތަށް 100 އަހަރު ފުރުން ފާހަގަކުރާ މެޗުތަކެވެ. ވަރލްޑްކަޕް އެންމެ ފުރަތަމަ ބޭއްވީވެސް ދެކުނު އެމެރިކާގައެވެ. އެއީ 1930 ވަނަ އަހަރު އުރުގުއޭގައެވެ. ފީފާއިން ބުނީ ބެހިފައިވާ ދުނިޔެ އެކަތިގަނޑަކަށް ހަދައިދެނީ ފީފާއާއި ފުޓްބޯޅަ ކަމަށެވެ.
އޭގެފަހުން 2034 ވަނަ އަހަރު އޭޝިޔާއަށް ފުރުޞަތު ދިނުމުގެ ވިސްނުން ފީފާއިން ގެންގުޅެއެވެ. އެގޮތުން އޭޝިޔަން ފުޓްބޯޅަ ކޮންފެޑެރޭޝަންއާއި, އޯސޭނިޔާ ފުޓްބޯލް ކޮންފެޑެރޭޝަންގެ ބިޑްތަކަށް ޚާއްޞަ ސަމާލުކަމެއް ދޭނެކަމުގެ އިޝާރާތެއް ފީފާއިން ވަނީ ކޮށްފައެވެ. އެމުބާރާތަށް ސައުދީ އަރަބިއްޔާ ބިޑްކުރާނެކަމަށް ރިޕޯރޓްތައް ބުނެއެވެ.
