ބާސެލޯނާގެ އަމާޒަކީ ޔޫރަޕުގައި އެ ޓީމުގެ ފޯމު ރަނގަޅު ކުރުން ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.
ޒަވީ މިހެން ބުނީ ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގެ ދެ ވަނަ މެޗުގައި ޕޯޓޯއާ ދެކޮޅަށް ނުކުތުމުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. ބާސެލޯނާ ހިމެނޭ ގްރޫޕް ސީ ގައި ކުޅުނު ފުރަތަމަ މެޗުން ބާސެލޯނާ އަދި ޕޯޓޯ ވެސް ވަނީ މޮޅުވެފަ އެވެ. އެހެންކަމުން ބުދަ ދުވަހުގެ ރޭ ޕޯޓޯގެ ދަނޑުގައި ކުޅޭ މެޗުން މޮޅުވާ ޓީމަކަށް އެއް ވަނައިގައި ލީޑު ނެގުމުގެ ފުރުސަތު އޮންނާނެ އެވެ.
ޒަވީ ބުނީ ޔޫރަޕުގައި ބާސެލޯނާ އަށް ޔޫރަޕުގައި ފެންވަރު ރަނގަޅު ފުޓުބޯޅައެއް ކުޅެވެމުން އަންނަކަން ސާބިތު ކޮށްދޭން ޖެހޭ ކަމަށެވެ. އޭނާ ބުނީ ފާއިތުވި ދެ އަހަރެއްގެ ތެރޭގައި ބާސެލޯނާ އަށް އެކަން ކުރެވިފައި ނުވާ ކަމަށާއި، އެހެން ނަމަވެސް އަލުން އަނބުރާ އެކަމުގެ ތެރެއަށް އާދެވެމުން އަންނަ ކަމަށެވެ. ޒަވީ ބުނީ ބާސެލޯނާ އިން އަންނަނީ އެކި އެކު ގޮތްގޮތުން ކުރިއެރުންތަކެއް ހޯދަމުން ކަމަށާއި، އެ ޓީމަށް ޔޫރަޕުގައި ފައި ސާބިތު ކުރެވޭނެ ކަމަށެވެ.
އިތުރަށް ޒަވީ ބުނީ ބާސެލޯނާ އަށް ކުޅެމުން އަންނަ ޕޮލެންޑުގެ ކެޕްޓަން ރޮބާޓް ލެވަންޑޯސްކީ އަކީ އަބަދު ވެސް މޮޅު ކުޅުމެއް ދައްކަމުން އަންނަ ކުޅުންތެރިޔެއް ކަމަށެވެ. އޭނާ ބުނީ އަބަދު ވެސް ލެވަންޑޯސްކީއާ ވަރަށް ގާތުން ވާހަކަ ދެކެވޭ ކަމަށާއި އޭނާގެ ކުޅުމާމެދު ވެސް ހިތްހަމަ ޖެހޭ ކަމަށެވެ. ޒަވީ ފާހަގަ ކުރި ގޮތުގައި އަބަދު ވެސް ލެވަންޑޯސްކީ އަކީ އަމިއްލަ އަށް ކަންކަން ކުރިއެރުވުމަށް މަސައްކަތް ކުރާ ކުޅުންތެރިޔެކެވެ. އެހެންކަމުން ބާސެލޯނާ އިން ކުރިއަށް ދާން ކުރާ މަސައްކަތުގައި އޭނާ އަކީ މުހިންމު ކުޅުންތެރިޔެއް ކަމަށް ބުންޏެވެ.
ބާސެލޯނާ އާއި ޕޯޓޯ ބައްދަލު ކުރާ މެޗު ފަށާނީ ބުދަ ދުވަހުގެ ރޭ ދަންވަރު، ރާއްޖެ ގަޑިން 12 ޖަހާއިރު އެވެ.
