މަހުލޫފު މާލެ ސިޓީ މޭޔަރުކަމަށް ވާދަކުރައްވަނީ
މާލޭގެ އެންމެހާ ރައްޔިތުން ތާއީދު ކޮށްދެއްވުމަށް މަހުލޫފު ވަނީ އެދިވަޑައިގެންފައި
ޔޫތު މިނިސްޓަރު ކަމުގެ މަޤާމުގައި ހުންނެވި އަހުމަދު މަހުލޫފު
ޔޫތު މިނިސްޓަރު ކަމުގެ މަޤާމުގައި ހުންނެވި އަހުމަދު މަހުލޫފު މާލެ ސިޓީގެ މޭޔަރުކަމަށް ވާދަ ކުރައްވަން ނިންމަވައިފިއެވެ.
މަހުލޫފު ކުރެއްވި ޓްވީޓެއްގައި ވަނީ އެކަން ހާމަ ކުރައްވާފައެވެ. އެގޮތުން 17 ނޮވެމްބަރު 2023 ވަނަ ދުވަހު ހުސްވާ މާލޭ މޭޔަރު މަގާމުގެ ބައި-އިލެކްޝަންގައި ވާދަކުރެއްވުމަށް ނިންމަވާފައިވާކަމަށް މަހުލޫފު ވިދާޅުވިއެވެ.
ވުމާއެކު، މާލޭގެ އެންމެހާ ރައްޔިތުން ތާއީދު ކޮށްދެއްވުމަށް މަހުލޫފު ވަނީ އެދިވަޑައިގެންފައެވެ.
މާލެ ސިޓީގެ މޭޔަރުކަމަށް މަހުލޫފު ވާދަ ކުރައްވަނީ މޭޔަރުކަމުގެ މަޤާމުގައި ހުންނެވި ޑރ މުޙައްމަދު މުއިއްޒު ރިޔާސީ އިންތިޚާބު ކާމިޔާބު ކުރެއްވުމާއި ގުޅިގެންނެވެ.
މަޚްލޫފް އެމްޑީޕީއާ ގުޅިވަޑައިގެންނެވީ 2018 ވަނަ އަހަރު އެވެ. އޭގެ ފަހުން އޭނާ އަންނަނީ އެމްޑީޕީގެ އެކި އެކި ކަންކަމުގައި އަމަލީ ގޮތުން ބައިވެރިވެވަޑައިގަންނަވަމުންނެވެ. އެމްޑީޕީގެ މެދުއުތުރު ޕްރޮވިންސްގެ ރައީސްގެ މަގާމު ވެސް ފުރުއްވަމުން އަންނަ މަހުލޫފަކީ، އެ ޕާޓީގެ ބައި އިލެކްޝަން ކޮމެޓީގެ ޗެއާ އެވެ.
މަހުލޫފު ވަނީ ނިމިދިޔަ ރިޔާސީ އިންތިޚާބުގައިވެސް އެމްޑީޕީއަށް ކެމްޕޭނު ކޮށްދެއްވުމުގައި ކުރީ ސަފުގައި މަސައްކަތް ކުރައްވާފައެވެ.
އަދި އޭނާއަކީ ސަރުކާރުގެ އެންމެ ހިންގުންތެރި އެއް ވަޒީރުގެ ގޮތުގައި ގިނަ ބަޔަކު ސިފަ ކުރެއެވެ. އެގޮތުން ވަޒީރުކަމާ ހަވާލުވެވަޑައިގަތުމަށް ފަހުވެސް ފުރަތަމަ ދޮޅު އަހަރުގެ ތެރޭގައި 100 ވަރަކަށް ރަށަށް ޒިޔާރަތްކުރައްވައި އެ ރަށްރަށުގެ ކައުންސިލާއި ޒުވާނުންނާ ބައްދަލުކުރައްވާ ރަށަށް އެންމެ ބޭނުންވާ ކަންކަމާ ގުޅޭ ގޮތުން މަޝްވަރާ ކުރައްވާފައިވެއެވެ.
ޔޫތު މިނިސްޓަރުގެ މަގާމަށް ވަޑައިގެންނެވުމުގެ ކުރިން މަހުލޫފް ހުންނެވީ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރަކަށެވެ.
