އިތުބާރު ކުރެވޭ މަގާމެއްގައި ހުރެ ކުޑަކުއްޖަކަށް ޖިންސީ ގޯނާކުރި މީހެއްގެ ޖަލު ޙުކުމް ދަމަހައްޓައިފި
މި މައްސަލައިގައި ކުއްޖާއަށް ދިމާވި ޖިންސީ ގޯނާގެ ވާހަކަތައް ކިޔާދީފައިވަނީ ޚުދު ކުއްޖާ
ހައި ކޯޓު
އިތުބާރު ކުރެވޭ މަގާމެއްގައި ހުރެ ކުޑަކުއްޖަކަށް ޖިންސީ ގޯނާކުރި މީހެއްގެ މައްޗަށް ކޮށްފައިވާ ޖަލު ޙުކުމް ދިވެހިރާއްޖޭގެ ހައިކޯޓުން ދަމަހައްޓައިފިއެވެ.
މިއީ 2019 ވަނަ އަހަރު މީހެއްގެ މައްޗަށް ކުރި ޙުކުމެކެވެ. އެގޮތުން މި މައްސަލައިގައި ޖަލަށް ލުމަށް ކޮށްފައިވާ ޙުކުމް އެމީހާގެ ފަރާތުން ދިވެހިރާއްޖޭގެ ހައިކޯޓުގައި ވަނީ އިސްތިއުނާފުކޮށްފައެވެ.
މި މައްސަލައިގައި ދައުވާ އުފުލާފައިވަނީ އޭނާގެ އަނބިމީހާގެ ދައްތަގެ ދަރިފުޅަށް ޖިންސީ ގޯނާކޮށްފައިވާތީއެވެ.
ހައިކޯޓުން ބުނީ، ދިވެހިރާއްޖޭގެ ހައިކޯޓުގައި އިސްތިއުނާފުކުރެވިފައިވާ ގަޟިއްޔާގެ ޝަރީޢަތް ނިމުނު ގޮތުގެ ރިޕޯޓަށާއި، އެ ޤަޟިއްޔާ އިސްތިއުނާފުކުރުމަށް އިސްތިއުނާފުކުރާ ފަރާތުން ހުށަހަޅާފައިވާ ނުކުތާތަކަށާއި، އެ ނުކުތާތަކާއި ގުޅިގެން ދެފަރާތުން ދިވެހިރާއްޖޭގެ ހައިކޯޓުގެ ޝަރީޢަތުގެ މަޖިލީހުގައި ދައްކާފައިވާ ވާހަކަތަކަށާއި މައްސަލައާއި ގުޅުންހުރި ލިޔުންތަކަށް ބަލާއިރު، ދަށު ކޯޓުގެ ނިންމުމަށް ބަދަލެއް ގެންނަންޖެހޭ ތަނެއް ނެތްކަމަށެވެ.
ހައިކޯޓުން ކުރި ޙުކުމުގައި ބުނީ، މި މައްސަލައިގައި ކުއްޖާއަށް ދިމާވި ޖިންސީ ގޯނާގެ ވާހަކަތައް ކިޔާދީފައިވަނީ ޚުދު ކުއްޖާކަން އިޖުތިމާއީ ޙާލަތު އަންގައިދޭ ރިޕޯޓަށް ބެލުމުން އެނގޭ ކަމަށެވެ.
އެހެންކަމުން ކުއްޖާގެ މަންމަގެ އިތުރުން ބައްޕައާއި ގޭގެ އިތުރު މީހަކާ އިންޓަވިއުކޮށް ސުވާލުކުރެވިފައި ނެތްނަމަވެސް، ކުއްޖާގެ ވަށައިގެންވާ މާޙައުލު ދެނެގަންނަން މަސައްކަތް ކޮށްފައިވާކަން އެނގެން އޮންނާތީއާއި މިފަދަ ރިޕޯޓެއް ތައްޔާރުކުރާއިރު މި ރިޕޯޓު ތައްޔާރު ކުރުމަށް ކުރެވުނު އިންޓަވިއުތަކުން ރިޕޯޓު ތައްޔާރުކުރުމުގެ މަޤްޞަދު ޙާޞިލު ވެފައިވާނަމަ ކޮންމެހެން ކުއްޖާގެ މަންމަ އާއި ބައްޕައާ ދެމީހުންގެ ބަސް ހޯދުން ލާޒިމު ނޫންކަމަށް ހައިކޯޓުން ބުނެއެވެ.
ދިވެހިރާއްޖޭގެ ހައިކޯޓުގައި މި މައްސަލަ ނިންމެވީ ފަނޑިޔާރު ހުސައިން ޝަހީދާއި، ފަނޑިޔާރު ހުސައިން މަޒީދު އަދި ފަނޑިޔާރު ފާތިމަތު ފަރުހީޒާ އެވެ.
