ރޯމާ އިން ފްރޮސިނޯން ބަލިކޮށްފި

އިޓާލިއަން ލީގުގައި ފްރޮސިނޯނާ ދެކޮޅަށް ކުޅުނު މެޗު ރޯމާ އިން ކާމިޔާބުކޮށްފި އެވެ.

ރޯމާގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ރޯމާ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ. ފުރަތަމަ ހާފުގެ 21 ވަނަ މިނެޓުގައި އެ ޓީމަށް ލީޑު ނަގައިދިނީ ބެލްޖިއަމްގެ ރޮމެލޫ ލުކާކޫ އެވެ. އޭނާ އެ ލަނޑު ޖެހީ އާޖެންޓީނާގެ ޕައުލީ ޑިބާލާ ތަނަވަސްކޮށްދިން ފުރުސަތެއްގަ އެވެ. ރޯމާގެ ދެ ވަނަ ލަނޑު ލޮރެންޒޯ ޕެލެގްރިނީ ޖެހީ މެޗުގެ 88 ވަނަ މިނެޓުގަ އެވެ. އެ ލަނޑު ޖަހަން ވެސް ފުރުސަތު ތަނަވަސްކޮށްދިނީ ޑިބާލާ އެވެ.

މިއީ މި ސީޒަންގެ އިޓާލިއަން ލީގުގައި ރޯމާ އަށް ހޯދުނު ދެ ވަނަ މޮޅެވެ. މިހާތަނަށް ކުޅުނު ހަތް މެޗުގެ ތެރެއިން އެ ޓީމު ދެ މެޗުން މޮޅުވީއިރު، ދެ މެޗުން ވަނީ ބަލިވެފަ އެވެ. އަނެއް ތިން މެޗު ނިމިފައި ވަނީ އެއްވަރުވެގެންނެވެ. ހަތް މެޗުން ހޯދި އަށް ޕޮއިންޓާއެކު ރޯމާ އޮތީ ލީގު ތާވަލްގެ 12 ވަނައިގަ އެވެ. މި ސީޒަންގައި ރޯމާގެ ނަތީޖާތައް ދަށްވެފައިވާއިރު، އެ ޓީމުގެ ކޯޗު ހޯސޭ މޮރީނިއޯ ބުނަނީ މިހާރު އަމާޒަކީ ގަދަ ހަތަރު ޓީމުގެ ތެރެއަށް ވަނުން ކަމަށެވެ.