މި ސަރުކާރު ޖަޖުކުރާނީ ރައްޔިތުން: ރައީސް ސާލިހު
2 އޮކްޓޯބަރު 2023 | ހޯމަ 07:57ވެރިކަމުގައި ހޭދަކުރެއްވި ފަސް އަހަރަކީ އައު ތަޖުރިބާތަކެއް
ނޫސްވެރިންގެ ބައްދަލުވުމުގައި ރައީސް އިބްރާހީމް މުހައްމަދު ސާލިހު ވާހަކަފުޅު ދައްކަވަނީ
ކާމިޔާބު ގިނަ މަސައްކަތްތައް ކުރެއްވުނު ކަމަށާއި، މިސަރުކާރު ޖަޖުކުރާނީ ރައްޔިތުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް ސާލިހު ވިދާޅުވީ ވެރިކަމުގައި ހޭދަކުރެއްވި ފަސް އަހަރަކީ އައު ތަޖުރިބާތަކެއް ކަމަށާއި، ވެރިކަމާއި ހަވާލުވެވަޑައިގެންނެވީ ވެސް 25 އަހަރު ދުވަހުގެ ސިޔާސީ ތަޖުރިބާއާއެކު ކަމަށެވެ. އަދި ކޯލިޝަނުގައި ޚިޔާލު ތަފާތު އެތައް ބަޔަކު ގޮވައިގެން މަސައްކަތް ކުރައްވަންޖެހިވަޑައިގަތުން އެއީ ބުރަ މަސައްކަތެއްކަން ފާހަގަކުރައްވައި ރައީސް ސާލިހު ވިދާޅުވީ ރާއްޖެއަށް އެންމެ ފައިދާ ހުރި ގޮތަކީ ގިނަ ބަޔަކު އެކުލެވޭ ސަރުކާރެއް އޮވެގެން ކުރިއަށް ދިއުން ކަމަށް ގަބޫލުކުރައްވާ ކަމަށެވެ.
ރައީސް ސާލިހު ވިދާޅުވީ ކާމިޔާބީ ގިނަ މަސައްކަތްތަކެއް ކުރެއްވުނު ކަމަށާއި، މިސަރުކާރުން ތަރައްޤީގެ ގިނަ މަޝްރޫއުތައް ހިންގާފައިވާ ކަމަށެވެ. އަދި ރާއްޖޭގެ ރައްޔިތުންނަށް އަސާސީ ޚިދުމަތްތައް ގާއިމްކޮށްދެވުނު ކަމަށާއި، ހިލޭ ޑިގްރީ ކިޔެވޭނެ ގޮތްތައް ހަމަޖައްސައިދިނުމާއި، ރާއްޖޭގައި ސުލްހައާއި ހަމަޖެހުން ގާއިމްކޮށްދެވިފައިވާ ކަމަށް ރައީސް ސާލިހު ވިދާޅުވިއެވެ.
މީގެ އިތުރުން ރައީސް ސާލިހު ވިދާޅުވީ، ވޭތުވެދިޔަ ފަސް އަހަރުދުވަހު ދަތިތަކާއި އުނދަގޫތަކާއި އެކުވެސް ރައްޔިތުންނަށް ރަނގަޅު ޚިދުމަތްތަކެއް ކޮށްދެއްވިއްޖެކަމުގެ އިޙްޞާސްކުރެއްވޭ ކަމަށެވެ. އަދި ހެޔޮވެރިކަމެއް ރައްޔިތުންނަށް ކޮށްދެއްވިއްޖެ ކަމުގެ އުފާވެސް މިއަދު އިޙްސާސްކުރެއްވޭ ކަމުގައި ރައީސް ވިދާޅުވިއެވެ.
ކޮވިޑް-19އަށް އިޝާރާތް ކުރައްވައި ރައީސް ސާލިހު ވިދާޅުވީ މި ވަބާއިން އަރައިގަތުމަށް ބުރަ މަސައްކަތްތަކެއް ކުރެވިފައިވާ ކަމަށާއި، އަދި ނަތީޖާ ރަނގަޅު ކަމަށެވެ. މި ފަސް އަހަރުގެ ކާމިޔާބީގެ ލިސްޓު ތަރުތީބު ކުރާނީ ރައްޔިތުން ކަމަށާއި، އެކަންކަން ޖަޖުކުރާނީ ރައްޔިތުން ކަމަށް ރައީސް ވިދާޅުވިއެވެ. އަދި ވިދާޅުވީ މީގެ ދުވަސްކޮޅެއް ފަހުން މިސަރުކާރުގެ ވާހަކަތައް ރައްޔިތުން ދައްކާނެ ކަމަށާއި، އެމަންޒަރު ފެނިވަޑައިގަންނަވާ ކަމަށެވެ.
