މޯހަން ބަގާންދެކެ ބިރެއް ނުގަނޭ: މާޒިޔާ ކޯޗު

އޭއެފްސީ ކަޕުގައި މިރޭ އިންޑިޔާގެ ޗެމްޕިއަން މޯހަން ބަގާންއާ ދެކޮޅަށް ކުޅެން ބިރު ނުގަންނާނެ ކަމަށާއި މެޗަށް ނުކުންނާނީ ޓާގެޓެއް އޮވެގެން ކަމަށް މާޒިޔާގެ ކޯޗު މިލޯމިރް ސެސްލިއާ ބުނެފި އެވެ.

ބޮސްނިއާގެ ކޯޗު ބުނީ އިންޑިޔާގައި މެޗު ކުޅުނަސް އޭނާގެ ޓީމުން ޖެހިލުންވާންޖެހޭ ސަބަބެއް ނެތް ކަމަށާއި މިއީ މުބާރާތުގެ ދެ ވަނަ ބުރަށް ދިއުމަށް ވަރަށް މުހިންމު މެޗެއް ކަމަށެވެ.

މާޒިޔާ ޓީމަކީ ރާއްޖޭގެ ގައުމީ ޓީމުގެ ތިން ބައިކުޅެ އެއްބައި ކުޅުންތެރިން ތިބި ޓީމެވެ. ގައުމީ ޓީމުގެ ފުރަތަމަ 11 އަކީ ވެސް މާޒިޔާގެ ކުޅުންތެރިންނެވެ. މިއާއެކު އެ ޓީމުގައި ބިދޭސީ ހަ ކުޅުންތެރިން ވެސް އެބަތިއްބެވެ. އަދި ހަތަރު ޓީމު ހިމެނޭ ގްރޫޕުގެ ފުރަތަމަ މެޗުގައި ބަޝުންދުރަ ބަލުކުރެވުމުގެ ހިތްހަމަޖެހުމާއެކު މާޒިޔާގެ އަމާޒަކީ ފުރަތަމަ ފަހަރަށް އޭއެފްސީ ކަޕުގެ ދެ ވަނަ ބުރަށް ދިއުމެވެ. އެކަން ކުރެވޭނީ ގްރޫޕުގެ އެއްވަނަ ހޯދައިގެންނެވެ.

މި ޓާގެޓަށް ވާސިލްވުމަށް އެޅެމުންދާ ހުރަހަކީ ކޯޗު ބުނާގޮތުން ބައެއް ކުޅުންތެރިން މުޅިން ފިޓްނުވުމެވެ.

މޯހަން ބަގާން އަކީ އިންޑިޔާގެ އެންމެ ވަރުގަދަ އެއް ޓީމެވެ. އެ ޓީމުގައި އޮސްޓްރޭލިޔާ އާއި ފްރާންސް އަދި ސްޕޭން ކުޅުންތެރިންނާއި އިންޑިޔާގެ ގައުމީ ޓީމުގެ ކުޅުންތެރިން އެބަތިއްބެވެ.