ކުރިއަށް އޮތް އަހަރުތަކުގައި ވެސް ޗައިނާ އާއި އެކުއޮތް ގުޅުން ބަދަހިވާނެ ކަމަށް އުންމީދުކުރަން : ޝާހިދު
ދިވެހިރާއްޖެއާ ޗައިނާއާ ދެމެދު ސިޔާސީ ގުޅުން ޤާއިމުކުރީ 14 އޮކްޓޫބަރ 1974ގަ
ފޮރިން މިނިސްޓަރ އަބްދުﷲ ޝާހިދު
ކުރިއަށް އޮތް އަހަރުތަކުގައި ވެސް ޗައިނާ އާއިއެކު އޮތް ގުޅުން ބަދަހިވާނެ ކަމަށް އުންމީދުކުރައްވާ ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
ޝާހިދު މިފަދައިން ވިދާޅުވީ ޗައިނާގެ ޤައުމީ ދުވަހާއި ގުޅިގެން ކުރެއްވި ޓްވީޓެއްގައެވެ.
އެ ޓްވީޓްގައި ޝާހިދު ވިދާޅުވީ ޗައިނާގެ ޤައުމީ ދުވަހުގެ ޚާއްޞަ މުނާސަބަތުގައި، ސްޓޭޓް ކައުންސިލަރ އަދި ޚާރިޖީ ވަޒީރު ވަންގް ޔީއަށާއި، ޗައިނާ ސަރުކާރަށާއި، ރައްޔިތުންނަށް ވަރަށް އިޚްލާޞްތެރިކަމާއެކު ތަހުނިޔާ އާއި ހެޔޮއެދުންތައް އަރިސް ކުރައްވާ ކަމަށެވެ.
މީގެ އިތުރުން "ވަން ޗައިނާ ޕްރިންސިޕަލް" އަށް ދިވެހިރާއްޖެއިން ދެމުންދާ އެއްބާރުލުން ޝާހިދު ވަނީ ފާހަގަކުރައްވާފައެވެ. ހަމައެންމެ ކުރިއަށް އޮތް އަހަރުތަކުގައި ވެސް ދެގައުމު ދެމެދުއޮތް ގާތް އަދި އެކުވެރި ގުޅުން އިތުރަށް ބަދަހިވެ، ކުރިއަރަމުން ދާނެ ކަމަށް ގަބޫލުކުރައްވާ ކަމަށް ވެސް ޝާހިދު ވިދާޅުވިއެވެ.
ދިވެހިރާއްޖެއާ ޗައިނާއާ ދެމެދު ސިޔާސީ ގުޅުން ޤާއިމުކުރީ 14 އޮކްޓޫބަރ 1974ގައެވެ. ދިވެހިރާއްޖެއާ ޗައިނާއާ ދެމެދު ސިޔާސީ ގުޅުން ޤާއިމުކުރިތާ 50 އަހަރުފުރުން ކުލަ ގަދަކޮށް ވަނީ ފާހަގަކޮށްފައެވެ.
